|| [012]

|| [013]

|| [014]

|| [015]

|| [016]

|| [017]

|| [018]

|| [020]

|| [021]

Abtheilung.

DAmit wir aber dieſer Hiſtorien vnd
Geſchicht in der furcht Gottes etwas
weiter nachdencken moͤgen/ ſo wollen
wir dieſelbige abtheilen in nachfolgende
Puͤnctlein.
I.
Zum erſten vom Alter der frommen
Gottſeligen Sara/ wie lange ſie auff dieſer
Welt gelebet/ vnd wie jhr ſo mancher rauher
Wind vnter Augen gangen.
II.
Zum andern von jhrem ſeligen Abſchied/
den ſie genommen hat in der Stadt Hebron:


III.
Zum dritten von der Ankunfft Abra-
hams als des Witwers/ wie er zu ſeiner
verſtorbenen Sara kommen ſey/ vnd ſie be-
klaget vnd beweinet habe/ ſich aber auch wie-
derumb getroͤſtet/ vñ jhr ein ehrlich Begraͤb-
nis ausgerichtet.
Zum Beſchluß wollen wir auch etwas
erwehnen von vnſerer verſtorbenen/ Adeli-
chen Ankunfft/ Chriſtlichem Leben vnd Wan-
del/ vnd ſeligen Abſchied aus dieſer Welt.
Was nu bey einem jedern Punct zur Lehr
vnd Troſt wird zu behalten ſeyn/ davon ſol
kurtzer bericht geſchehẽ. Gott gebe gnad vnd
Segen darzu vmb Jeſu Chriſti ſeines lieben
Sohns vnſers Herrn willen/ Amen.

Vom Erſten.

ANreichend nu den erſten Punct/ nemlich
das alter Sara/ wie lange ſie auff die-
ſer Welt gelebet/ ſo zeuget Moſes hie-
von deutlich/ da er ſpricht: Sara war hun-
dert vnd ſieben vnd zwantzig Jahr alt/ In
ſeiner ſprache lautets: Fuerunt vitæ Sara


centum viginti ſeptem annorum, Das
viel vnd mancherley Leben der Sara erſtre-
cket ſich auff hundert vnd ſiebenzwantzig
Jahr. Denn jhr mancher rauher Wind in
der Welt vnter Augen gangen iſt/ vnd ſie viel
Creutz vnd Truͤbſal die 127. Jahr vber hat
erfahren muͤſſen/ alſo daß ſie nicht nur eins/
ſondern gleichſam viel Leben ausgeſtanden
hat. Denn/ damit wir nur etwas von jh-
rem vielen vnd mancherley art des Creutzes
berichten/ ſo iſt jhr dieſes nicht ein geringes
leiden geweſen/ daß ſie mit vnfruchtbarkeit
beladen war/ Sintemal diß bey dem Juͤdi-
ſchen Volck vor eine beſondere Straffe Got-
tes/ vnd vor eine groſſe ſchmach vnter den
Leuten geachtet wurde. Neben ſolcher jhrer
vnfruchtbarkeit/ damit ſie ſehr viel Jahr ge-
dult hat haben muͤſſen/ ſchlegt auch noch an-
der Vngluͤck mit hauffen zu. Denn da muß
die liebe Sara bey jhrer groſſen vñ beſchwer-
lichen Haußhaltung/ die ſie zu verwalten
hat/ in die 67. Jahr mit jhrem lieben Abra-
ham das Elend bawen/ vnd in ſolchen ſieben
vnd ſechzig Jahren wol in die funffzehen


mahl jhren Stab foͤrder ſetzen/ Ich wil jetzo
nicht ſagen/ wie jhr der Teuffel in ſolchen E-
xilio vnd Elend nach jhrer Ehre geſtanden/
wie ſie wegen vorſtehender gefahr jhren
Mann zu zweyen vnterſchiedenen mahlen
hat muͤſſen verleugnen/ vnnd ſich vor ſeine
Schweſter ausgeben/ Inmaſſen ſie jhm
denn auch vnter dieſem Namen genommen
wird/ vnd wenn es nicht Gott der Herr
ſonderbarer weiſe verhuͤtet hette/ ſo duͤrffte
ſie nicht allein vmb jhre Zucht vnd Ehre/ ſon-
dern wol gar vmb Leib vnd Leben kommen
ſeyn. Was ſie auch ſonſten in jhrer beſchwer-
lichen Haußhaltung vor Creutz mit jhrem
Geſinde gehabt/ das kan Moſes der Mann
Gottes faſt nicht gnugſam mit Wortẽ auß-
ſprechẽ. Geneſ. am 13 cap. leſen wir/ wie Abra-
hams vnd Loths Hirten dermaſſen vber der
Viehzucht an einander gewachſen ſeyn/ daß
ſich beyde Herren von einander ſondern/ vnd
einer dem andern weichen muß.
Geneſis am 15. wird gemeldet/ wie ſein
Haußvoigt Elieſer von Damaſco im Eh-
ſtandt geſegnet worden ſey/ daruͤber Abra-


