Kurtze Anleitung:
Wie die jetzige boͤſe Zeit/ darinnen zwar fuͤr ſich ſelbſt/
nichts/ alß eytel Klag/ Ach/ vnd Weh regieret;
Dennoch
Dem WolEdlen vnd Ge-
ſtrengen Herꝛn
Friedrichen von Rothkiꝛch/
auff Teppliwoda/ Jonßdorff/ Juxdorff/
Koblaw/ vnd Kunßdorff/ deß Muͤnſterbergiſchen Fuͤr-
ſtenthumbs/ vnd Franckſteiniſchen Weichbildes
Wolverdienten Landt Rechtſitzer:
Vber dem roͤdtlichen Hintritt ſeiner
Seligen Hertzliebſten/
Der auch WolEdlen/ VielEhrentugend-
reichen Frawen/
Margarethæ Rothkirchin/
Geborener Mutſchlitzin/
Zu beſonderem Troſt gereichen koͤnne.
In damals zu Breßlaw/ den 4. Septembris, entwichenen 1642ſten
Jahres/ bey vberauß Hoch Anſehlich- vnd Volckreicher Ver-
ſamblung/ gehaltener Parentation/ vorgeſtellet:
Durch
/
auff Liebenthal.
Gedruckt zu Breßlaw/ durch Georgium Baumann.
Herren Wittiber.
Wol Edler vnd Geſtrenger/ In-
ſonders Freundlich Vielgeliebter Herr
Oehm/ Gevatter/ vnnd Wolerkandter
Werther Herr Bruder. Nechſt trewe-
ſter Wuͤnſchung von GOtt/ alles erfrewli-
chen Seligen Wolſtandes/ vnd Erbittung meiner Schuld-
willigſten Dienſte/ vberſende demſelben Ich hiermit/ die/
bey angeſtellter Sepultur ſeiner Liebſten/ von mir gehaltene
Abdanckung/ vnnd bitte zum hoͤchſten/ vmb entſchuldigung/
daß meinen gechrteſten Herren Gevatter/ Ich wegen eines
ſolchen ſchlechten dinges/ in die Zwantzig Wochen/ ſo offte/
ſo Inſtaͤndig/ vnd doch allemal vergebliche Anſuchung thun
laſſen.
Wie hoch kegen Ihm/ in ander wege/ Ich mich zu al-
ler moͤglichen Dienſtleiſtung/ verbunden erkenne/ iſt er ohne
viel vergebliches Ruͤhmen/ gnugſam verſichert.
Aber Zwo Vrſachen liegen in meinem Gemuͤtte/ vmb
derer willen ich annoch gerne ſehen wolte/ daß der offentliche
Druck dieſes Wercks vnterlaſſen wuͤrde.
bus/ oder außfuͤhrlicher Elaborirung dieſes thematis, gantz
keine Zeit gehabt/ dann am Sonnabend/ als den 26. Augu-
ſti/ eben den Tag/ da ſeine Hertzliebſte verſchieden/ bin von
meinem geliebten Herren Gevatter/ ich hierzu/ Muͤndlich
erbethen worden/ Am Sontage hat ſich in meinem Haupte/
ein ſolcher Schwindel ereignet/ daß ich/ fuͤr mich alleine/ we-
der gehen noch ſtehen koͤnnen/ ſondern biß auff die Mitwoch/
vmb 10 Vhr/ meiſten theyls gantz darnieder gelegen/ folgen-
den Doñerſtag gegen Abend/ ward es verrichtet/ da der Herꝛ
Gevatter/ als deme diß alles ſelbſten gar wol wiſſend/ ver-
nuͤnfftig Vrtheylen kan/ wie vbel vor dißmal/ mein Den-
cken vnd Reden geſchickt geweſen.
Andern mals/ beweget mich billich/ das gemeine Vr-
theyl der Fruͤhklugen/ die dergleichen Labores/ ſonderlich
einem Nobili/ auffs ſchaͤndlichſte zu laͤſtern vnd außzulegen
pflegen/ koͤnnen durchauß nicht leyden/ daß man offentlich
deß Herren vnd ſeines Namens gedencke/ daß ein Poli-
ticus ſich in ſeinem Reden vnd Schreiben/ zugleich als ein
Chriſt erweiſe/ es iſt ſeiner anererbeten Reputation viel
zuverkleinerlich.
Wiewol ich nun/ dieſen Teuffel/ nicht erſt heuer kennen
lerne/ auch die Wort Chriſti: Wer ſich mein vnnd meiner
Worte ſchemet/ deß wird ſich deß Menſchen Sohn ſchemen/
wann Er kommen wird in ſeiner Herrligkeit/ dermaſſen taͤ-
glich in meinen Ohren klingen/ daß ich der Welt Geyffer
vnd Vnflath/ ſo hoch nicht empfinde. Dennoch wolt ich
auch nicht gerne/ daß GOttes Wort/ vmb meiner Perſon
willen/ ſolte geleſtert werden. Ihm gebuͤhret Ehre vnnd
Ruhm/ Mir Haß vnd Verfolgung.
ter/ kein Bitten noch Flehen/ zu meiner Entſchuldigung/
verfangen wil/ Er mich auch gnungſam verſichert/ daß es
von vnterſchiedenen Vornehmen Leuthen/ embſig begehret
werde: Alß erjnnere ich mich billich/ der beſondern hohen
Vertraͤuligkeit/ ſo zwiſchen jhnen beyden/ vñ meiner wenig-
keit/ in die Dreyßig Jahr/ beſtaͤndig floriret/ vnd vbergebe
demſelbten hiermit ſolche Scartec ohne Abbruch/ vnd eintzi-
ge Vermehrung/ ſo gutt es in der Eyl/ vnnd bewuſten
Schwachheit/ gefallen/ zu ſeinem belieben. GOtt helffe
nur/ daß es Ihm Troͤſtlich/ vnd etzlich wenigen/ die es leſen/
erbaulich ſey/ ſo bin ich gnungſam ergetzt/ vnnd achte keines
Heydniſchen Politici Laͤſterung. Was hoch iſt vnter den
Menſchen/ das iſt ein Greuel fuͤr GOtt/ ſaget vnſer Hey-
land. Gnung zu meiner Befriedigung: Dann Welt
bleibt Welt/ Sicut erat in principio & nunc & ſem-
per. Wer Blind iſt/ ſol nicht ſehen. Interim ſey
GOttes Hand/
Sein Schutz/
Seine Lehre/
Vnd nach dieſer Zeit/
Vnſer Beyſtand/
Vnſer Trutz/
Vnſer Ehre/
Seine Herrligkeit/
Vnſre Seligkeit.
Dieſem Heyligen GOTT/ empfehle meinen Hertz-
liebſten Herrn Gevatter/ ich zu Ewigem Schutz/ vnd
verbleibe Sein DienſtEigener
Chriſtoph von Reydeburgk.
Hochgebornen Fuͤrſten/
vnd Fuͤrſtinnen.
Deß Muͤnſterbergiſchen Fuͤrſtenthumbs/
vnd Franckſteiniſchen Weichbildes.
Eines Geſtrengen/ Hochweyſen Rathß
dieſer Kayſerlichen Stadt Breßlaw: Hoch-
Anſehnliche Herren/ vnd Frawen Abgeſandte.
WolEdle vñ Heſtrenge/ Hochgeehrte Herꝛẽ.
WolEdle/ Viel Ehrentugendreiche/
Hochgechrte Frawen.
Hoch- vnd Wolgeborner Freyherr/
Gnaͤdiger Herꝛ Landeß Hauptmann.
Hoch- vnd Wolgeborne/ WolEdle vnd Ge-
ſtrenge/ WolEhrenveſte/ GroßAchtbare/
Wol Ehrwuͤrdiger/ Hochgelehrter/ Gnaͤdi-
ge/ Hoͤchſtgeehrte/ Großgun-
ſtige Herren.
Hoch- vnnd Wolgeborne/ Wol Edle/ Viel-
Ehrentugendreiche/ Gnaͤdige/ Hoͤchſtgeehrte/
Frawen/ Fraͤwlein/ vnd Jungfrawen.
Cicero einen Hominem politicum,
verè politicum/ beſchreiben wil/ attri-
buiret er demſelben/ vnter andern Eygenſchafften
auch: mentem firmam & immotam, ein beſtaͤn-
diges vnbewegliches Gemuͤtte/ in allen Zufaͤllen.
So lauten ſeine Worte: Magnitudinis animi &
fortitudinis proprium eſt, nihil extimeſcere,
omnia humana deſpicere, nihil quod homini
accidere posſit, intolerandum putare. Eines
Tapfferen/ Vnverzagten/ vnd Mannhafften Ge-
muͤttes Eygenſchafft iſt/ ſich fuͤr nichts fuͤrchten
noch entſetzen/ diß Weltliche alles verachten/ vnnd
nichts/ ſo einem Menſchen begegnen koͤnne/ fuͤr
vnleydlich halten. Quid eſt aliud Sors? (ſa-
get er anderßwo) quid fortuna? quid caſus? quid
eventus? niſi quum ſic aliquid cecidit, ſic eve-
nit, ut, vel non cadere atq; evenire, vel aliter
cadere atq; evenire potuerit. Was iſt Gluͤck
vnnd Zufall anders/ denn ſo etwas alſo gefallen/
vnd ſich zugetragen hat/ daß es entweder gar nicht
ſolcher geſtalt/ noch in einer andern hette fallen/
vnd ſich zutragen koͤnnen.
Die Regul iſt ſtatlich: Aber novem ubi?
Wo finden wir ſolche Leuthe? die ſich in praxi alſo
fuͤhren/ die Heyligſten Gottes/ im Alten vnd Neu-
en Teſtament/ an denen ich gnungſam erweyſen
koͤndte/ wie vbel ſich das Menſchliche Fleiſch vnnd
Blutt/ in die mores & moras/ vnſeres Wunder-
baren Gottes zuſchicken pflege/ wie in Traurigen
Zufaͤllen nichts/ als Weinen vnd Wehklagen zu-
ſehen ſey.
Hier ſtehet fuͤr vnſern Augen/ der Woͤl-
Edle vnnd Geſtrenge Herr Friedrich von
Rothkirch/ auff Teppliwoda/ ꝛc. Wie
embſig Er von Jugend auff/ dahin gearbeitet/
daß Er ſich/ nicht allein/ ſeinem Stande/ vnnd
Vaterland/ zu Ehren/ alß ein Nuͤtzlicher Politi-
cus/ Sondern vornehmlich/ kegen GOTT vnnd
Menſchen/ alß ein fromer Chriſt erweiſe/ iſt den
meiſten dieſes Loͤblichen Auditorii vnverborgen.
Aber wie vnmoͤglich Ihm falle/ ſeinen treu-
en verblichenen Eh-Schatz/ mit trockenen Augen
anzuſchauen/ die dannenhero aufferlegte ſchwere
Creutz-Laſt/ mit vnbeweglichem Gemuͤtte zuer-
tragen/ vnnd ſeinen jetzigen hoͤchſttruͤbſeligen Zu-
ſtand/ dem vorigen gleich zuachten/ weiſet die groſ-
ſe Anzahl/ ſeiner vergoſſenen Thraͤnen.
lohren: Nicht nur ſeine ſchoͤne LandGuͤtter/ die
Er ſchon in die Zehen Jahr/ mit dem Ruͤcken an-
ſehen muͤſſen: nicht nur ſein ſo offters/ mit ſchwe-
ren Vnkoſten/ erzeugetes Viehe/ Getreyde/ vnnd
andere nothwendige Lebenß Mittel/ durch den all-
gemeinen Soldaten Raub: Nicht etwa eines ſei-
ner lieben Kinder/ die Er gewieß auch/ mit Vaͤ-
terlichen Treuen meinet: Nicht ſein Vertreuli-
ches Geſchwiſter/ die Er ſchon laͤngſt/ wider ſein
hoffen/ alle vberleben muͤſſen/ Sondern:
Conjugem pietate ornatisſimam, ſein
Fromes/ Gottſeliges Eh Hertz.
Coronam capitis precioſisſimam, die
Wertheſte Krone ſeines Hauptes.
Lætitiam cordis exoptatisſimam, die
erwuͤnſchte Freude ſeines Hertzens.
Conſolatricem ſuavisſimam, die an-
nehmlichſte Troͤſterin/ in mancher wichtigen Sor-
ge/ vnd ſchweren Traurigkeit.
Comitem fidelisſimam, die Treueſte
Gefertin/ in dem ſo lang erlittenẽ ſchweren Exilio.