ham in Vngedult geraͤht/ vnd ſtellet mit der
Goͤttlichen Majeſtet eine expoſtulation an/
vnd ſpricht/ Sihe meinẽ Knecht haſtu im Eh-
ſtand geſegnet/ vnd mich leſſeſtu ohne Kinder
dahin gehen/ daß heute oder morgen meines
Knechts Sohn wird meiner Guͤter ein Erbe
vnd beſitzer ſey? Das war eine klage vnd be-
ſchwerung vber ſeiner Sara Vnfruchtbar-
keit/ die jhr gewiß durch Marck vnd Bein
gangen. Daher ſie denn auch vervrſacht vnd
bewogen wird/ daß ſie jhm Geneſ. 16. cap.
jhre Egyptiſche Magd die Hagar beylegt/
daß er ſich aus derſelben erbawe/ ſintemal
Gott jhren Leib verſchloſſen hatte. Kurtz
hernach richtet der Aſmodi der Eheteuffel in
der Haußhaltung einen newen Lermen an.
Denn als nun die Magd Hagar ſpuͤret vnd
mercket/ daß ſie durch Gottes ſegen vom A-
braham ſchwanger worden iſt/ Sihe/ da v-
berhebet ſie ſich ſolches ſegens/ wird ſtoltz
vnd vbermuͤhtig/ alſo daß ſie auch Saram
die Fraw im Hauſe gegen ſich geringſchaͤtzig
achtet/ vnd ſich weit beſſer als Sara duͤncken
leſt/ daß recht geſagt wird:

Aſperius nihil eſt humili, cum ſurgit
in altum,

Es iſt mit reverentz zu melden/ kein ſtol-
tzer/ hochmuͤhtiger vnd vnbendiger Thier/
als eine Lauß/ weñ dieſelbe in Grind koͤmpt:
welchs denn auch der lieben Sara das Hertz
nicht wenig wird gekrencket haben.
Ja da Sara den hohmuth in die lenge
nicht dulden noch leiden kan/ ſondern ſie nach
dem befehlich jhres Herrn ein wenig diſcipli-
niren vnd zuͤchtigen wil/ Sihe/ da leuffet die
ſtoltze Dirne mit ſchwangerm Leibe davon
vnd wil vngezuͤchtiget ſeyn: Da hat die Lie-
be Sara abermal ein newes Creutz vnd wol
tauſendterley ſorge/ daß ſie nicht etwa aus
vngedult der Leibesfrucht ein leid thue/ biß
ſie der Engel wider zu ruͤcke treibet. Damit
aber hoͤret das Vngluͤck noch nicht auff/ ſon-
dern als Gott endlich die Saram mit dem
jungen Iſaac in jhrem hohen alter geſegnet/
vnd die zeit herbey kam/ daß der Knabe ent-
wehnet wurde/ vnd Abraham deswegen ein
convivium anſtellete/ Sihe da richtet der
Teuffel abermal ein Lermen an/ dadurch die


froͤligkeit in eine trawrigkeit verwandelt
ward. Deñ da wil Iſmael der Magd Sohn/
Juncker im Hauſe ſeyn/ vnd weil er der erſt-
geborne iſt/ helt er den jungen Iſaac der Sa-
ræ Sohn vor ein lauter Schaubhuͤtlein/
verlacht vnd verſpottet jhn hoͤniſcher weiſe/
wie er nur kan vnd mag.
Solches aber gehet Saræ ſo nahe zu
Hertzen/ daß ſie beydes auff Mutter vnnd
Sohn einen vnwillen wirfft/ vnd derwegen
bey Abraham vnnachleſſig anhelt/ beyde
Mutter vnd Sohn aus dem Hauſe beyſeits
zu ſchaffen. Wiewol nu ſolchs dem Abra-
ham ſehr ſchwer eingehet/ auch kein zweiffel
iſt/ daß er derowegen mit Sara hart wird
haben auffgebunden/ ſintemal der Text kler-
lich vermeldet/ daß ſolch Wort dem Abra-
ham vbel gefallen habe/ jedoch ſo muß er
endlich auff Gottes befehl dran.
In dem aber nu Sara meinet/ es werde
nu alles vngewitter voruͤber ſeyn/ vnd kuͤnff-
tiger zeit die lautere Sonne ſcheinen/ Sihe
da woͤlckt ſich erſt das groͤſte Vngewitter
auff. Denn da koͤmpt Gott der Herr/


vnd greifft beyden Eheleuten erſt recht ans
Hertz/ in dem er dem Abraham befehl thut/
Er ſol ſeinen Sohn Iſaac nehmen/ vnd jhn
hinfuͤhren an einen Ort/ den er jhm ſelber zei-
gen wolle/ da ſol er jhn ſchlachten vnd auff-
opffern.
Wie nu dem betruͤbten Vater ob ſolchem
befehl wird zu muth geweſen ſeyn/ wie man-
chen heiſſen Traͤhnen auch die liebe Sara
daruͤber wird vergoſſen haben/ kan ein jedes
vernuͤnfftiges Hertz leicht ſelber erachten.
Deñ da muͤſſen die lieben Eltern auff Gottes
geheiſſe thun/ was ſonſten der eingepflantz-
ten natuͤrlichen Liebe ſtracks zu wieder iſt.
Sehet das iſt alſo das viel vnd mancher-
ley leben vnd zuſtand der lieben Sara in die-
ſer Welt geweſen/ daß wir wol ſagen moͤgen:
Nicht nur eins/ ſondern viel Leben
Muͤſſen wir ausſtehn gar eben/
So lang wir walln im Zehrenthal
Vmbfeht vns Vngluͤck vberall:
Drumb bittn wir dich HErr Jeſu Chriſt
Der du der lebndig Heyland biſt/


Du wolſt fuͤr diß weſn vnd leben/
Vns das Himliſch vnd ewig geben.
Sonſt iſt ein hohes alter vnd langes Leben
auch ein Zeugnis der guͤte vnd Allmacht
Gottes/ der alte Leute ſo lange ſtercket vnd
erhelt/ ſonderlich/ wenn ſie fromm vnd Gott-
fuͤrchtig/ vnd andern mit guten Exempeln
fuͤrgehen. Denn die furcht des Herrn
mehret die Tage/ aber die Jahr der Gottlo-
ſen werden verkuͤrtzt/ ſagt Salomon/ die Ge-
rechtigkeit foͤrdert zum Leben/ aber dem
vbel nachjagen foͤrdert zum Tode. Alſo
hat der Vater aller gleubigen Abraham ein
groß alter erreicht/ daß er 175. Jahr gelebet.
Moſes der Mann Gottes 120. Jahr/ deſſen
Augen nicht dunckel worden/ vñ ſeine Krafft
nicht verfallen. Es iſt aber hie der feine
Spruch des alten Lehrers Ambroſij mit zu
nehmen vnd wol zu mercken/ der alſo lautet:
Verè Senectus illa venerabilis, quæ non ca-
nis ſed meritis albeſcit, das iſt wol ein recht
Ehr vnd Lobwuͤrdigs alter/ das nicht allein
an den grawen Haaren/ ſondern auch an


gut vnd wolthaten recht ſchneeweiß ſich
findet vnd ereignet.
Vnd ſo viel ſey kuͤrtzlich geſagt vom er-
ſten Stuͤck.

Vom andern.

VOn dem ſeligen Abſchied der lieben
Saræ aus dieſer Welt in der Stadt
Hebron. Denn alſo ſchreibet Moſes
weiter: Vnd Sara ſtarb in der Hauptſtadt/
die da heiſt Hebron im Lande Canaan.
Da hoͤren wir geliebte im Herrn/
wie es mit der Gotſeligen Saræ Abſchied
aus dieſer Welt zugegangen ſey? Als hat
jhr Gott der HErr kein beſonders gemacht/
Er hat jhr nicht einen fewrigen Wagen vom
Himmel geſchickt/ wie dem Propheten Eliæ/
vnd ſie lebendig gen Himmel holen laſſen/
ſondern ſie iſt auch geſtorben/ vnd hat alſo
den Weg aller Welt wandern muͤſſen/ wie
andere Menſchen. Nu moͤchte ſich zwar all-
hie ein einfeltigs Hertz bekuͤmmern vnd ſa-
gen: Je lieber/ wie koͤmpt Gott Herr auff
dieſe weiſe/ daß er die liebe Saram/ das


fromme Gottfuͤrchtige Hertz nicht weniger
als andere boͤſe Buben vnd Bubin dahin
ſterben leſſet? Hette Er jhr denn wegen jhrer
froͤmmigkeit nicht auch den vortheil thun
vnd erzeigen koͤnnen/ vnd ſie lebendig von der
Welt hinweg nemen/ wie Enoch vnd Eliam?
Aber darauff ſollen wir wiſſen/ daß allen
Menſchen geſetzt iſt einmal zu ſterben/ vnnd
darnach das Gericht/ vnd daß es Gott al-
lerdings helt auch mit ſeinen heiligen nach
dem einmal geſprochenen vrtheil vnd Sen-
tentz. Du biſt Erde/ vnd muſt zu Erden wer-
den. Denn der Staub muß wider zu der
Erden kommen/ wie er geweſen iſt/ vnd der
Geiſt wider zu Gott/ der jhn gegeben hat.
Solches dienet vns zu einem beſondern
Troſt/ daß wir daraus erkennen ſollen/ wie
auch die liebe Sara vnd andere heiligen
Gottes/ wegen der anklebenden ſchwachheit
vnd gebrechligkeit in dieſem fall keinen vor-
theil haben vor andern Menſchen/ ſondern
auch den Weg aller Welt wandern muͤſſen
wie Joſua vnd David reden.
Es iſt aber der Todt der heiligen werth


gehalten fuͤr dem Herrn/ Gott ſelber be-
fihlet Johanni zu ſchreiben: Selig ſind die
Todten/ die im Herrn ſterben von nun
an/ Ja der Geiſt ſpricht/ daß ſie ruhen von
jhrer Arbeit/ denn jhre Werck folgen jhnen
nach. Gleich wie den gleubigen Chriſten alle
dinge muͤſſen zum beſten gereichen vnd ge-
deihen/ alſo auch der Todt/ ſagt der alte Leh-
rer Baſilius: Licet mors ex peccato ſit in-
troducta, tamen ad hoc illâ Deus utitur, ut
nobis benefaciat, das iſt/ ob der Todt gleich
eine ſtraffe der Suͤnden iſt/ ſo braucht jhn
doch Gott darzu/ daß er vns dadurch alles
guts thut/ dadurch zeucht diß ſterbliche an
die vnſterbligkeit/ vñ diß verweßliche die vn-
verweßligkeit/ 1. Corinth. 15.
Was den Ort oder die Stadt belan-
get/ da Sara jhr leben beſchloſſen hat/ ſo
iſt es Hebron die groſſe weitberuͤhmte
Stadt geweſen/ ſo im Stam Juda gelegen/
ſechſt halb Meilen von Hieruſalem/ der
Haͤuptſtad des Juͤdiſchen Landes.
In dieſer Stadt iſt auch David zum
Koͤnige geſalbet wordẽ/ vnd hat ſieben Jahr