Adjutricem vigilantisſimam, die Sorg-
faͤltigſte Mittgehuͤlffin/ ſeiner zerfallenen Muͤhſe-
ligen Nahrung. Mit einem Wort:
Cor & Animam, ſein Hertz vnd Seele.
lich mit dem Koͤnige Hiskia nennen: einen Tag
deß Truͤbſals: Einen Tag deß Geſchreyes/ Furcht
vnd Schreckens: Einen Tag/ deß Heulens/ Wei-
nens/ vnd Wehklagens. In welchem getrennet
worden/ Zwey Ehleute: Nicht die einander fuͤr
laͤngſt gerne Sterben ſehen/ Sondern da eines fuͤr
das andere/ wann es GOttes Wille geweſen/ mit
Frewden geſtorben were. Ja da eines zuvor
hat vd dem andern/ nicht wol einen Tag/ ohne
Schmertzen leben koͤnnen. Dieſes feſte Band/
dieſe Ehliche Vertraͤuligkeit/ hat nun (ſag Ich)
der Gerechteſte GOTT/ vngeacht Er ſolches
vorhin/ vermittelſt ſeines Heyligen Miniſterii,
auffs ſtaͤrckſte verbunden/ nunmehr durch deß To-
des grim̃ige Thranney/ leyder widerumb ſchmertz-
lich zertrennet/ vnd auff geloͤſet. Vnd das iſt wol
gewieß/ vnter allen Zeitlichen Trauer-Faͤllen/
das Schmertzlichſte Hertzeleid/ wann hier GOtt
nicht ſelbſt troͤſtet/ ſo iſt aller Menſchen Troſt
vergebens.
Dann es ſage mir einer von treuer Freund-
ſchafft in der Welt/ was er wolle/ ſo haben wir dieſe
Angſt-Jahr zur genuͤge erlernet: daß keine Trew
treuer ſey/ alß die getreute Trew/ vñ keine Freund-
ſchafft beſtaͤndiger/ alß die Ehliche Freundſchafft.
jhrem Eh-Mañ gantz alleine geſtanden/ alle Ge-
fahr vmb ſeinet willen Maͤnnlich erduldet/ vnnd
lieber neben jhm/ in Angſt vnd Vngluͤck Sterben/
alß ohne denſelbten/ in Ruh vnd Sicherheit Leben
wollen.
Wie offt hat ſie ſein betruͤbtes Hertz erfreu-
et/ wann jhn nichts/ auff dem gantzen Erdbodem/
hat erfreuen koͤnnen/ Wie offt hat ſie ſeine erſchro-
ckene Seele getroͤſtet/ wann ſonſt gar kein Troſt
hat hafften wollen.
Welch Freund iſt jetziger Zeit ſo Voll-
kommen? der Haab vnd Gutt/ Hauß vnd Hoff/
Freunde vnd Verwandten beſeit ſetzet/ vnd einem
Verjagten/ in Armuth vnd Doͤrfftigkeit/ in Ge-
fahr vnnd Vnſicherheit/ an Ort vnnd Stelle/ da
man nichts Eygenes findet/ zu Leuthen/ die man
nicht kennet/ vnd auff eine Zeit/ derer Ende man
nicht ſihet/ beſtaͤndig vnd willig nachfolget; Treue
Ehgatten veruͤben ſolches/ heute zu tage vielfaltig.
Wehn halff fuͤr wenig Jahren ſein Gutt
vnd Vermoͤgen/ zur Zeit/ der gifftigen Seuche?
da alle Bekandte von ferne ſtunden/ die Vnbe-
kandten fuͤr vns flohen/ vnnd das Liebſte auff der
Welt/ das Gold/ niemanden ſo lieb war/ alß die
Treue Huͤlffe/ vnd Außrichtung/ die mancher be-
gatten haben einander vielfaltig/ ſolchen Dienſt
erwieſen.
Wer iſt noch auff heutige Stunde?
der dem andern/ ſeine verwuͤſtete Nahrung zu er-
gaͤntzen/ die beſte Hand beuth? vnd das fuͤglichſte
Mittel iſt? Je gewieß niemand alß Treue Ehgat-
ten/ die alleine ſind es: derer eines vmb deß an-
dern Wolfarth ſo willig ſorget/ vnd vmb ſein Auff-
nehmen/ ſo vnbeſchwerlich ſchwitzet.
Sol es kůnfftig zu einem noch hoͤhern
Exilio kommen? vnnd mit vns heiſſen/ wie dort
mit dem Heyligen Abraham: Gehe aus deinem
Vaterlande/ aus deines Vaters Hauß/ von deiner
Freundſchafft/ in ein Land/ das ich dir zeygen wil.
Oder/ wie mit den Kindern Iſrael/ die eben dieſe
Trauer-Klage fuͤhrten: Wir muͤſſen vnſer Land
reumen. Welch Gold wird alßdann ſo annehm-
lich? Welch Labſal ſo Kraͤfftig ſeyn? alß ein
Treuer Ehgatt/ ſeinem Verfolgten Ehgenoſſen.
Nu ſolcher Trew/ (ſag ich noch einmal/) iſt
leyder vnſer Herr von Rothkirch/ nach Gottes
Heyligem Willen/ in dieſer Welt beraubet. Da-
rumb/ wann er zuruͤck gedencket/ was vor einen
Theuren Schatz/ vor ein Seliges Kleinod/ Er
heute aus ſeinem Hauſe tragen/ vnnd der Erden
bet/ wie wol ſie jhn verhalten/ wie viel Angſt vnnd
Noth ſie die kurtze Zeit jhres wehrenden Ehſtan-
des/ neben jhm außgeſtanden/ wie Geduldig/ wie
Freundlich/ wie Troͤſtlich/ ſie ſich/ in allen aͤngſtli-
chen Zufaͤllen/ kegen jhm erwieſen/ Ja/ wie leicht
ſie alles andern vergeſſen kondte/ wann ſie nur jh-
ren Werthen Ehſchatz hatte/ So kan er freylich
anders nicht/ alß Weinen vnd Wehklagen/ Dann
er ſihet/ daß nun dieſes alles weg iſt/ daß er nu dieſe
Trew/ dieſe hertzliche Liebe/ dieſe Freundligkeit/
dieſe holdſelige Annehmligkeit/ nicht nur etzliche
Wochen/ (wie bißweilen vormalß/) Sondern die
Zeit ſeines Lebens entrathen ſol.
Weil es aber/ mit vns Chriſten/ eine
ſolche Beſchaffenheit hat/ daß vnſere Todten
deß HERREN Todten heiſſen! der ſie durch
jhr Seliges Sterben/ nur heiſt in jhre Kammern
gehen/ vnnd ſich einen kleinen Augenblick verber-
gen/ biß der Zorn voruͤber gehe/ nach dem ER nu-
mehr ſelber außgegangen/ heimzuſuchen/ die Ein-
wohner deß Landes/ daß das Land wird offenba-
ren muͤſſen/ das vielfaltig vergoſſene Chriſten-
Blutt/ vnd nicht weiter verhoͤlen koͤnnen/ die drin-
nen erwuͤrget ſind: Alß faſſet billich/ vnſer Ge-
genwertiger Herr Witteber ſeine Seele mit Ge-
alles Fleiſches/ vnnd deß Freundenreichen Lebens/
das GOTT geben wird denen/ ſo im Glauben
ſtarck vnd feſt bleiben fuͤr Ihm.
In deſſen goͤnnet er billich ſeiner Hertzlieb-
ſten/ jhre Himliſche Ruh vnd Sicherheit/ alß der
ja vielmal ſchmertzlich genung bekuͤmmert gewe-
ſen/ wie er ſie an einen ſolchen Orth bringe/ da ſie
nicht taͤglich hoͤren duͤrffe: die Stim̃e deß Draͤn-
gers/ da ſie mit Frieden ſchlaffe/ vnd Sicher woh-
nen koͤnne. Kein ſolcher Orth iſt faſt mehr/ inn
gantz Deutſchland anzutreffen/ man hoͤret allen-
thalben/ wie ein Bruder wider den andern/ ein
Freund wider den andern/ eine Stadt wider die
ander/ ein Reich wider das ander ſtreitet. Ja
alle Reich der Welt ſind forthin/ mit einander vn-
eines/ drumb werden ſie wuͤſte/ vnd ein Hauß faͤl-
let vber das ander.
Wann er dieſes wol erwieget/ ſo kan
jhm auch in ſeinem Betruͤbnuͤß/ die jetzige boͤ-
ſe Zeit/ darinn doch ſonſt kein Troſt iſt/ den-
noch zu erwuͤnſchtem Troſt gereichen.
Dann eben
Diß iſt die Zeit: davon jener bekandte
Comicus redet: Vixiſse nimio ſatius eſt, quàm
vivere. Es iſt weit beſſer gelebet haben/ alß
annoch leben.
bet: Erit tempus infandum & execrabile, quo
nemini libeat vivere. Es wird eine vberauß
Boͤſe/ vnnd Verfluchte Zeit ſein: da kein Menſch
wird Luſt haben zuleben. Gratulabuntur mor-
tuis, & vivos plangent. Sie werden die Ver-
ſtorbenen Gluͤckſelig achten/ vnnd die Lebendigen
beweinen.
Diß iſt die Zeit/ davon der Heylige Lu-
therus geſprochen: Ein Chriſt moͤchte von hertzen
wuͤntſchen/ daß er jnnerhalb Dreyßig oder Vier-
tzig Jahren/ mitalle ſeinem Saamen/ moͤchte ge-
ſtorben ſein/ ſo greuliche Zeiten/ Gotteßlaͤſterliche
Rotten/ Auffruhr/ vnd dergleichen Vngluͤck were
verhanden. Ach freylich/ freylich/ haben wir ar-
men Chriſten/ eine recht Boͤſe Zeit erlebet.
Eine ſolche Zeit: da ſich nur leyder/ die
Wolfarht vnſres lieben Vaterlandes/ zum eußerſtẽ
Vntergang neiget: da wir die Drey Haupt-
Straffen Gottes/ Schwert/ Hunger vnnd Peſti-
lentz/ vnd dannenhero/ lauter ſchmehlich Sterben
vnd Verterben/ fuͤr vnſern Augen ſehen.
Eine ſolche Zeit: da/ (wie geſagt/) ein
Koͤnigreich vber das ander faͤllet/ da man in allen
Landen nur/ von Krieg vnd KriegeßGeſchrey hoͤ-
ret: von Theurung/ vnd Erdboͤben/ hien vnd wi-
vnd die Liebe in vielen Hertzen/ gantz vnnd gar
erkaltet.
Eine ſolche Zeit: da wir durch allerhand
grimmige Tyrannen/ aͤrger alß die Juden/ von
jhren Babyloniern/ vnnd Chaldeern/ vervnruhi-
get werden: da man vns aller Lebenß-Mittel be-
raubet: da ſchon jhrer viel muͤſſen/ jhre Kleino-
der vmb Speiſe geben/ vnd ſind mit Schwert vnnd
Hunger vmbringet.
Eine ſolche Zeit: da die Elteſten der
Tochter Zion/ auff der Erden liegen/ vnnd ſind
ſtille/ da ſie Staub auff jhre Haͤupter werffen/
vnd haben Saͤcke angezogen/ da die Vnmuͤndigen
auff der Gaſſen verſchmachten/ vnd in den Armen
jhrer Muͤtter/ den Geiſt auff geben.
Eine ſolche Zeit: da die Trachen/ die
Bruͤſte reichen/ jhren Jungen/ vnnd Saͤugen ſie/
aber viel Muͤtter vnter den Menſchen/ muͤſſen Vn-
barmhertzig ſein/ wie ein Strauß in der Wuͤſten.
Da dem Saͤugling/ die Zung an ſeinem Gaumen
klebet vor Durſt/ da die jungen Kinder Brodt hei-
ſchen/ vnd iſt niemand/ der es jhnen braͤche.
Eine ſolche Zeit: da viel Tauſend Men-
ſchen/ zu jhrem Vnterhalt/ weiter keinen Rath
wiſſen. Sehn ſie auff ſich ſelbſt/ ſo heiſt es: Was
Womit werden wir vns Kleiden? Sehen ſie auff
jhre Kinder/ ſo heiſtes: Wo nehmen wir Brodt/
daß dieſe Eſſen? Sehen ſie auff den kleinen Vor-
rath/ ſo heiſt es: Was iſt das/ vnter ſo viele?
Eine ſolche Zeit: da man viel Schoͤne
Staͤdte vnnd Doͤrffer/ Haͤuſer vnnd Schloͤſſer/ in
Grund ruiniret/ deſoliret/ devaſtiret/ vrnd ohn
einige Vrſach in die Aſchen leget.
Eine ſolche Zeit: da man viel Schoͤne
GotteßHaͤuſer/ mit Gewalt auff ſchlaͤget/ Pluͤn-
dert/ vnnd dermaſſen vervnreiniget/ daß derglei-
chen Abſcheuligkeit/ gewieß niemals/ von den Vn-
glaͤubigen Tuͤrcken/ in jhren Muſchkeen/ vnnd
Goͤtzenhaͤuſern veruͤbet worden.
Eine ſolche Zeit: da man auch viel Vor-
nehme Leichen/ in jhren Graͤbern nicht ruhen laͤſ-
ſet/ da man jhre Aſche/ Fleiſch vnd Beine herauß
ſchuͤttet/ die Saͤrche zerreiſſet/ vnnd was von Gold
vnd Sylber gefunden wird/ recht Kirchen Raͤubri-
ſcher weiſe/ hinweg ſtielet.
Eine ſolche Zeit: da man Frawen vnnd
Jungfrawen/ theyls an der lichten Sonnẽ/ theyls
inn Chriſti Heyligen Beth Haͤuſern/ offentlich
ſchaͤndet/ da gar nicht helffen muß: jhr aͤngſtliches
Heulen/ Flehen vnnd Bitten/ auch die willigſte
werth.