vnd ſechs Monden darinnen ſeinen ſitz ge-
habt/ kaum ein viertheil Meilwegs von He-
bron iſt gelegen ein ſchoͤner vñ luſtiger Wald
in einem ſchoͤnen fruͤchtbarn Thal gegen He-
bron vber/ derſelbige Wald hat geheiſſen der
Hayn Mamre/ von einem Landjunckern
Mamre genand/ der bey dieſem Walde ſeine
wohnung gehabt (gleich wie bey vns noch
heutigs Tags die vom Adel jhre ſitze im freyẽ
Felde oder Gehoͤltze haben) In ſolchem
Hayn Mamre iſt geweſen die zwiefache Hoͤ-
le/ die Abraham vom Ephron dem Hethiter
zum Erbbegraͤbnis erkaufft. Heutigs Tags
(wie die jenigen berichten/ ſo das gelobte Land
beſichtiget) ſol an demſelben Ort eine Tuͤr-
ckiſche Muſcha vnd Feſtung ſtehen/ bey wel-
cher man den Pilgrim vnd Wandersleuten/
ſo der Ort gelangen/ des Patriarchen Abra-
hæ vñ ſeiner Saræ/ ſo wol auch ſeiner Nach-
kommen begraͤbniß durch ein Fenſterlein zu
zeigen pfleget.
Es heiſſet aber Hebron auff vnſer Deut-
ſche ſprache ſo viel als eine verſamlung/ vnd
giebt vns gar eine feine nuͤtzliche Lehr/ wie
wir vns nicht allein in vnſern Leben aller


Chriſtlichen gebuͤhr erzeigen vnd verhalten
ſollen/ ſondern was wir auch nach vnſerm
abſchied aus dieſer Welt zugewarten haben/
da wir anders gleubige Chriſten geweſen/
vnd biß an vnſer Ende geblieben ſeyn. Denn
hier in dieſem Leben ſol vnſer fuͤrnembſte ſor-
ge vnd bekuͤmmernis ſeyn/ daß wir vns gen
Hebron halten/ das iſt/ zur verſamlung vnd
gemeinſchafft der Chriſtlichen Kirchen/ die
daß rechte geiſtliche Hebron iſt/ da ſollen wir
zuſchawen/ daß wir derſelbigen wahre/ le-
bendige Gliedmaſſen ſeyn. Denn ſonſt heiſts:
Extra Eccleſiam nulla ſalus, Auſſer der
Chriſtlichen Kirchen iſt kein Heil/ Leben vnd
Seligkeit. Wenn wir nun das thun/ Ey ſo
haben wir den Troſt/ daß wir auch im Tode
võ der verſamlung vñ gemeinſchafft der Kin-
der Gottes ſollẽ vngeſcheidẽ ſein/ ſondern am
juͤngſten Tage mit denſelbigen einerfroͤlichen
Aufferſtehung zum ewigen Leben genieſſen.
Nicht ohne vrſach aber wird neben der
Heuptſtadt Hebron auch des Landes Ca-
naan gedacht. Denn das war der Ort/ den
Gott der Herr dem Ertzvater Abraham


vnd ſeinen Samen zum eigenthuͤmblichen
Sitz zugeſagt vnd verſprochen hatte/ vnd
den hatte auch zwar Abraham mit ſeiner
lieben Sara beſchritten/ Aber er vor ſeine
Perſon hatte nicht ſo viel eigenthuͤmblichs
darinne/ als eines Fuſſes breit/ wie im Buch
der Apoſtel geſchichten am 7. cap. geſchrie-
ben ſtehet/ ſondern da muſte er vor ſeine liebe
Saram ein Raͤumlein zur Grabſtadt vmb
ſein eigen Geld erkauffen/ dahin er ſeinen
Todten begraben koͤndte.
Doch ſchreibet er gleich ſeinen Namen
an diß Erbbegraͤbnis zum ewigen gedecht-
nis/ vnd zweiffelt gar nicht/ was er vor ſeine
Perſon in dieſem Lande nicht eigenthuͤmblich
beſitze/ das wurden doch zu ſeiner zeit ſeine
liebe nachkommen ererben vnd beſitzen.
Vnter deſſen aber lehret er vns mit ſei-
nem Exempel/ daß die heiligen Gottes jhr
Datum nicht haben auffs zeitliche vnd jrr-
diſche weſen geſetzt/ ſondern wie jhnen die E-
piſtel an die Hebreer am 11. cap. zeugnis giebt/
ſo haben ſie ſelber erkandt vnd bekand/ daß
ſie nur Gaͤſte vnd Frembdlinge allhier auff


Erden geweſen ſeyn/ Sie haben aber gewar-
tet auff eine andere Stadt/ die einen beſtendi-
gen grund hat/ vnd derer Schoͤpffer vnnd
bawmeiſter Gott ſelber iſt. Vnd ſolchen loͤb-
lichen Exempeln ſollen auch wir noch heutigs
Tags trewlich nachfolgen/ vnſere Hertzen
in das zeitliche ſo tieff nicht flechten/ ſondern
viel mehr nach dem ſtreben vnd trachten/ das
ewig vnd vnvergenglich iſt. Denn wie der
Apoſtel Paulus ſpricht in der andern Epiſtel
an die Corinther am fuͤnfften Capitel: Wir
wiſſen/ ſo vnſer jrrdiſch Hauß dieſer Huͤtten
zerbrochen wird/ daß wir einen Baw ha-
ben von Gott erbawet/ ein Hauß nicht mit
Haͤnden gemacht/ das ewig im Himmel iſt/
vnd vber demſelbigen ſehnen wir vns auch
nach vnſer behauſung/ die vom Himmel iſt/
vnd vns verlanget/ daß wir damit vberklei-
det werden/ ſo doch/ wo wir bekleidet vnnd
nicht bloß erfunden werden. Vnd zum Phi-
lippern am dritten cap. ſpricht er: Vnſer
wandel iſt im Himmel (wir wandeln als fuͤr
Gottes Angeſicht/ vnd trachten nach der
kuͤnfftigen Herrligkeit im Himmel) von dan-


nen wir auch warten des Heylandes Jeſu
Chriſti/ welcher vnſern nichtigen Leib ver-
klehrẽ wird/ daß er ehnlich werde ſeinem ver-
klehrten Leibe/ nach der wirckung/ damit er
kan auch alle dinge jhm vnterthenig machen.
Vnd ſo viel auch vom andern Stuͤck.

Vom dritten.

VOn der Ankunfft Abrahams/ als des
Witwers/ wie er zu ſeiner verſtorbenen
Sara kommen ſey/ vnd ſie beklaget
vnd beweinet habe/ auch ſich widerumb ge-
troͤſtet/ vnd jhr ein herrlich begraͤbnis ausge-
richtet. Denn davon berichtet Moſes der
Mann Gottes/ vnd ſpricht: Da kam Abra-
ham/ daß er Saram ſein Weib klaget vnd
beweinet.
Es haltens etliche Interpretes darfuͤr/
weil allhier Moſes meldet/ daß Abraham
erſt nach der Saræ Todt kommen ſey/ vnd
ſie beklaget vnd beweinet habe/ ſo ſey zu ver-
muhten/ daß die liebe Sara in abweſen jhres
lieben Herrn/ Todes verblichen ſey/ in dem
vielleicht Abraham zu Berſaba geweſen/ vnd


ſeinen Haußraht/ des Orts abgeholet. Do
nun dem alſo/ ſo were leicht zu erachten/ daß
es beydes der lieben Saræ/ ſo wol auch dem
liebẽ Abraham kein geringes Hertzeleid wird
geweſen ſeyn/ daß ſie ſo ohne vorgehende vn-
terredung von einander ſcheiden muͤſſen/ be-
voraus/ weil ſie ſo eine lange zeit eine fried-
ſame vnd geruhige Ehe mit einander beſeſſen/
vnnd eines an dem andern ſeines Hertzens
troſt vnd frewde gehabt. Doch wie dem al-
len/ ſo iſt kein zweiffel/ was der liebe Abra-
ham mit troſt bey der lieben Sara nicht hat
koͤnnen verrichten/ das wird vnter deſſen der
fromme vnd wolgezogene Sohn Iſaac ver-
richtet haben/ der wird ſeiner Mutter aus
Gottes Wort Hertzquickenden Troſt haben
zugeſprochen/ vnd ſie auff das einige ver-
dienſt des zukuͤnfftigen Meſſiæ vnd Schlan-
gentreters trewlich gewieſen haben/ wie ſie
denn auch darauff jhr Leben ſanfft vnd ſelig
beſchloſſen/ vnd alſo vnter die Zahl der gleu-
bigen im Volck Gottes/ geſamlet worden.
Es treget ſich leider offt zu/ daß Eheleu-
te durch den zeitlichen Todt von einander ge-


trennet werden/ in des einen ſeinem abweſen.
CHRISTINA des Landgrafen in Heſ-
ſen/ Fuͤrſten PHILIPPI Gemahlin/ Chur-
fuͤrſtẽ Moritzen zu Sachſen Fraw Schwie-
germutter/ ſtarb fuͤr groſſem Jammer vnd
Hertzeleid/ als jhr Herr weit von jhr war in
frembden Landen/ vnd ins fuͤnffte Jahr ge-
fangen gehalten wurde von Roͤmiſchen Key-
ſer Carolo dem fuͤnfften/ Anno Chriſti 1549.
Vnd der hochgelahrte Mann PHILIPPUS
MELANCHTHON war in Religions ſa-
chen zu Wurmbs/ als jhm ſeine liebe Hauß-
fraw zu Wittenberg mit Tode abgieng/ An-
no Chriſti 1558. CATHARINA genandt.
Andere Interpretes oder Ausleger er-
klehren die Ankunfft Abrahams ſchlecht/
aus ſeiner vnterſchiedlichen Huͤtten/ daß er
aus derſelben kommen ſey in der Saræ Zelte.
Denn ſie wohneten alſo beyeinander/ daß ſie
doch abgeſonderte Zelten hatten/ wie zu ſehen
in dieſem erſten Buch Moſis im vier vnd
zwantzigſten Capitel.
Wie hat ſich aber der liebe Abraham
gegen ſeiner verſtorbenen Sara geberdet/