Eine ſolche Zeit: da man die Chriſten
peiniget/ auff gar eine neu vnerhoͤrte weiſe: daruͤ-
ber ſich viel Hencker verwundern/ vnd ſagen: Es
were jhnen/ dieſe Menſchen-Marter/ niemals he-
kant geweſen/ Ach wie viel Tauſend/ haben jhre
Striemen/ jhre Wunden/ jhre Beulen/ mit ins
Grab nehmen muͤſſen/ an welchen jhre Teuffel/
auff jene Zeit/ wol ſehen werden/ in wehn ſie geſto-
chen haben.
Eine ſolche Zeit: da man die Armen
Leuthe/ theyls in die eingeheitzte Backoͤfen ſcheu-
bet/ brennend Kuͤhn vnnd Schwefel vnter die Naͤ-
gel ſtecket/ theyls darnieder leget/ vnd den Mund/
mit dem vnflaͤtigſten Waſſer gantz voll fuͤllet/ das
iſt Geiſtlich-vñ Weltlichen/ Edel- vnd VnEdelen/
Jungen vnd Alten/ vielfaltig begegnet.
Eine ſolche Zeit: da man die Hunde ab-
richtet/ nicht wie voriger Jahre/ auff Woͤlffe/
Haſen/ Rehe/ vnnd Fuͤchſe/ Sondern auff die
hoͤchſtklaͤgliche Menſchen-Jagt/ durch die man ſie
jaget vnd faͤhet/ auff allen hohen Bergen/ auff al-
len Huͤgeln/ in allen Steinritzen: da man im
Verborgenen lauret/ wie ein Loͤw inn der Hoͤle:
da ſo bald der Tag anbricht/ der Moͤrder auff-
Eine ſolche Zeit: da nicht nur Kain/ der
Bruder-Moͤrder/ Sondern manch fromer Chriſt/
muß Vnſteth vnd Fluͤchtig ſein/ im Lande/ daß
jhn Tod ſchlaͤget/ wer jhn findet. Sie erleyden
Spott vnd Geiſſel/ Bande vnnd Gefaͤngnuͤß/ Sie
werden geſteupet/ zuhauen/ zuſtochen/ durchs
Schwerdt Getoͤdtet/ ſie gehen im Elend herumb/
mit Mangel/ mit Truͤbſal/ mit Vngemach/ in den
Wuͤſten/ auff den Bergen/ in den Kluͤfften/ vnnd
Loͤchern der Erden/ der die Welt nicht werth iſt.
Eine ſolche Zeit: da ſich vnſere Drang-
ſalen/ nicht erſt diß Jahr anfangen/ Sondern da
wir ſchon/ vber Vier vnd Zwantzig Jahr/ vnſer
Brod eſſen in Sorgen/ vnd vnſer Waſſer trincken/
im Elend. Da wir von einer Zeit zur andern/
von einem Monath zum andern/ von einer Mor-
gen-Wache zur andern/ auff Beſſerung gehoffet:
gleichwol nur ſehen muͤſſen: wie jmmer auffs neue
das Schwerdt/ biß an die Seele reicht.
Wie vnſre Seel/ der beſte theil/
Forthin iſt jedem Moͤrder feil/
Der Leib wird nur geacht wie Koth/
Sein Noth vnd Todt/
Iſt Kurtzweil/ Augenluſt vnd Spoth.
Vnd hiermit ich alles zuſammen faſſe/ ſo ſage Ich:
ein Gottwolgefaͤlliger Abel erwuͤrget: ein Ein-
faͤltiger Noah verhoͤnet: ein Fromer Loth ge-
fangen vnd gepluͤndert: ein Vnſchuldiger Jacob
gehaſſet/ betrogen/ vnd vervortheylet: ein Gehor-
ſamer Joſeph/ verrathen vnd verkaufft: ein Wol-
verdienter Moyſes/ vbel geplaget: ein Huͤlff ſa-
mer Samſon geblendet: ein Treuer David Ver-
folget: ein Wolmeinender Abimelech verleumb-
det: ein Vnterthaͤniger Vrias/ vbel angefuͤhret:
Mit einem Wort: da die Boßheit erhaben/ vnnd
die Redligkeit vntergedrucket wird.
Wir haben eine ſolche Zeit erlebt: Da-
rinnen lauter Verwirrung/ wie zu Babel; lauter
Vppigkeit/ wie zu Sodom: lauter Dienſtbarkeit/
wie in Egypten: lauter Leichtfertigkeit/ wie zu
Gibea: lauter Abgoͤtterey/ wie zu Samaria:
lauter Vnglauben/ wie zu Jeruſalem: Taͤglich/
ja Stuͤndlich geſehen vnd gehoͤret wird.
Wir haben eine ſolche Zeit erlebt: Da
faſt alle Hoffnung/ zu erfrewlicher Enderung/
vergeblich ſcheinet: Dann/ wer wil Beſſerung/
bey ſolcher verhaͤrteten Boͤſerung: Heyl beym
Verterben: Gnade beym Teuffel: vnnd Gutte
Tage in der Hellen ſuchen?
Wir haben eine ſolche Zeit erlebt: Die
Tod-Bette leget: GOTT hates heylen wollen/
Aber es hat nicht wollen Heyl werden: GOTT
hat es durch Hunger Caſteyet/ vnd das Boͤſe wol
wegfaſten heiſſen: GOTT hat es durch Peſt vnd
Seuchen purgiret/ vnd den Vberfluß in vielen Gr-
then rein abgeſchafft: GOTT hat Ihm durch
die Moͤrder/ das boͤſe Gebluͤtt/ haͤuffig weggelaſ-
ſen/ vnd am Haupt/ Haͤnden vnd Fuͤſſen/ viel A-
dern eroͤffnet: Aber es iſt leyder zum Gutten er-
ſtorben: Es iſt ein Land/ das nicht zureinigen iſt.
Drumb leſts nu der Himliſche Artzt liegen: Denn
ER iſt deß Erbarmens Muͤde worden. Kurtz:
Wir haben eine ſolche Zeit erlebt:
Da die Menſchen Teuffel werden/
Vnd die Noth ſo groß wil ſein/
Da der Troſt gantz weicht auff Erden/
Vnd ſo grauſam wird die Pein/
Da ein Tag den andern lehrt/
Wie ſich Angſt mit aͤngſten mehrt/
Druͤber vnſre Hertz vnd Sinnen/
Nichts alß klaͤglich Heulen koͤnnen/
Es iſt eine alte Gewonheit/ daß wenn
Vertraute Freunde zuſammen kommen/ inn ge-
mein/ einer den andern fragt: Wie gehts noch?
drauff folget die Antwort: Es muß ſich leyden.
meine ja: Es muß ſich leyden/ in allen Scaͤn-
den: in allen Orthen vnnd Enden: Nach dem
Goͤttlichen Außſpruch: Wann der Gottloſe V-
bermutt treibet/ ſo muß der Elende leyden. I-
tem/ du wirſt Gewalt/ vnnd Vnrecht leyden muͤſ-
ſen/ vnd niemand wird dir helffen. Da leydet
man Hunger/ wie die zu Samaria. Da leydet
man Durſt/ wie die Bedraͤngten/ zun Zeiten Jobi.
Da leydet man Mangel/ wie jene Abgoͤtter. Da
leydet man groſſen Jammer/ wie Jeruſalem.
Da leydet man Schrecken/ wie Koͤnig David.
Da leydet man Schaden. Da leydet man Ar-
muth. Da leydet man Schmach. Da leydet
man Verfolgung. Da leydet man groſſe Noth.
Da muß man offt leyden/ alles was einem wie-
derfaͤhret.
Vnd hier iſt niemand zu Gottfuͤrchtig:
dann das war Hiob/ vnnd gleichwol ſpricht er:
Wann man mein Leyden zuſammen/ in eine Wa-
ge legte/ ſo wuͤrde es ſchwerrer ſeyn/ denn Sand
am Meer.
Hier iſt niemand GOTT zu lieb: dann
das war Koͤnig David/ ein Mann nach dem Her-
tzen GOttes/ gleichwol ſpricht er: Es hat mich
an David/ vnd an all ſein Leyden.
Hier iſt niemand zu Außerwehlt: So
bald Chriſtus den Apoſtel Paulum/ damals Sau-
lum/ ſeinen Außerwehlten Ruͤſt-Zeug nennet/
ſo bald ſetzt Er hin zu: Ich wil jhm zeygen: wie
viel er leyden muß/ vmb meines Namens willen.
Hier iſt niemand zu Heylig: Wer war
Heyliger/ alß der Aller Heyligſte Heyland aller
Menſchen/ Der auch vns heyliget/ in ſeiner War-
heit? Dennoch muß Er durch Leyden inn ſeine
Herrligkeit eingehen.
Hier iſt niemand zu Gerecht. Dann
auch der Gerechte muß viel Leyden.
Hier iſt niemand zu Gottſelig. Dann
auch alle die Gottſelig leben wollen/ muͤſſen Ver-
folgung Leyden.
Wann wir nun nicht deſſen verſichert
weren: daß der HERR zu ſeiner Zeit/ Gerech-
tigkeit vnnd Gericht ſchaffte/ allen die Vnrecht
Leyden.
Wann wir nicht deſſen verſichert we-
ren: daß wo man Leydet/ in deß HERREN
Furcht/ da ſey/ Reichthumb/ Ehre vnd Leben.
Wann wir nicht deſſen verſichert we-
nes Volcks/ vnd jhr Seufftzen hoͤret.
Wann wir nicht deſſen verſichert we-
ren: daß dieſer Zeit Leyden der Herrligkeit
nicht werth ſey/ die an vns ſol offenbaret werden.
Wann wir nicht deſſen verſichert we-
ren: daß wie wir deß Leydens theylhafftigſeyn/
ſo ſeind wir auch deß Troſtes theylhafftig.
Wann wir nicht deſſen verſichert we-
ren: daß wir Leyden: nicht alß Moͤrder/ alß
Diebe/ alß Vbelthaͤter/ oder die inn Frembde
Aembter greiffen/ Sondern alß Chriſten: Mit
Chriſto: Mit dem Evangelio: Alß gutte Strei-
ter Jeſu Chriſti: Wo wolten wir hin? Was
wolten wir angeben? Wie wolten wirs
außſtehen?
Weil wir aber nicht laugnen/ daß es auch
von vns heiſt/ wie der Prophet ſaget: Ephraim:
Deutſchland: Schleſien/ leydet Gewalt/ vnnd
wird geplagt/ daran geſchicht jhm recht. Ja weil
wir alle bekennen muͤſſen: Wir haben diß Ley-
den wol verdienet/ darumb/ daß wir vns an vn-
ſrem GOTT verſuͤndiget haben: Wir leyden
vmb vnſerer Suͤnde willen/ das iſt war. Vnnd
gleichwol kein rechtes Erkendtnuͤß/ vielweniger/
rechtſchaffene Buſſe erfolget/ ſo fuͤrcht ich/ daß vns
Haupt-Straffen/ Krieg vnd Peſtilentz/ auch zu-
gleich/ die Dritte/ ins Land ſenden werde/ nemb-
lich den vnleydlichen Hunger. Wir haben Krieg
gelitten: Wir haben Peſtilentz gelitten: Aber in
gemein/ haben wir noch nicht Hunger gelitten/
Ich fuͤrcht/ aus vielen Vmbſtaͤnden/ wir werden
dieſe grauſame Straffe auch leyden muͤſſen.
Fuͤr Zwey Tagen/ hat mich ein Vertrauter
Freund/ aus dem Loͤwenbergiſchen Weichbilde/
Schrifftlich berichtet: daß ſich daſelbſt der Hun-
ger/ bey vielen Armen Leuthen/ dermaſſen maͤch-
tig ereygne/ daß ſchon etzliche aus Verzweiffelung/
jhre eygene Moͤrder worden. Eine Mutter traͤgt
vnlaͤngſt/ jhr leiblich Kind/ an den Bober/ wirfft
es ins Waſſer/ vnd ſpringt hernach/ ſie wird zwar
errettet/ aber das Kind/ hat man Todt herauß ge-
zogen. Ein Alter Mann/ weil er keine fernere
Lebenß-Mittel/ auch keinen Erwerb fuͤr ſich ſihet/
Erhenckt ſich ſelbeſt. Viel andere lauffen in die
Berge/ Waͤlder/ vnnd Felder/ ſuchen Wurtzeln
vnnd Kraͤuter/ den groſſen Hunger zudaͤmpffen.