als er zu jhr kommen? Antwort/ der heilige
Patriarch iſt ſonder zweiffel auff jhr Ange-
ſicht gefallen/ vnd hat daſſelbige mit heiſſen
thraͤnen genetzet/ allermaſſen wie auch Gen.
am 50. cap. von dem lieben Joſeph vermel-
det wird/ daß er auff ſeines verſtorbenen Va-
ters Jacobs Angeſicht gefallen ſey/ daſſelbi-
ge gekuͤſſet/ vnd mit ſeinen Liebesthraͤnen be-
feuchtet hat. Vnd daran thut Abraham
gar recht vnd wol. Denn da helt er ſich nach
der Regel vnd Inſtruction des heiligen Gei-
ſtes im Buch Syrach am 38. Capitel:
Mein KInd/ wenn dir jemand ſtirbet/ ſo be-
weine jhn/ vnd klage jhn/ als ſey dir groß
leid geſchehen/ vnd verhuͤlle ſeinen Leib ge-
buͤhrlicher weiſe/ vnd beſtatte jhn ehrlich zu
Grabe/ du ſolt bitterlich weinen/ vnd hertz-
lich betruͤbet ſeyn/ vnd leid tragen/ darnach er
geweſen iſt/ auff daß man nicht vbel von dir
rede.
Solchem Exempel Abrahams haben
auch andere heiligen Gottes zu allen zeiten
trewlich nachgefolget/ Geneſ. am 50. bewei-
net Joſeph ſeinen lieben Vater Jacob/ vnd


weil die Egypter ſahen/ daß er ſo kleglich the-
te/ ſo trawreten ſie mit jhm/ vnd beweineten
den verſtorbenen 70. Tage lang. Deut. am
34. cap. beweineten die Iſraeliter gleicher ge-
ſtalt den Mann Gottes Moſen 30. Tage
lang. Johannis am 11. cap. da der Herr
Chriſtus ſiehet Martham vnd Mariam La-
zari Schweſtern jhren Bruder beweinen/
vnd die Juͤden dergleichen thun/ da gehen jhm
auch die Augen vber/ daß er mit jhnen wei-
nen muß. Actor. 8. hielten vber Stephanum
Gottfuͤrchtige Maͤnner eine groſſe klage.
Vnd im 9. cap. ward die verſtorbene Thabea
eine Juͤngerin des Herrn Chriſti zu
Joppen von allen Witweibern beweinet/ ſin-
temal ſie jhren Glauben mit Allmoſen vnd
andern guten wercken gegen jederman reich-
lich bewieſen hatte.
Doch wil in ſolchen trawren auch ge-
wiſſe Maß gehalten ſeyn/ daß mans nicht
vbermache/ wie die blinden Heyden gethan/
die von keiner Aufferſtehung gewuſt/ vnnd
derowegen ſolche lamentationes vnd weh-
klagen angeſtellet/ daß ſie jhnen ſelber dar-


vber das Hertz im Leibe vor trawrigkeit ab-
gefreſſen/ vnd alſo muthwilliger weiſe das
Leben verkuͤrtzet habẽ. Vns Chriſten aber be-
fihlet der weiſe Mann Syrach am 38. Capi-
tel/ daß wir vnſere Todten nicht vbermaͤſſig
betrawren ſollen/ in betrachtung/ daß ſie zu
ruhe kommen ſeyn/ vnd daß jhnen der Todt
kein ſchade/ ſondern viel mehr ein reicher ge-
winſt ſey/ druͤmb ſpricht er: Troͤſte dich auch
wieder/ daß du nicht gar zu trawrig werdeſt/
denn von trawren koͤmpt der Todt/ vnd des
Hertzens trawrigkeit ſchwechet die Kreffte
des Leibes.
Druͤmb ſehen wir allhie/ daß Abraham
der Vater aller gleubigen/ in deſſen Fußſtapf-
fen wir treten ſollen/ gebuͤhrliche maſſe im
trawren helt/ daß er der Melancholiſchen
ſchwermuth vnd trawrigkeit nicht vbermaͤſ-
ſiger weiſe nachhenget/ ſondern Moſes mel-
det von jhm/ daß er von ſeiner Leiche auffge-
ſtanden/ anzuzeigen/ wie es der heilige Am-
broſius weiland Biſchoff zu Meyland er-
klehret/ non diutius inhæ rendum eſſe mor-
tuis, ſed quantum ſatis officii deferendum,