Ach warhafftig:
Ich fuͤrchte/ wir haben die Zeit erlebet:
davon der Prophet Ezechiel ſaget: Das Ende
kompt/ das Ende/ vber alle Vier Gerter deß
gluͤck vber das ander/ das Ende kompt/ es kompt
das Ende. Der Tyrann hat ſich auff gemachet/
zur Rutten vber die Gottloſen/ daß nichts von jh-
nen/ noch von jhrem Volck/ noch von jhrem Hauf-
fen/ Troſt haben wird. Auff den Gaſſen/ gehet
das Schwerdt/ inn den Haͤuſern gehet Peſtilentz
vnnd Hunger. Wer auff dem Felde iſt/ der wird
vom Schwerdt ſterben/ wer in der Stadt iſt/ den
wird Peſtilentz vnnd Hunger freſſen. Welche
aber vnter jhnen entrinnen/ die muͤſſen auff den
Gebuͤrgen ſein/ wie die Tauben in Gruͤnden/ die
alle vnter einander kuͤrren/ ein jeglicher vmb ſei-
ner Miſſethat willen.
Ich fůrchte/ wir haben die Zeit erlebet:
da die er zuͤrnete Goͤttliche Mayeſtaͤt/ auch an den
Verſtockten Deutſchen erfuͤllen wil/ was Er ſei-
nen Juden durch den Propheten Jeremiam dreu-
et: Wann gleich Moſe vnd Samuel fuͤr mir ſtuͤn-
den/ ſo habe ich doch kein Hertz zu dieſem Volck/
treibe ſie weg von mir/ vnnd laß ſie hinfahren.
Wehn der Todt trifft/ den treffe er: Wehn das
Schwerdt trifft/ den treffe es: Wehn der Hun-
ger trifft/ den treffe er: Wehn das Gefaͤngnuͤß
trifft/ den treffe es. Dann Ich habe meinen
Friede von dieſem Volcke weggenommen/
Das ſind ſchroͤckliche Worte!
Ich fuͤrchte/ wir haben die Zeit erlebet:
da GOTT erfuͤllen wil/ was Er dem Juͤdiſchen
Lande/ durch den Propheten Ezechielem dreuet:
Nemblich/ ER wolle den Vorrath deß Brodts
wegnehmen/ vnd ſeine Vier boͤſe Straffen hienein
ſchicken: Schwert/ Hunger/ boͤſe Thiere/ vnnd
Peſtilentz/ dadurch wolle Er Menſchen vnd Viehe
außrotten/ Mit ſolchem Grimm vnnd Eyfer:
daß wann gleich die Drey Maͤnner/ Noha/ Da-
niel/ vnd Hiob/ drinnen weren/ ſolten ſie doch/ ſo
war der HERR lebe/ weder Soͤhne noch Toͤchter
erretten/ Sondern allein ſich ſelbſt/ vnnd das
Land muͤſte Gede werden.
Ach wie Selig war der liebe David/
da er vnter den Drey Haupt-Straffen GOttes/
außleſen durffte/ vnd nicht mehr/ als Eine. Er
laß jhm bald die Peſtilentz auß: Laß vns inn die
Hand deß HERREN fallen/ (ſagt er) denn
ſeine Barmhertzigkeit iſt groß/ ich wil nicht/ inn
der Menſchen Haͤnde fallen. Wer wolte hier
nicht dem Koͤnige David nachfolgen? duͤrfften
wir nur außleſen/ wir wolten vns nicht lange be-
dencken. Dann ob gleich die Peſtilentz auch eine
ſchroͤckliche Straffe GOTTES iſt/ heiſt ſie doch
REN fallen. Ein Kind/ das nur faͤllt/ in die
Hand ſeines Vaters/ in die Hand ſeiner Mutter/
das faͤllt nicht ſchaͤdlich: Alſo: fallen nur Fro-
me Chriſten/ durch die Peſt/ inn die Handt jhres
GOTTES/ ſo hats keinen Kummer. Aber wer
darff außleſen/ wann GOTT ſo vberauß hoch er-
zuͤrnet iſt?
Da heiſts: Ich wil Schwert/ Hun-
ger/ vnnd Peſtilentz/ vnter ſie ſchicken/ biß ſie
vmbkommen/ von dem Lande/ das ich jhnen/ vnd
jhren Vaͤtern/ gegeben habe.
Da heiſts: Ich wil Schwert/ Hun-
ger/ vnd Peſtilentz/ vnter ſie ſchicken/ vnnd wil
mit jhnen vmbgehen/ wie mit den boͤſen Feygen/
dafuͤr einem eckelt zueſſen.
Da heiſts: Ich wil hinter jhnen her ſein/
mit Schwert/ Hunger/ vnd Peſtilentz/ vnd
wil ſie in keinem Koͤnigreich auff Erden/ bleiben
laſſen.
Da heiſts: Ich wil die Einwohner in E-
gypten/ mit dem Schwert/ Hunger vnnd Pe-
ſtilentz heimſuchen/ gleich wie ich zu Jeruſalem
gethan habe.
Da heiſts: Wer ferne iſt/ wird an der
Peſtilentz ſterben/ wer nahe iſt/ wird durch das
darfuͤr behuͤttet iſt/ wird Hungers ſterben.
Da ſchreyet GOTT ſelbſt: Wehe/ vber
alle Grewel der Boßheit/ im Hauſe Iſrael/ dar-
umb ſie durchs Schwert/ Hunger/ vnnd Pe-
ſtilentz/ fallen muͤſſen.
Da Vrtheylet GOTT ſelbſt: Sie ſol-
len ſterben/ durch Schwert/ Hunger vnd Pe-
ſtilentz/ vnd ſol keiner vbrig bleiben/ noch entrin-
nen/ dem Vbel/ das ich vber ſie wil kommen laſſen.
Da zeyget GOTT ſelbſt die Vrſache/
ſolcher Straffe: Ihr wolt der Stimme deß
HERREN/ eures GOTTES nicht gehorchen/
ſo ſolt jhr nu wiſſen/ daß jhr durchs Schwert/
Hunger/ vnd Peſtilentz/ ſterben muͤſſet/ an dem
Orth/ dahin jhr gedenckt zuziehen/ daß jhr daſelbſt
wohnen wollet.
Da verbeuth GOTT ſelbeſt alle Vor-
bitt: Du ſolt nicht/ fuͤr diß Volck/ vmb Gnade
bitten/ dann ob ſie gleich Faſten/ ſo wil ich doch jhr
Flehen nicht hoͤren/ Sondern ich wil ſie mit dem
Schwert/ Hunger vnd Peſtilentz/ auffreiben.
Drumb hats auch bißher/ von mancher
vornehmen Reichß-Stadt geheiſſen: Dieſe
Stadt iſt belaͤgert/ daß ſie gewonnen/ vnnd fuͤr
Schwert/ Hunger vnnd Peſtilentz/ inn der
werden muß.
Warumb aber/ der Frome GOTT/ der
doch ein Liebhaber deß Lebens iſt/ vnnd Luſt hat
zum Leben/ Dergleichen Vngluͤck/ vber ſein
Volck verhaͤnge? duͤrffen wir gar nicht fragen.
Der Prophet Ezechiel/ hats auffs kuͤrtzte zuſam-
men gefaſſet/ wenn er ſpricht: ER hat ſie offt
gezuͤchtiget/ was hats geholffen? Dieſen
Text erklaͤret vns niemand beſſer/ alß vnſer eygen
Gewiſſen/ wann wir ein klein wenig zuruͤck ge-
dencken.
Wie Schroͤcklich hat vns GOTT ge-
zůchtiget/ durch das Verfluchte Muͤntz-We-
ſen: Wie viel Redliche Leuthe/ wurden hierdurch
auff einmal/ vmb alle das jhrige bracht/ mit Weib
vnd Kind/ in Bettelſtab gedrungen: da die Geitz-
haͤlſe/ ein Hauß an das ander zogen/ einen Acker
zum andern/ alß wolten ſie allein das Land beſi-
tzen/ vnd den alten poſseſsoribus, keinen Raum
laſſen. Was hats geholffen?
Wie offt hat vns GOtt gezuͤchtiget/ mit
den vielfaltigen Durch-Zuͤgen/ der vnter-
ſchiedenen Kriegß- Armeen: Wañ der HErr
ſein Schwert hieß durchs Land fahren/ Nemblich/
ein bitter vnd ſchnell Volck/ welches zohe/ ſo weit
ſein waren/ welches geboth vnnd zwang/ wie es
ſelbſt wolte/ zohen mit groſſem Hauffen von ferne
daher/ alß floͤhen ſie/ wie die Adler eylen zum Aß.
Kamen alleſampt/ daß ſie Schaden theten: wo ſie
hin wolten/ rieſſen ſie hindurch/ wie ein Oſtwind:
Spotteten der Koͤnige/ vnnd lachten der Fuͤrſten.
Was hats geholffen?
Wie offt hat vns GOTT gezuͤchtiget/
durch die ſchweren Guarniſo nen/ vnnd lang-
wierigen Einquartierungen? Wann ER
vber vns ein Volck von ferne brachte/ ein Maͤchtig
Volck: deß Sprachen wir nicht verſtunden/ vnnd
nicht vernehmen kundten/ was ſie redeten. Die
vnſere Erndte/ vnd vnſer Brodt verzehreten/ die
vnſre Schaffe vnd Rinder verſchlungen/ die vnſre
Soͤhne vnd Toͤchter fraſſen. Die Taͤglich trach-
teten Schaden zuthun/ vnnd giengen mit boͤſen
Tuͤcken vmb/ auff jhrem Lager/ daß ſie es Fruͤh/
wanns lichte wuͤrde/ volbraͤchten/ weil ſie die Macht
hatten. Sie rieſſen zu ſich Ecker/ vnd nahmen
Haͤuſer/ welche ſie geluͤſtet. Alſo trieben ſie Ge-
walt/ mit eines jeden Hauſe/ vnnd mit eines jeden
Erbe. Was dieſes fuͤr ein Schweres Leben ſey/
wann man ſo lange/ vnd auff eine ſolche Arth/ muß
den Gottloſen/ Taͤglich fuͤr jhm ſehen? kan kein
hats geholffen?
Wie offt hat vns GOTT gezůchtiget/
durch die allgemeinen Pluͤnderungen? Wañ
Er vnſre Guͤtter vnnd Schaͤtze/ auff einmal in die
Rappuſe gab/ daß wir nichts darfuͤr wieder kriege-
ten. Wann es hieſſe: Was die Raupen laſſen/
das freſſen die Hewſchrecken: Was die Hewſchre-
cken laſſen/ das freſſen die Kefer: Was die Kefer
laſſen/ das friſt das Geſchmeiſſe: Was ein Teuffel
laͤßt/ das friſt der ander. Wann es hieſſe/
deß Nachts im beſten Schlaffe: Stehe auff/ nihm
deine Kinder/ vnd jhre Mutter zu dir/ vnd Fleuch/
in die Waͤlder vnd Felder/ in die Berge/ Puͤſche/
vnnd Steinkluͤffte. Dann die vns jagen/ legen
ſich nicht ſchlaffen. Ach/ wie offt hat GOTT/
das Land Schleſten vbergeben den Pluͤnderern/
vnd ſeine Einwohner den Raubern/ die vns nichts
vberlaſſen haben: Nicht das geringſte Getreyde in
Scheunen: Nicht das geringſte Viehe inn Staͤl-
len: Nicht das geringſte Kleid im Kaſten: Nicht
den geringſten Heller im Beutel: Nicht den ge-
ringſten Biſſen Brod im Hauſe. Was hats
geholffen?
Wie offt hat vns GOTT gezůchtiget/
durch die grauſame Peſtilentz: Wie viel Vor-
in weniger Zeit/ aller jhr Einwohner beraubet/
in jhrer Anbawung verhindert/ vnd dannenhero/
in die abſcheulichſte Ruin verſencket: Nach dem
traurigen Vorbilde deß Juͤdiſchen Landes/ davon
der Prophet Jeremias ſaget: Ich ſahe/ vnd ſihe/
da war kein Menſch mehr/ vnnd alle Vogel vnter
dem Himmel waren weggeflohen. Ich ſahe/ vnd
ſihe/ das Baw-Feld war eine Wuͤſten/ vnnd alle
Staͤdte darinnen/ waren zerbrochen/ fuͤr dem
HERRN/ vnd ſeinem grimmigen Zorn. Ach
wie offte ſind wir bey dieſer Seuche/ in eußerſter
Gefahr geweſen: Wie offte haben wir vns deß
Lebens verziehen/ vnnd beſchloſſen: Wir muͤſten
ſterben. Aber/ GOTT hat vns allemahl vnſere
Seele auffs neue/ zur Beuthe gegeben/ daß wir
waren wie ein Brand/ der aus dem Feuer geriſ-
ſen wird. Was hats geholffen?
Alß auff eine Zeit/ die Cron Franckreich
von den Engellaͤndern/ ſtarck bekrieget ward/
kam zu dem damals Regierenden Koͤnige Carolo,
dem Siebenden diß Namens/ ein Vornehmer O-
briſter/ aus dem Frantzoͤſiſchen Lager/ allerhand
Munition vnd Proviant ab zuholen/ Wie auch dem
Koͤnige/ den gefaͤhrlichen Zuſtandt der Armee,
außfuͤhrlich zueroͤffnen. Nach dem er aber etzli-
kan/ durch was fuͤr Hochwichtige Angelegenheit/
beym Koͤnige/ ſeine nothwendige Expedition/ ſo
lange hinter zo gen wuͤrde: Findet er zuletzt den
Koͤnig/ im Frauenzimmer/ vber die maſſen occu-
pat/ vnd Vnmuͤßig: Nicht aber/ in Koͤniglichen
Reichß-Geſchaͤfften/ Sondern/ im Tantzen/
Springen/ Buhlen/ Sauffen/ vnnd allerhandt
vppiger/ ſchaͤndlicher Wolluſt. So bald jhn der
Koͤnig ſihet/ fraget er jhn: Ob diß nicht/ ein herr-
liches/ ſtattliches Leben ſey? Der Oberſte ant-
wortet mit betruͤbtem Gemuͤtte: Non memini
me vidisſe ullum alium Principem, majori
pompâ & tripudio pereuntem: Ich weiß mich
nicht zuerjnnern/ daß ich jemals/ ſo einen ſtattli-
chen Fuͤrſten/ Praͤchtiger/ Luſtiger/ vnnd Froͤli-
cher/ habe ſchen zu grunde gehen/ alß ich hier ſehe.
Nicht im wenigſten anders/ gehets jetzund
vnter vns her/ der Mayeſtaͤtiſche Koͤnig von Zion/
hat nun vber Vier vnd Zwantzig Jahr/ wider vns
einen ſo Grauſamen Bluttigen Krieg gefuͤhret/
wir ſehen nichts/ alß lauter Schmehlich Sterben
vnd Verterben Taͤglich fuͤr vnſern Augen/ Den-
noch/ iſt der groͤſte Hauffen in der ſchaͤndlichen Si-
cherheit/ dermaſſen erſoffen/ daß gleichwol jeder-
man/ mit jenem Epicurer/ alle Tage herrlich vnd
in der Brunſt/ Schreyen mit vollem Halſe: Laſ-
ſet vns wol Leben/ weils da iſt. Laſſet vns Eſſen
vnd Trincken/ wir Sterben doch Morgen.
Da wir hingegen/ Tag vnnd Nacht/ ſolten
auff vnſren Knien/ auff vnſeren Angeſichtern lie-
gen/ vnd ohn Ende/ ohn Auffhoͤren/ zu GOTT
ſchreyen: HERR ſchone deines Volcks/ vnd laß
dein Erbtheyl nicht zu ſchanden werden/ warumb
wiltu laſſen vnter den Voͤlckern ſagen: Wo iſt nun
jhr GOTT?
Aber/ diß/ ſag ich/ geſchiehet nicht/ GOTT
ſchlaͤget vns/ wir fuͤhlens nicht: ER plaget vns/
wir beſſern vns nicht/ wir haben ein haͤrter Ange-
ſichte alß ein Felß/ vnnd wollen vns nicht bekeh-
ren. Wie? Ein haͤrter Angeſicht alß ein Felß?
Freylich. Dann Moſes ſchlug nur mit einem
Stabe auff den Felß/ flugß gab er Waſſer. Wie
mit viel Staͤben/ hat bißher der Verechte GOTT
auff vns geſchlagen? Wer leſt ſein Augen-Waſſer
fliſſen? Wer vergeuſt ſeine Buß-Thraͤnen? Es
bleibt nur/ bey vorigem Außſpruche: ER hat ſie
offt gezuͤchtiget/ was hats geholffen? Wann dann
der boͤſen Kinder Rutte nicht helffen wil: Was
iſts Wunder? daß vns GOTT auch nicht helf-
fen wiel/ durch Bogen/ Schwerdt/ Streit-Roſſe/
oder Reutter.
verterben/ ohn alle Hůlffe.
Was iſts Wunder? daß vnſer Hertz
mit Vngluͤck geplaget wird/ daß wir da liegen/ vñ
vns niemand hilfft.
Was iſts Wunder? daß vns niemand
kan helffen/ noch vnſre Wunden heylen.
Was iſts Wunder? daß auch der jenige/
der vns gerne hůlffe/ ſagen muß: Hilfft der
HERR nicht/ woher ſol ich helffen?
Was iſts Wunder? daß den Treueſten
Regenten bange iſt/ daß ſie kaum Achem holen/
vnd koͤnnen doch dem Lande nicht helffen.
Was iſts Wunder? daß es von einem
Jahr zum andern heiſt: Die Erndte iſt vergan-
gen/ der Sommer iſt dahin/ vnnd vns iſt keine
Huͤlffe kommen.
Was iſts Wunder? daß wir Taͤglich
klagen muͤſſen: Wir haben nirgend keine Huͤlffe/
vnd vnſer Vermoͤgen iſt weg. Wie lange HErr/
ſollen wir ruffen/ vber Frevel/ vnd Du wilſt nicht
helffen?
Was iſts Wunder? daß jhrer viel ſa-
gen/ von vnſerer Seelen/ ſie hat keine Huͤlffe bey
GOTT/ vnd gienge wol hin/ daß es viel/ nemlich
andere ſagten: wann es nur nicht vnſer eygen
ſagte.
Was iſts Wunder? daß vnſer Seuff-
tzen noch nicht hafften wil/ wann wir Tag vnnd
Nacht ſchreyen: Ach daß die Huͤlffe aus Zion/
vber Iſrael kaͤme/ vnd der HERR ſein Gefan-
gen Volck erloͤſete/ ſo wuͤrde Jacob Froͤlich ſeyn/
vnd Iſrael ſich frewen. Ach daß die Huͤlffe vnſ-
res GOTTES vom Himmel/ vber das Arme
Evangeliſche Iſrael kaͤhme/ vnnd der HERR
ſein Gefangenes Haͤufflein/ aus ſeiner Schweren
Dienſtbarkeit erloͤſete: ſo wuͤrde ohne Zweyffel
gantz Deutſchland Froͤlich ſein/ alle Menſchen
wuͤrden ſich frewen.
Was iſts Wunder? daß wir Taͤglich/
die aͤngſtlichen Trauer-Worte widerholen: HErr
Hilff vns/ wir verterben. Mache Dich auff/
Hilff vns/ vnd erloͤſe vns/ vmb deiner Guͤtte wil-
len. Hilff vns GOTT/ vnſer Helffer/ vmb
deines Namens Ehre willen. Hilff vns von vn-
ſern Verfolgern. Hilff vns/ aus dem Rachen
der Loͤwen. Hilff vns von den Bluttgierigen.
Hilff vns aus der Hand der Gottloſen. Hilff
vns mit deiner Rechten. Hilff vns nach deiner
Gnade. Hilff vns HERR vnſer GOTT/ vnd
bring vns zuſammen. GOTT hilff vns/ das
Waſſer geht vns biß an die Seele.
ſam/ die Goͤttliche Mayeſtaͤt/ an eine gewiſſe Zeit/
wann Sie Helffen wolle. Nemblich: Wann
die Elenden Verſtoͤret werden/ vnd die Ar-
men Seufftzen: Da wil Ich auff/ ſpricht der
HERR/ Ich wil eine Huͤlffe ſchaffen/ daß man
getroſt Lehren ſol.
Ach wie viel Jahr/ ſind ſchon wir Armen/
Elenden Chriſten Verſtoͤret worden: Wie ſind
wir ſo gar Verſtoͤret/ vnd zu Schanden worden/
Wir muͤſſen vnſer Land reumen/ denn viel vnſer
Wohnungen ſeind Geſchleiffet. Deß Nachts
kompt Verſtoͤrung vber Ar/ inn Moab: deß
Nachts kompt Verſtoͤrung/ vber Kir/ ꝛc. Vber
vns/ vnd alle das vnſrige. Ja der Verſtoͤrer
zeucht noch daher/ daß er vnſer Land verwuͤſte/
vnd vnſere Staͤdte außbrenne/ daß niemand drin-
nen wohnet. Die Verſtoͤrer fahren daher/ vber
alle Huͤgel der Wuͤſten/ vnd das freſſende Schwert
deß HERREN/ von einem Ende deß Landes/
biß zum andern Ende. Kurtz/ da iſt nichts/ alß
Verſtoͤrung/ Schaden/ Hunger vnnd Schwert.
Wir muͤſſen weg fuͤr dem Verſtoͤrer. Dann vn-
ſere Haͤuſer werden ſchaͤndlich Verſtoͤret. Da
es dann nicht allemal die Gottloſen trifft/ von de-
nen der Prophet ſaget: Eſau/ vnd ſein Saame/
ret/ daß jhr keiner mehr da iſt: Sondern es
trifft auch Frome Leuthe/ wie von jenem Maͤchti-
gen Koͤnige ſtehet: daß er die Heyligen deß Hoͤch-
ſten Verſtoͤren werde.
Wie viel Tauſendt Bedraͤngte Chriſten
Seufftzen/ daß jhnen die Lenden Wehe thun.
Wie viel koͤnnen jhre Troͤſter/ jhre Evangeliſche
Prediger nicht hoͤren/ fuͤr Seufftzen vnd Angſt.
Wann ich Eſſen ſol/ muß ich Seufftzen/ klaget
manche bedraͤngte Seele/ mit Hiob. Mein Ge-
bein klebet an meinem Fleiſch/ fuͤr Heulen vnnd
Seufftzen/ klagt mancher/ mit dem Koͤnige Da-
vid. Alle die vorhin von Hertzen Froͤlich waren/
Seufftzen jetzund. Wir Seufftzen vns Muͤ-
de/ vnd finden keine Ruhe. Man hoͤret wol/ daß
wir Seufftzen/ vnnd haben doch keinen Troͤſter.
Die Verlaͤhmten Seufftzen. Die Verwund-
ten Seufftzen. Die Jungfrawen Seufftzen.
Fuͤr dem Altar iſt eytel Seufftzen. Alle Gaſ-
ſen ſeind voller Seufftzen. O wie Seufftzet
das Vieh. Vnnd diß vnſer Seufftzen/ iſt fuͤr
GOTT nicht verborgen. Er laͤſſet fuͤrſich kom-
men das Seufftzen der Gefangenen. Gleich-
wol hat ER bißher die verſprochene Huͤlffe nicht
ſchaffen wollen.
daß vns Gott bißher ſo offt gezuͤchtiget/ vnnd hat
nichts geholffen. Wann dann/ wie gemeldt/
der boͤſen Kinder Rutte/ bey vns nichts hat helffen
wollen/ darumb muͤſſen wir wider auff GOT-
TES Hůlffe/ von einer Zeit zur andern/ verge-
blich harren/ vnd in der That erfahren/ was Koͤ-
nig Salomon ſaget: Wer wider die Straffe halß-
ſtarrig iſt/ der wird ploͤtzlich v[erd]erben/ ohn alle
Hůlffe.
Was wollen wir nun thun/ am Tage dieſer
ſchroͤcklichen Heimſuchung/ vnnd deß groſſen Vn-
gluͤcks/ das nicht nur von ferne kompt/ Sondern
vns/ alß eine Suͤndflutt/ alhereit vberſchwaͤmmet
hat? zu wehm wollen wir fliehen vmb Huͤlffe?
Ach daß wir die froͤliche Antwort hoͤren ſolten/ die
Saul den Bedraͤngten Buͤrgern/ zu Jabes in Gi-
lead ſagen ließ: Morgen ſol euch Huͤlffe geſche-
hen. Wo wolten wir hin/ fuͤr Frewden? Wann
ſichs gleichetwas laͤnger/ alß Morgen vnnd vber
Morgen verziehen ſolte.
Weil es aber heiſſet: Menſchen-Huͤlffe/ iſt
kein nuͤtze; Auch die Heylige Schrifft/ den Kin-
dern Iſrael/ einen harten Verweiß thut/ daß ſie
nicht glaͤubten an GOTT/ vnd hofften nicht auff
ſeine Hůlffe: So wenden wir vns billich zu
geſchicht. Er wird vnſere Hůlffe vnnd Schildt
ſein. Bey dem HERREN findet man Hůlffe.
Ja/ Er ſpricht ſelbſt: Ich bin deine Huͤlffe.
Hierbey aber/ erſchrecket mich gleichwol
nicht wenig/ die grauſame Antwort/ die dieſer Ge-
rechte HERR/ ſeinem Volck Iſrael gab/ da ſie
gantzer Achtzehen Jahr/ von den Philiſtern be-
draͤnget waren/ vnd in ſolcher Noth/ jhren GOtt
embſig vmb ſeine Huͤlffe bathen: Ich wil euch
nicht mehr helffen/ ſaget ER/ gehet hin/
ſchreyet eure Goͤtter an/ die jhr erwehlet
habt/ laſſet euch dieſelbigen helffen/ zur Zeit
eures Truͤbſals.
Ach wolte GOTT/ daß wir Verſtockten
Deutſchen/ nicht mit ſehenden Augen Blindt we-
ren/ wir wuͤrden Handgreifflich befinden/ daß e-
ben jetzund der Erzuͤrnte GOTT/ mit den Be-
draͤngten Staͤnden deß Roͤmiſchen Reichß/ wie
auch mit vns an dieſem Orth/ warhafftig wuͤrck-
lich alſo redet: Ich wil euch nicht mehr Helf-
fen/ gehet hin/ ꝛc. Wuͤrcklich/ ſag ich/ redet die
Goͤttliche Mayeſtaͤt/ alſo/ in die etzliche Zwantzig
Jahr/ mit vns Vnbußfertigen Leuthen/ wer es
nicht hoͤret/ wer es nicht empfindet/ muß gewieß
Taub/ Verſtockt/ Raſend/ vnnd Vnſinnig heiſſen.