daß man nicht in die lenge vber den Todten
liegen/ vnd ſich abhermen ſol/ ſondern Chriſt-
liche maſſe halten/ vnd ſich wiederumb troͤ-
ſten/ vnd mit den Leuten geſpraͤche vnd vnter-
redung halten/ wiehie Abraham mit den Kin-
dern Heth geredet hat. Denn da iſt nechſt
dem lieben Gebet faſt kein beſſer vnd beque-
mer Mittel/ ſich der vbermeſſigen vñ Heidni-
ſchẽ trawrigkeit zu entſchlagẽ/ als daß man
ſich enthalte der Einſamkeit/ vnd mit Leuten
vmbgehe/ ſonſten iſt der boͤſe Feind der Teuf-
fel ein Geiſt der Finſternis/ der mauſet gern
im finſtern/ vnd wo er in der Einſamkeit ei-
nem Menſchen ein Tuͤck beweiſen kan/ da hat
er ſeine beſondere luſt vnd frewde daran/ wie
man aus vielẽ Exempeln der heiligẽ Schrifft
zu erſehen hat/ vnd die taͤgliche erfahrung
bezeuget. Daher Salomon in ſeinem pre-
diger am 4. Capitel nicht vnrecht ſpricht:
Wehe dem der alleine iſt/ denn wenn er fellet
ſo hat er niemand der jhm wieder auffhelffe.
Allhie moͤcht ein einfeltiges Hertz ge-
dencken: Je lieber was hat wol Abraham
vor ein Antidoton vnd Artzney gebraucht/


damit er die vbermeſſige trawrigkeit aus
dem Sinne geſchlagen vnd vertrieben hat?
Antwort/ ſonder allen zweiffel hat er in der
furcht Gottes erwogen/ daß ſolche hinweg-
ruͤckung ſeiner lieben Saræ von niemand
anders herruͤhre/ als von dem lebendigen
Gott/ ohne deſſen willen auch nicht das klei-
neſte vnd geringſte Haͤrlein von des Men-
ſchen Haͤupt entfallen kan/ der leſſet die Men-
ſchen ſterben/ vnd ſpricht/ kommet wider jhr
Menſchen Kindern/ wie im 90. Pſalm ge-
ſchrieben ſtehet. Hats nun der Herr ge-
than/ Ey ſo kan Abraham nicht beſſer thun/
als er faſſe ſeine Seel mit gedult/ vnd ſpreche
mit dem lieben Hiob: Der HErr hats ge-
geben/ der Herr hats genommen/ der Na-
me des Herrn ſey gebenedeyet. So the-
te jhm auch der Prieſter Eli. 1. Samuel 3.
Da jhm Gott der Herr eine ſchwere zuͤch-
tigung ankuͤndigen ließ/ da ſpricht er: wolan
er iſt der Herr/ Er thue was jhm wolge-
fellet. So thet jhm auch der Koͤnig David/
2. Samuel 15. Hie bin ich/ der Herr ma-
che es mit mir wie es jhm wolgefellet. Vnd


Pſalm 39. ſpricht er: Ich wil ſchweigen/ vnd
meinen Mund nicht auffthun/ du Herr
wirſts wol machẽ. Ein ſolch Abrahams vnd
Davids Hertz ſollen wir nu auch faſſen/ vnd
allzeit auff den Herrn ſehen/ ſo wird vns
gar bald das Creutz gelindert/ vnd wie eine
ſchwere Laſt von Hertzen abgeweltzet wer-
den.
So hat auch Abraham vor ſich gehabt
die Exempel ſeiner lieben Vorfahren/ der
heiligen Patriarchen/ denen es auch nicht
beſſer gegangen iſt/ ſondern wenn ſie lange
mit jhren Haußmuͤttern in friedſamer vnd
geruhiger Ehe geſeſſen/ So iſt doch endlich
der Eheſcheider der Todt kommen/ vnd hat
ſie von einander getrennet/ vnd alſo an jhnen
das vrtheil Gottes exequiret/ Geneſ. 3. Du
biſt Erde/ vnd muſt zu Erden werden.
Sonderlich aber hat jhm ſein Hertz gar
gewaltig geſtercket die ſelige hoffnung der zu-
kuͤnfftigen Aufferſtehung/ vnd des ewigen
Lebens/ daß er feſtiglich gegleubet/ ſeine liebe
Sara werde nicht ewig da in der Erden lie-
gen/ vermodern vnd verfaulen/ ſondern der-


mal eins wiederumbaufferſtehen/ vnd in zu-
kuͤnfftigen ewigẽ Leben jhm wiederumb jn vn-
getrenneter geſelſchafft ewiglich beywohnen/
in maſſen ſich auch David zu friedẽ gab vber
ſeinem Todten/ 2. Sam. 12. da er ſagt: kan ich
jhn auch wieder holẽ? Ich werde wol zu jhm
fahren/ Es koͤmpt aber nicht wieder zu mir.
Was wir jetzt liebs vorhin ſchickẽ/ daſſelbige
finden wir dort in ehren vñ wonne vnverloh-
ren: Da heiſts nu/ wie man im ſprichwort
zu ſagen pfleget: Wieder kommen macht/ daß
manſcheidens weniger acht. Vnd das iſt das
ſanffte Tuͤchlein/ damit wir vber vnſern ver-
ſtorbenen noch heutigs Tags die Thraͤnen
von vnſern Augen abwiſchen/ vnnd vnſer
Hertz ſtillen/ daß es durch vbermeſſige traw-
rigkeit nicht gantz vnd gar außgedrucknet
vnd verzehret werde.
Nu wollen wir weiter vernehmen/ wie
Abraham ſeiner lieben Sara ein ehrlich be-
graͤbnis ausgerichtet hat. Denn er hat
von Ephron den Hethiter einen Acker mit
der zwiefachen Hoͤle/ (davon wir oben gehoͤ-
ret) vmb vierhundert Seckel/ das ſind ohne
gefehr/ zweyhundert Guͤlden vnſerer Muͤn-