Reichß-Conventus, ſo Vornehme Zuſammen-
kunfften anſtellet/ viel Tonnen Goldes verzehret/
vnnd gleichwol da keine rechte Zuſammenſetzung
der Gemuͤtter erfolgen wil/ Sondern ſich aller-
hand heimliche Simultates, Mißgunſt/ Zwytracht
vnnd dergleichen ereygnet? Saget GOTT
nicht hier wuͤrcklich: Ich wil euch nicht mehr
Helffen?
Was iſt diß? Wann man ſich von einer
Zeit zur andern/ auff einen gewuͤnſchten Frieden
vertroͤſtet/ es wird auffs beweglichſte/ auffs vmb-
ſtaͤndlichſte betheuret/ wie ſich die Tractaten ſo
wol/ ſo erfrewlich anlaſſen/ wie Willig/ wie Ge-
neigt/ jedes Theyl/ zum Frieden ſey. Wann es
aber darzukompt/ vnd jederman ſagt: Nuwirds
gutt werden; Zerſchlaͤget ſich alles/ in einem Au-
genblick; Saget GOTT nicht hier wuͤrck-
lich: Ich wil euch nicht mehr Helffen?
Was iſt diß? Wann ein ſchoͤn Land nach
dem andern/ totaliter Verwuͤſtet/ Außgepluͤn-
dert/ vnd dermaſſen enerviret wird/ daß alle Le-
benß-Mittel zu Grunde gehen/ daß die Menſchen
fuͤr groſſem vnaußſprechlichem Hunger/ einander
ſelbſt aufffreſſen muͤſſen? Saget GOtt nicht
hier wuͤrcklich: Ich wil euch nicht mehr
Helffen?
Affection, keine Liebe/ keineVertreuligkeit mehr
vnter den Menſchen regieret; Sondern lauter
Beſtialiſcher Grimm/ lauter Teuffliſcher Haß/
lauter abſcheuliche Feindſeligkeit/ aͤrger/ alß vn-
ter Barbariſchen Tuͤrcken vnnd Heyden. Da
man einander nicht das Leben/ nicht die Lufft/
nicht den geringſten Biſſen im Munde goͤnnet.
Saget GOTT nicht hier wuͤrcklich: Ich
wil euch nicht mehr Helffen?
Was iſt diß? Wann die Leichnam der
Knechte GOTTES/ den Vogeln vnter dem
Himel zu freſſen gegeben werden/ vnd das Fleiſch
ſeiner Heyligen/ den Thieren im Lande. Wann
Chriſten-Blutt von Chriſten vergoſſen wird/ alß
were es Staub/ vnnd jhr Leib/ alß were er Koth.
Wann das Volck iſt/ wie Speiſe deß Feuers/ da
kein Menſch deß andern ſchonet. Da es dem
Prieſter gehet/ wie dem Volck/ dem Herren wie
dem Knecht/ der Frawen/ wie der Magd/ dem
Verkauffer wie dem Kauffer/ dem Leyher wie
dem Borger/ dem Mahnenden wie dem Schuldi-
ger. Saget GOTT nicht hier wůrcklich:
Ich wil euch nicht mehr helffen?
Was iſt diß? Wann man ſo viel Beth-
Stunden anſtellet/ einen Buß-Tag nach deman-
Reich vnd Arm/ Tag vnd Nacht zu GOTT vmb
Huͤlffe/ vnnd Errettung ſchreyet/ vnnd die Noth
nicht ab-Sondern alle Jahr/ alle Monath/ alle
Wochen/ alle Stunden/ ja alle Augenblick zunim-
met/ vnd groͤſſer wird. Saget GOTT nicht
hier wůrcklich: Ich wil euch nicht mehr
Helffen?
Was iſt diß? Wann vnter den Schroͤck-
lichſten Plagen vnd Straffen GOTTES/ auch
die Erſchroͤcklichſten Laſter/ ohneRew vnd Schew
Taͤglich veruͤbet werden/ da ſich faſt niemand mehr
den Geiſt GOTTES/ wil regieren laſſen. Da
die Welt je laͤnger je aͤrger/ je laͤnger je Sicherer/
je laͤnger je Verſtockter wird: Alß wann kein
GOTT im Himmel/ kein Teuffel in der Helle/
vnd kein Juͤngſtes Gericht zufuͤrchten were. Fuͤr
welcher vbermachten Boßheit/ die Allerheyligſte
Gerechtigkeit GOTTES/ anders nichts thun
kan/ alß Straffen/ Vertilgen/ Außrotten/ vnnd
zu nichte machen; Nach dero eigenem Außſpruch:
Wie ſol Ich dir Genaͤdig ſeyn/ weil du Verſtockt
bleibeſt/ in deinem Vngehorſamb? Sagt GOtt
nicht hier wuͤrcklich: Ich wil euch nicht
mehr Helffen?
Dieſe Boͤſe Zeit nun/ ſag ich/ bewegt ja bil-
er ſeiner Liebſten/ jhre erlangte Ruhe/ von hertzen
goͤnnet/ Ja daß er Ihr/ zu dieſer Seligen Erloͤ-
ſung/ von grund ſeiner Seelen/ Gratuliret.
Wer wolte den Geplagten Loth be-
weinet haben/ da er durch die Engel/ aus Sodo-
ma gefuͤhret ward?
Wer wolte die Drey Maͤnner zu Ba-
bel beweinet haben/ da ſie der Koͤnig Nebucad-
nezar/ aus dem Brennenden Ofen ruffte?
Wer wolte den Treuen Daniel bewei-
net haben/ da jhn der Koͤnig Darius/ aus ſeinem
LoͤwenGraben ziehen hieß?
Was iſt vnſer Land jetzund anders/ alß ein
rechtes Sodoma? da die Erſchroͤcklichſten
Suͤnden im Schwange gehen/ vnnd Taͤglich zu
GOTT in Himmel ſchreyen: Alß ein Brennen-
der Feuer-Ofen/ darinnen die armen Chriſten
biß auffs Blutt/ biß auffs Marck/ Gekocht/ vnnd
Gebraten werden: Alß ein tieffer LoͤwenGra-
ben/ darinnen die Verfolger/ manche Seele/ er-
haſchen/ vnd zureiſſen/ weil kein Erretter da iſt.
Wer wolte ſich dann nicht zufrieden geben/
wann der liebe GOTT die ſeinen/ aus ſolchem
Sodoma:*aus ſolcher Wilden Tyranney herauß
reiſſet.
den Juden/ nicht allein jhr Edles Land/ Sondern
auch jhr Heyligthumb/ den Schoͤnen Tempel zu
Jeruſalem/ in Grund wolte verwuͤſten/ vnnd be-
rauben laſſen/ nahm ER zuvor/ dem Propheten
Ezechiel/ ſeine Augen-Luſt/ ſein Ehweib/ durch
eine vnverſehene Plage/ durch einen Plotzen Tod.
Was diß dem Armen Propheten/ fuͤr ein
Hertzleyd muß geweſen ſein/ iſt dannenhero leicht
zu erachten/ daß ſie ſeine Augen-Luſt genennet
wird/ Nemblich ein ſolch Weib/ daran er Taͤglich
ſeine Freude vnd Luſt geſehen.
Weil aber hierauff das Juͤdiſche Land/ in ſo
vberauß groſſe Noth vnnd Gefahr/ gerathen ſolte/
Weil der Heylige Gotteß-Dienſt ſolte auff hoͤren/
ſo muß ſich der Prophet/ in Gedult zufrieden ge-
ben/ er darff nicht offentlich Weinen/ er darff kei-
ne Thraͤnen laſſen/ heimlich/ ſagt GOTT/ mag-
ſtu Seufftzen/ aber keine Todten-Klage fuͤhren.
Vnſerm Herren von Rothkirch/ hat
GOTT auch ſeine Treue Augen-Luſt ſterben laſ-
ſen; In Friedlichen Zeiten/ koͤndte ich jhm nicht
vbel deuten/ wann er gar viel hoͤher klagte/ Wei-
nete vnd betruͤbt were:
Aber/ Er ſtell jhm recht fuͤr Augen den
vberauß groſſen Jammer vnſeres Blutt-Armen
Vntergang/ gleichſamb in einem Seydenen Fa-
dem/ vber vnſerem Haupt hanget/ wie alles/ inn
allen Enden vnd Orthen/ verwuͤſtet wird/ Inſon-
derheit/ wie der Heylige Reine Gotteß-Dienſt/
bald da/ bald dort/ auff hoͤret; wie die Treuen Leh-
rer/ der die Welt nicht Werth iſt/ Taͤglich außge-
pluͤndert/ Verſtoͤret vnd Verjaget werden; Wie
ſie ſich in eußerſtem Hunger/ vnnd ſchmehlichem
Armutt/ jetzt in dieſem/ bald in einem andern ge-
ringen Winckel auff halten muͤſſen. Ja was wir
auff dieſe weiſe/ fuͤr eine abſcheuliche Barbariam,
inn wenig Jahren/ zugewarten haben/ nach deß
Hocherlauchten Koͤniges Salomonis Außſpruch:
Wann die Weiſſagung auß iſt/ wird das Volck
Wilde vnd Wuͤſte.
Wann Er diß nach allen Vmbſtaͤnden er-
wieget/ Er wird weder mein/ noch eines andern
Troſtes beduͤrffen/ Er wird gewiß/ mit dem Hey-
ligen David/ ſich ſelbſt anreden: Sey nu wider
zufrieden meine Seele/ denn der HERR thut
dir Gutts.
Sonderlich/ weil jhm GOTT ſeine Se-
lige Augen-Luſt genommen/ zwar durch eine Pla-
ge/ Nemblich/ durch den Todt/ aber nicht durch ei-
ne ſolche Plage/ dergleichen Er bey dieſen Vnſe-
gen hat.
Welch mancher Redlicher Mann hat
ſehen muͤſſen: Wie jhm ſein Treues liebes Ehweib
fuͤr ſeinen Augen/ zu tode Geſchaͤndet worden/ wie
jenem Prieſter/ in Duͤringen begegnete/ der noch
darzu Singen muͤſſen: Ach GOtt vom Himmel
ſih darein/ vnd laß dich das erbarmen!
Welch mancher Redlicher Mann hat
ſehen muͤſſen: Wie jhm die Tyrannen ſein liebes
Weib/ von der Seyten geriſſen/ vnnd mit Gewalt
davon gefuͤhret haben; Da noch wol das Arme
Weib/ inn jhrem Elende geſchryen: Ach lieber
Mann/ helffet mir! Erbarmet euch doch vber
mich/ vnd erloͤſet mich/ aus meiner groſſen Angſt
vnd Noth! Der arme Mann aber ſtehet da/ Ge-
fangen vnnd Gebunden/ kan keine Hand regen/
keinen Fuß fort ſetzen: Wie jenem Nobili inn
Meiſſen/ in der Kirchen begegnete/ der ſie Fuͤnff
Tage hernacher/ vnter einem Teich-Tamme Tod
gefunden/ alß ein dermaſſen erbaͤrmliches Specta-
cul/ daruͤber ſich Himmel vnnd Erden entſetzen
moͤgen.
Welch mancher Redlicher Mann hat
bey jetzigen Erſchrecklichen Zufuͤllen/ ſonſt ſeinen
Ehgatten vnverſehens verloren/ die er zwar fuͤr
doch nicht wieder finden koͤnnen/ wie Anno 1634.
einem Vornehmen Landſaſſen/ im Jauriſchen
Fuͤrſtenthumb begegnet: Anderer dergleichen
Exempel/ fuͤr dißmal zugeſchweigen.
Welch mancher Redlicher Mann/ hat
ſein liebes Weib/ auch wol alle ſeine liebe Kinder/
neben jhr/ durch die grauſame Peſt/ ſeinem GOtt
vberantworten muͤſſen/ vnd hat ſie noch wol muͤſſen
mit ſeinen eygenen Haͤnden begraben/ ohne Ge-
ſang vnd Klang/ auch nicht auff den Kirchhoff/ alß
den Ordentlichen Gotteß-Acker/ vielweniger/ in
ſeine Wolerbaute Grufft/ nur in einen Garten/ da
ſonſt Frome Chriſten/ in gemein/ nicht zuliegen
pflegen: Wie gar vielen Vornehmen Leuthen/
fuͤr wenig Jahren dieſer Orthe vielfaltig bege-
gnet iſt.
Welch mancher Redlicher Mann/ hat
Anno 1637. in Elſaß vnd Pommern/ ſein Aller-
treueſtes Ehehertz/ die er vorhin wie ſeine Seele
geliebet/ fuͤr groſſem Hunger/ mit eygenen Haͤn-
den erwuͤrget/ Geſchlachtet/ vnnd auffgefreſſen:
Derer Namen/ Stand vnnd Wohnung/ leyder
GOTT erbarm es/ inn offentlichem Druck ver-
handen.
Lob/ mein Geehrter Herr Gevatter/ keines
erfahren důrffen/ Er hat ſeinen Werthen Her-
tzenß-Schatz/ gar Sanfft vnd Selig/ auff jhrem
Bette Sterben ſehen. Ob es nun gleich auch
Schmertzlich iſt/ vnnd groß Betruͤbnuͤß vervrſa-
chet/ ſo iſts doch/ kegen dieſer erzehlter Armer Leu-
the Hertzeleid/ nichts zurechnen.
Der GOTT nun/ der jene getroͤſtet hat/
vnd durch ſein Wort auff gerichtet/ der wird Ihn
auch troͤſten/ vnnd Ihm ſeinen Heyligen Willen
dermaſſen zuerkennen geben/ daß Er deſſen Werck
wird ruͤhmen/ vnd ſagen muͤſſen: Deus omnia
bene fecit, GOTT hat alles Wol gemacht!
das Schoͤne Ehren-Zeugnuͤß/ welches ſei-
ne Hertzliebſte/ zu Ihrem Vnſterblichen
Ruhmb/ aller Welt hinterlaſſen hat.
Dann/ Sie iſt Wol-Adelich Geboren/
Chriſt-Tugendlich erzogen/ von GOTT
mit vielem Segen Begnadet/ in allem
außgeſtandenen Creutze kraͤfftig getroͤſtet/
vnd endlichSeelig von dieſemJammerthal
wiederumb abgefodert worden.
WolEdle vnd Geſtrenge Herꝛ Friedrich
von Mutſchlitz/ aus dem Hauſe Herꝛn-
Mutſchlitz/ im Wintziſchen Kreyß ge-
legen.
Ihres Herrn Vatern Fraw Mut-
ter/ eine Geborene Noſtitzin/ aus dem
Hauſe Sprottiſchendorff/ im Sprotti-
ſchen Kreyß gelegen.
Ihres Herren Vatern/ Vatern/
Fraw Mutter/ eine Geborene Haugwi-
tzin/ aus dem Hauſe Karangelwitz/ im
Wintziſchen Kreyß gelegen.
Ihres Herꝛen Vatern/ Fraw Mut-
ter Mutter/ eine Geborene Knobelß-
dorffin/ aus dem Hauſe Hirſchfeld/ im
Sagniſchen Kreyß gelegen.
Ihre Fraw Mutter iſt geweſen/ die
WolEdle/ VielEhrenTugendtreiche
Fraw Hedewigis/ Geborene Rothkir-
Jauriſchen Fuͤrſtenthumb gelegen.
Ihrer Fraw Mutter Mutter/ eine
Geborene Eichholtzin/ aus dem Hauſe
Schimmelwitz/ im Lignitſchen Fuͤrſten-
thumb gelegen.
Ihrer Fraw Mutter/ Herren Va-
tern Fraw Mutter/ eine Geborene Fal-
ckenhainin/ aus dem Hauſe Kleinkri-
chen/ im Lignitſchen Fuͤrſtenthumb ge-
legen.
Ihrer Fraw Mutter/ Mutter
Mutter/ eine Geborene Gefugin/ aus
dem Hauſe Liebenaw/ im Lignitſchen
Fuͤrſtenthumb gelegen.
Auß dieſen Vralten/ WolAdelichen
Geſchlechtern/ iſt nun die Selige Fraw
Rothkirchin/ auff dieſe Muͤheſelige Welt
Geboren/ im Jahr Chriſti 1593. den 6.
Tag Monats Martij; Auch alſo bald von
CHRISTO/ durch das Hochwuͤrdige
Sacrament der Heyligen Tauffe/ Ein-
verleibet worden. Da es auch mit Ihr
geheiſſen: Magnum eſt beneficium, in-
ter Chriſtianos naſci. Es iſt eine groſſe
Wolthat GOTTES/ vnter Chriſten
Geboren werden.
Dann/ ob gleich auch derer Kinder/
inn Suͤnden Empfangen vnnd Geboren
ſind/ werden ſie doch bald/ durch dieſes
Gnaden-Bad jhrem Heylande wieder ge-
boren/ wie der Thaw/ aus der Morgen-
Roͤthe.
Von der Apoſtoliſchen Kirche/ Neuen
Teſtaments/ ſaget Koͤnig David: Die
Philiſter vnd Syrer/ ſampt den Moren/
werden daſelbſt Geboren. Philiſter/
Syrer vnnd Moren ſind Heyden geweſen/
Alſo war vnſere ſelige Fraw Rothkirchin
ein Kind deß Zornes von Natur/ Frembde
Ja ohne GOTT. Aber in der Chriſtli-
chen Kirchen/ iſt ſie bald wieder Geboren/
nicht aus Vergaͤnglichem/ Sondern aus
Vnvergaͤnglichem Saamen/ Nemblich/
aus dem Lebendigen Worte GOTTES/
das Ewiglich bleibet.
Deſſen Sie ſich in Ihren Truͤbſalen/
offt kraͤfftig erjnnert/ Dann wiewol Ihr
der Frome GOTT/ bey Ihrem Chriſten-
thumb/ manch groſſes Creutze zugeſchickt/
hat ER jhr doch auch groſſe Gnade verlie-
hen/ daß Sie mit Job vnd Jeremia/ den
Tag Ihrer Geburt/ GOtt Lob/ niemals
Verfluchet hat: Sondern jmmer Geſun-
gen: Was mein GOTT wil/ das geſcheh
allzeit/ ſein Will der iſt der beſte.
Von Kindeß-Beinen an/ haben Sie
Ihre Eltern/ zu Wahrer Gotteß-Furcht/
Zucht/ vnd allen Chriſt-Adelichen/ Jung-
fraͤwlichen Tugenden/ mit allem Fleiß
in Kindlichem Gehorſamb/ durch GOT-
TES Segen/ ſo Gluͤckſelig gefolget/ daß
Sie von Jugend auff/ Maͤnnigliches Liebe
vnd Gunſt kegen Ihr erwecket.
Ach GOTT/ wie wol/ wie Loͤblich/
ſind die Kinder/ zur ſelben Zeit Erzogen
worden: Jetzund liegt die Welt gantz im
Argen/ alle Winckel ſtecken voller Erger-
nuͤß. Drumb iſts kein Wunder/ daß
GOTT ſolche Schroͤckliche Zeiten ſchickt/
da vnſer Vaterlandt/ mit dem Juͤdiſchen
Lande/ muß einerley Klage fuͤhren: Die
ich Ernehret/ vnd Erzogen habe/ die hat
der Feind vmbbracht. Die vorhin inn
Seyden Erzogen ſind/ die muͤſſen jetzt im
Koth liegen. Ein Alter Eyffriger Leh-
rer Antwortet: Ihrer viel werden alß
die Wilden Thiere Erzogen/ darumb
muͤſſen ſie auch/ alß Wilde Thiere tracti-
ret werden.
befihlet GOTT dem Propheten Ezechiel:
Was iſt die Vrſach? Ihre Mutter/ ſaget
GOTT/ Erzeucht jhre Jungen/ vnter
den Loͤwen. Ihre Jungen/ jhre Kin-
der/ die GOTT nicht wuͤrdigen wil/ Kin-
der: Nemblich/ Menſchen zunennen/ weil
ſie von Beſtialiſchen Eltern herkommen/
vnd widerumb mit Loͤwen: mit derglei-
chen Beſtialiſchen Voͤlckern/ cum conſen-
ſu parentum, vereiniget werden. Drumb
ſagt auch die Goͤttliche Mayeſtaͤt/ in einem
andern Orthe: Ob ſie jhre Kinder gleich
Erzoͤgen/ wil ich ſie doch ohne Kinder ma-
chen/ daß ſie nicht Leuthe ſein ſollen.
Zwar es hat noch Frome Redliche Eltern
in der Welt/ die jhnen jhre Kinder-Zucht/
auffs eußerſte angelegen ſein laſſen. A-
ber/ ich ſage: Ihrer ſind wenig.
Im Jahr 1610. den 2. Februarij/
hat Sie nach GOTTES Willen/ mit
tern/ Ihre Ehliche Lieb vnd Trew/ Ver-
lobet/ Dem WolEdlen vnnd Geſtrengen
Herren/ Friedrichen von Rothkirch/ auff
Teppliwoda/ Jonßdorff/ Juxdorff/ Ko-
belaw vnd Kunßdorff/ deß Muͤnſterbergi-
ſchen Fuͤrſtenthumbs/ vnd Franckſteini-
ſchen Weichbildes/ Wolverordneten Her-
ren Landrechtſitzern/ jetzo Hochbetruͤbten
hinterlaſſenen Herren Wittiber. Mit
welchem jhrem liebſten Eh-Schatz/ Sie
auch biß Dato, nun ins Drey vnnd Dreyſ-
ſigſte Jahr eine LiebReiche/ Gluͤckſelige/
vnd Geſegnete Ehe beſeſſen/ viel Gluͤck vnd
Vngluͤck außgeſtanden/ doch numehr Se-
lig vberſtanden.
Von GOTT ſind Sie mit allerley
Segen/ Reichlich Begnadet worden/ ſo ſie
auch mit hoͤchſten Danck erkennet/ Zehen
Kinder hat Ihnen der Treue GOTT
beſcheret/ Alß Sieben Soͤhne/ vnd Drey
Toͤchteꝛ/ davon doch dieToͤchter alle Drey/
Fraw Mutter/ aus dieſer Sterbligkeit/
voran gegangen. Vier Soͤhne hat Sie
noch hinterlaſſen/ derer Drey an Fremb-
den Orthen/ Adelichen/ Rittermaͤßigen
Tugenden mit allem Fleiß obliegen/ der
Vierde aber/ vnnd Juͤngſte/ hier noch zu-
gegen iſt.
Ihren GOTT hat Sie allezeit
Innbruͤnſtig gefuͤrchtet: Sein Heyliges
Wort gerne vnd Andaͤchtig gehoͤret/ das
Hochwuͤrdige Abendmahl deß Wahren
Leibes vnd Bluttes CHRISTI/ offters
gebrauchet/ vnd in allem Anliegen Hertz-
lich Gebethet.
Gegen Ihrem EhHerꝛn hat Sie/ wie
Er Ihr ſelber das Ruͤhmliche Zeugnuͤß
giebet/ alß eine Tugendhaffte EhFraw/
ſich Holdſelig/ LiebReich/ vnnd im Gluͤck
vnd Vngluͤck/ vnverenderter Liebe vnnd
Trew/ dermaſſen beflieſſen/ daß ſich ſein
Hertz/ allemahl auff Sie beſtaͤndig verlaſ-
an Ihr gehabt.
Maſſen Ich hiervon/ (doch nach mei-
ner bekanten Einfalt/) außfuͤhrlich ge-
nung diſcuriren wolte/ wann Ich nicht
fuͤrchten muͤſte/ daß mir ſolches/ Ratione
ipſius præſentiæ, mehr fuͤr eine Arro-
gantz vnd Aßentation/ alß wie es gemei-
net/ imputiret werden moͤchte. Achte
auch vnnoͤtig/ dieſe Hochanſehliche Ver-
ſamblung/ mit dem jenigen auffzuhalten/
was jederman Wiſſend/ vnnd niemanden
Verborgen iſt.
Gegen Maͤnniglich/ Hohes vnd Nie-
dern Standes/ hat die Selige Fraw/ ſich
dermaſſen LiebReich/ Annehmblich/ Eh-
ren-Dienſtfertig/ vnd Wolthaͤtig erzeiget/
daß ſie gleichſamb aller Gemuͤtter an ſich
gezogen/ vnd von Maͤnniglich/ ſo ſie nur
gekennet/ geliebet vnnd geehret werden
muͤſſen.
Weil Sie aber GOTT lieb geweſen/
bleiben muͤſſen/ Wie Sie dann neben Ih-
rem Liebſten Eh-Schatze/ nicht allein/
durch Abſterben jhrer lieben Eltern/ Sechs
Ihrer lieben Kinder/ viel Ihrer lieben Ge-
ſchwiſter vnd Bluttß-Freunde/ ſonder-
lich dieſe Zwey Jahr hero/ offters betruͤbet
worden/ ſondern auch viel Privat-Creutz
vnnd Kummer/ ſo allewege im Menſchli-
chen Leben mitt vnter lauffet/ erdulden
muͤſſen.
Inſonderheit/ hat ſie bey dieſem ſo
lange gewehrten Kriegßweſen/ die allge-
meinen Landeß-Pluͤnderungen/ vnnd
dannenhero erfolgete Noth/ Gefahr/ Angſt
vnd Furcht/ ſehr vielmal außſtehen/ auch
gantz vnnd gar nun eine lange Zeit/ das
Ihre verlaſſen/ hier in der Frembde Le-
ben/ vnd endlich ſolch Muͤhſeliges Leben/
vollendt/ nach GOttes Heyligem Willen
beſchliſſen muͤſſen.