tze gekaufft/ zu dem ende/ daß er vor ſeine liebe
Saram/ vor ſich ſelber/ vnd vor ſeine Nach-
kommen ein eigenthuͤmlich vnd Erbbegraͤb-
nis des Orts haben moͤge. Denn er hat ſie
nicht in die Graͤber der Cananitiſchen Voͤl-
cker wollen begraben laſſen/ vngeacht/ daß
ſich die Hethiter gegen jhm erbieten vnd ſpre-
chen: Begrabe deinen Todten in vnſern Ehr-
lichſten Graͤbern/ kein Menſch ſol dir vnter
vns wehren/ daß du in ſeinem Grabe nicht
begrabeſt deinen Todten. Das wil Abra-
ham nicht thun/ ſondern wie er bey ſeinem Le-
ben in der Religion von den Heidniſchen
Voͤlckern abgeſondert iſt/ alſo wil er auch im
ſterben von jhnen abgeſondert ſeyn/ vnd kei-
ne gemeinſchafft mit jhnen haben. Weihet
derowegen ſeinen newen Gottesacker vnd die
zwiefache Hoͤle mit ſeiner lieben Saræ tod-
ten Coͤrper ein/ die muſte die erſte ſeyn/ die an
dieſer heiligen ſtete jhr ruhbetlein hat.
Gleich wie nu Abraham ſeine liebe Sa-
ram ehrlich zur Erden beſtattet hat: Alſo ſol
Honor ſupremitatis, wie Marcellinus Am-
mianus die beſtellung des begraͤbnis nennet/


vns allen angelegen ſeyn/ daß wir die Coͤr-
per derer im Herrn ſelig verſtorbenen
ehrlicher weiſe zur Erden beſtatten/ weil die-
ſelbigen Tempel vnd wohnungen des heili-
gen Geiſts geweſen ſeyn/ vnd demnach auch
einer froͤlichen Aufferſtehung zum ewigen
Leben erwarten. Daher werden vnſere Graͤ-
ber/ vnd die darinne ruhende Leiber auch von
den Engeliſchen Frongeiſterlein trewlich be-
wahret/ wie Samuel der zweyen Himliſchen
Maͤnner oder Helden bey der Rachel jhrem
Grabe erwehnet/ damit kund vnd offenbar
werde/ daß der Herr auch ſeiner Todten
noch eingedenck ſey/ vnd es von jhnen nicht
heiſt/ wie David klaget vnd ſaget: Meiner
iſt vergeſſen im Hertzen wie eines Todten.
Vnd gleich wie Abraham endlich nach
dem er ſeinen lauff vollendet/ bey ſeiner lieben
Sara iſt begraben worden/ wie im fuͤnff vnd
zwantzigſten Capitel des erſten Buchs Mo-
ſis gemeldet wird/ welches er denn auch ſon-
der zweiffel alſo beſtellet hat: Alſo wollen
fromme Hertzen auch im Tode von den jhri-
gen vngeſcheiden ſeyn.


Der alte Tobias hats auch wollen ha-
ben/ daß man ſeine liebe Hannam nahe bey
jhm legen ſolle/ wenn Gott vber ſie gebieten
wuͤrde. So pflegte man vor zeiten die heili-
gen Martyrer ſamptjhren Glaubens genoſ-
ſen in einerley Gewelbe zu begraben/ weil ſie
miteinander vnter einem Creutzpanier ge-
ſtritten/ vnd in Jeſu Chriſto jhrem Feld O-
berſten den Teuffel/ Welt vnd Fleiſch vber-
wunden/ vnd den Sieg behalten hatten.
Vnd der ſtandhafftige Chriſtliche bekeñer
Churfuͤrſt Johann Friderich/ hochloͤblicher
gedechtnis/ als jm ſeine vielgeliebte Gemah-
lin Sybilla nach vberſtandenem ſchweren
Creutz mit Tode abgieng/ ſagte: Ich wil jhr
bald folgen/ befuhl auch/ man ſolt jhm hart
bey derſelben Grabſtelle einen Ort behalten/
do er neben jhr in Jeſu Chriſto ruhen vnd
ſchlaffen/ vnd einer froͤlichen aufferſtehung
abwarten moͤchte: Iſt auch fort am eilfften
Tage drauff/ nemlich den 3. Martti Anno
1554. ſeliglich abgeſchieden: Vnd ſo viel
auch kuͤrtzlich vom dritten vnd letzten Punct.

|| [051]

|| [052]

|| [053]

|| [054]

|| [055]

|| [056]

|| [057]

|| [058]

|| [059]

|| [060]

Darauff laſſen wir ſie nu ſchlaffen/
Vnd gehn all heim vnſer Straſſen/
Schicken vns auch mit allem fleiß/
Denn der Todt koͤmpt vns gleicher weiß.
Das helff vns Chriſtus vnſer Troſt/
Der vns durch ſein Blut hat erloͤſt/
Vons Teuffels gewalt vnd ewiger pein/
Ihm ſey Lob/ Ehr vnd Preiß allein.
AMEN.
ENDE.