Doch in dieſer Feſten Zuverſicht zu
Zeitlich vnnd Leicht geweſen/ vber Ihr
ſchaffen wuͤrden/ eine Ewige/ vnnd vber
alle maß wichtige Herrligkeit. Ja daß
diß ohne Zweyffel/ einem Chriſten/ auff
jenen Tag/ zu hoͤchſter Ehre gereichen muͤ-
ſte/ wann er wird die ſchoͤne Stimme hoͤ-
ren: Ihr habt den Raub eurer Guͤtter/
mit Freuden erduldet/ alß die jhr bey euch
ſelbſt/ eine beſſere vnd bleibende Haabe/ im
Himmel habt. Wie auch aus dem Mun-
de deß Sohnes GOTTES: Ihr ſeydts/
die jhr bey mir beharret habt/ in meinen
Anfechtungen.
Eine ziemliche Zeit hero/ hat Sie ſich
jmmerzu Vnpaß befunden/ vnd in etwas
geklaget/ auch Vnterſchiedliche Groſſe
Kranckheiten/ vnnd ſchwere Niederlagen
außgeſtanden.
Endlich aber den Vierzehenden Tag/
nechſt verſtrichenen Monaths Auguſti/ iſt
Sie abermal gantz Laͤgerhafft geblieben/
Symptomatibus befallen worden.
Wiewol nun von Ihrem geliebten Eh-
Herrn/ alle moͤgliche Mittel/ zu Wieder er-
langung verlorner Geſundheit/ angewen-
det worden/ ſo haben doch ſelbige dißmal
nichts erfrewliches wuͤrcken wollen. Dero-
wegen ſich auch die Liebe Fraw/ zu einem
Seligen Sterbeſtuͤndlein/ recht Chriſtlich
vñ wol bereitet/ den 20. Auguſti/ mit GOtt
verſoͤhnet/ vnd nachmals mit vnauffhoͤrli-
chem Seufftzen vnd Gebeth zu jhrem Erloͤ-
ſer/ fleißig angehalten/ Ihre Seele ſeiner
Gnadenhand/ mit Mund vnd Hertzen be-
fohlen/ vnd ſich allezeit an das theureVer-
dienſt JEſu Chriſti/ feſt gehalten/ biß ſie
letzlich auff daſſelbte/ in wahrem Glauben
den 29. Auguſti zu Nacht/ zwiſchen 12. vnd
1. Vhrn/ Selig/ Sanfft vnd Stille/ von
dieſer Welt abgeſchieden/ vnnd der Seelen
nach/ in die vngezweyffelte Ewige Frewde
verſetzt worden; Ihres Alters 49. Jahr/
25. Wochen/ 1. Tag.
Nuhat Sie alles Vngluͤck vberwunden/
Den rechten Fried vnd beſten Schatz gefunden/
Darnach Sie/ alß ein Chriſtin/ taͤglich ſtrebte/
So lang Sie lebte.
Alß Chriſtus zu ſeinem Vnſchuldigen
Tode vnd Begraͤbnuß gefuͤhret ward/ ga-
ben Ihm ein groſſer Hauffen Volcks vnnd
Weiber das Geleithe/ die Klagten vnd Be-
weinten Ihn. Wie er ſolches ſahe/ ſprach
Er: Ihr Toͤchter von Jeruſalem/ Weinet
nicht vber mich/ ſondern Weinet vber euch
ſelbſt/ vñ vber eure Kinder: Dann es wird
die Zeit kom̃en/ in welcher man ſagen wird:
Selig ſind die Vnfruchtbaren Leiber/ die
nicht Geboren haben/ vnnd die Bruͤſte/ die
nicht geſaͤuget haben. Ja man werde ſa-
gen/ zu den Bergen: Fallet vber vns/ vnd
zu den Huͤgeln/ decket vns.
Wann die Selige Fraw Rothkirchin
heute in vnſerm Mittel erſcheinen/ vnd die
Thraͤnen ſehen ſolte/ die von jhrem Treuen
Ehſchatz: von jhrem/ theyls gegenwertig-
theyls abweſenden Geſchwiſter/ Kindern
heim vnd offentlich vergoſſen worden: Sie
wuͤrde ohn zweyffel vnſerm Heylande/ eben
die Worte abborgen/ vnd ſagen: O lieben
Leuthe/ Weinet nicht vber mich:
Weil Ich alle Angſt vnd Noth/
Vberwunden/ vnd bey GOTT/
Mit den Außerwehlten ſchwebe/
Voller Frewd/ vnd Ewig Lebe.
vber euch aber Weinet jhr billich/ alß die
Ich hinter mir in der boͤſen Welt laſſe/ vnd
die jhr nicht wiſſen koͤnt/ was euch ferner/
nach GOttes Gerechtem Gericht/ begegnen
werde. Ach freylich/ ich fuͤrchte/ wer noch
eine kleine weile wird in der Welt leben ſol-
len/ er wird viel ſehen/ das er nicht gerne
ſihet/ vnd viel hoͤren/ deſſen er lieber vber-
haben ſein wolte.
Wie nun dieſer vnſerer lieben Seligen
Freundin/ jhre erlangte Ruhe/ aus erzehl-
ten vrſachen/ wol zugoͤnnen iſt: Alſo hoff
ich/ gegenwertiger Herr Wittiber/ werde
auch/ (wie anfangs geſagt/) ſeine Seele
mit Gedult faſſen vnd bedencken:
darinnen Er die Dritte Bitte/ im Vater-
vnſer lernẽ ſol: HERR/ dein Wille geſche-
he. Nicht aber ſpeculativè, durch vielLeſen
vnd Nachdencken/ Sondern practicè/ im
Werck vnd in der That/ Alſo/ daß er jhm
kan ſeines GOttes Willen/ wol gefallen
laſſen/ auch zu der Zeit/ da Er ſeinem Wil-
len gantz vnd gar zu wider iſt.
Dann/ was hilffts: wir muͤſſen deß
Troſts gewohnen/ der da heiſt: per patien-
tiam & conſolationem ſcripturarum,
drumb entzeucht vns GOtt offt Conſola-
tiones Rerum, auff daß Conſolatio Scri-
pturarum, Raum/ vnd zuthun bey vns fin-
de/ vnnd nicht da ſo gantz vergeblich im
Buchſtaben/ ohne vbung/ liegen bleibe.
Wollen wir nicht gemahlte/ nicht er-
tichtete/ Sondern Rechtſchaffene Chriſten
ſein/ ſo muͤſſen wir nur auch nicht gemahl-
te/ nicht ertichtete/ Sondern Rechtſchaffe-
ne Creutztraͤger ſein/ vnd das jenige/ ſo vns
offenbaret/ nicht nur in der Bibel/ ſondern
auch in vns ſelbſt lieb haben lernen/ gefelts
vns wol/ daß der Heylige Geiſt/ die Lehre
von vnſerm Creutz/ vnnd deſſen nothwen-
digkeit in ſein Buch geſchrieben/ ſo muß es
vns nur auch wolgefallen/ wañ Er es duꝛch
die Erfuͤllung/ in vnſer Fleiſch vnd Blutt/
in Hertz vnd Seele hienein ſchreibet.
Endlich erkennet Er ja billich/ alß ei-
ne beſondere hohe Wolthat von GOtt/ daß
er ſeinen Treuen Ehſchatz/ ſo ſtatlich vnd
Vornehm zu Ihrer Ruhſtaͤt befoͤdern koͤn-
nen. O wie viel Vornehme Leuthe haben
dergleichen Ehre/ Anno 1633. auch hier zu
Breßlaw/ nicht haben koͤnnen/ wer weiß/
was in kuͤnfftig erfolget/ weil ſichs allen-
thalben/ in Staͤdten vnd Doͤrffern/ ſehr
ſeltzam anlaͤſſet.
Wie Ich nun hoffe/ daß Er diß ſchon
mit ſeufftzen ſeinem GOTT gedanckt hat/
Alſo erſcheinet Er auch fuͤr dieſem Hoch-
keit/ vnd weiß nicht/ wie er ſich gnungſam
Danckbar erweiſen ſoll:
Daß Ihre Fuͤrſtliche Gna-
den/ vnſere allerſeits/ Gnaͤdi-
ge Fuͤrſten vnd Herren/ Frau-
en vnd Fraͤwlein; das Muͤnſterbergi-
ſche Fuͤrſtenthumb/ vnd Franckſteini-
ſche Weichbild: Wie ingleichem/ ein
Geſtrenger/ Hochweyſer Rath/ dieſer
Kaͤyſerlichen Stad Breßlaw: Durch
dero Hochanſehentliche Herren vnnd
Frawen Abgeſandten: Ihre Gnaden
aber/ vnd die Herren/ ſo wol das Hoch-
loͤbliche Freyherrlich- vnnd Adeliche
Frauenzimmer/ Frauen/ Fraͤwlein/
vnd Jungfrauen/ in Perſoͤnlicher Ge-
genwart/ ſich ſo Gnaͤdig/ Geneigt vnd
Freundlich erwieſen/ vnd den Chriſtlich
verblichenen Coͤrper/ ſeiner offternenten
Gehorſambſt- vnnd dienſtflehentliches
Anſuchen/ in ſo vberauß Volckreicher
Frequentz, zu Ihrer verordneten
Ruhſtaͤtt begleiten wollen.
Dann wiewol bey der Gottloſen
Welt/ die ſchuldige Danckbarkeit/ fuͤr
erwieſene Wolthat/ leichter iſt/ alß eine
Feder; Zorn vnd Haß aber/ fůr die we-
nigſteBeleidigung/ ſchwerer/ alß ſchwe-
res Bley: Ob auch derer Leuthe ſchon
viel ſind/ von denen der Poet Auſonius
ſaget: daß ob man ſie gleich nach Rom
truͤge/ vnnd nur fuͤr dem Thor ein we-
nig Vnſanfft niederſetzte/ man mehr
Vndanck/ alß Danck/ zugewartten
hette:
So iſt doch Gegenwertiger Herr
von Rothkirch/ wie in andern/ alſo auch
in dieſer Tugend/ nicht der Meinung/
keine Schwerere Laſt traͤget/ alß einen
Vndanckbaren Menſchen/ von deſſen
Hauſe auch/ (nach deß Hochweyſen
Koͤniges Außſage/) das Vbel keinmal
wegweichet.
Aber/ Er beklagt ſich/ daß es Ihm
ergehe/ wie den Mahlern/ welche/ wañ
ſie ſollen eine groſſe Menge Volcks fuͤr-
ſtellen/ præfiguri ren ſie die foͤrderſten
zwar gantz/ die Nachſtehenden nicht
halb/ die weiteſten/ nicht wol mit den
Koͤpffen/ ja nicht wol mit den Haaren.
Alſo/ die vberauß Hohe Gnad vñ
Ehre/ ſo Ihm heunte erwieſen wird/ iſt
dermaſſen groß vnd wichtig/ daß/ inn
dem Er nur das gegenwertige ruͤhmet/
Er alles andere/ ſo hierauß erfolget/ mit
Stillſchweigen vbergehen muß. Da-
rumb beklagt Er ſich noch einmal/ vnd
ben muͤſſen.
Jedoch/ weil auch diß ein Vorneh-
mes Stuͤcke der Danckbarkeit iſt/ gern
Danckbar ſeyn wollen/ Alß ergiebet
Ihrer Fuͤrſtl. Gnaden: Dem Muͤn-
ſterbergiſchen Fuͤrſtenthumb/ vnnd
Franckſteiniſchen Weichbilde: Einem
Geſtrengen Rath/ dieſer Hochloͤblichen
Stadt/ vnd derer allerſeits Hochgeehr-
ten Herren Abgeſandten: Ihrer Gna-
den/ dem Herren Landeß Hauptmann/
vnnd der gantzen Hoͤchſtwerthen Ver-
ſamblung/ Er ſich/ zu Vnterthaͤnigſten/
Gehorſambſt- vnd nach eußerſtem Ver-
moͤgen/ Schuldwilligſten Dienſtlei-
ſtungen.
Vnd weil Er/ (wie geſagt/) ſeine
facultates gar viel zu wenig erkennet/
ſolche theure Gnad/ vnnd Ehren-Gut-
ſi ren/ vnd mit gleichwichtigem Danck
zubelegen:
So wuͤnſchet Ervon Grund ſeiner
Seelen/ Ihrer Fůrſtlichen Gnaden/ al-
lerſeits/ den lieben Frieden/ vnd durch
denſelbten/ die ſo lange gehoffte Erleich-
terung/ dero fortmehr Vnertraͤglichen
Regimentß-Laſt. Offtwolgemeltem
Můnſterbergiſchen Fůrſtenthumb/ vnd
Franckſteiniſchen Weichbilde/ GOttes
Reichen Segen/ in erfrewlicher Ruhe
vnnd Sicherheit: Dieſer Schoͤnen/
Hoch- vnnd Weitberůhmbten Reipu-
blicæ, GOttes Maͤchtigen Schutz/
vnd deſſen bißher/ von vielen Tauſendt
Chriſten/ wolempfundene/ beſtaͤndige/
Vaͤterliche Beywohnung: Ihrer
Gnaden/ alß auch dem ſamptlich Hoch-
geehrten Comitatu, allen erfrewlichen
Zeitlich vnd Ewig. Schleuſt hierauff
ſelbſt dieſen Trauer- Actum, mit dem
Geduldigen Jobo:
Dominus dedit,
Dominus abſtulit; Sicut Domi-
no placuit, ita factum eſt: Sit
nomen Domini bene-
dictum.