Adresse: [3r] Dem allerdurchlauchtigsten, Großmechtigsten Konig vnd Hern, hern Friderico, Konig in Denmarck, Norweden [!], der Gotten vnd Wenden, Hertzog zu Schleswig vnd Holstein & Herr in Ditmarschen & Graffen zu Oldenborg vnd Delmenhorst & Vnserm aller gnedigsten Konig vnd Hern zuhanden.

[1r] Gnad, fried, ware vnd bestendige bekentnis des reinen Euangelii Jesu Christi, sampt vnsern vnderthenigen vnd allzeit willigen diensten zuuoran. Allerchristlichster, großmechtigster König vnd gnedigster Herr. Euer Konigliche Maiestath tragen gut wißen, das es ein notig, nutzlich vnd herlich ding ist, die geschichte welche sich in der welt in allerley sachen, landen vnd leuten zugetragen haben, aus gewißen vnd glaubwirdigen büchern konnen erforschen vnd erlernen. Den man in vielen hochwichtigen sachen notige erinnerung daraus nehmen kan, sonderlich aber ist am aller notigsten, das man die historia der waren Kirchen Gottes wiße vnd erhalte, daraus man Gottes sonderliche wercke, vnd wie Gott seine lere vnd rechte Gottesdienst offenbaret, erkleret vnd erhalten hat, auch wie der Teuffel zu allen zeiten sein vnkraut mit eingeseet vnd großen schaden gethan hat,1 sehen vnd lernen, vnd wo man bißweilen den nahmen des alten herkomens felschlich auff vnrechte lere oder Gottesdienst zeucht, richten vnd vrteilen kan. Wen man solche historien nicht wüste, were es vmb das menschliche leben ein armselig vnd blind ding. Was aber solche historien im alten vnd newen Testament fürnemlich aufgeschrieben, vnd biß auf vns komen sind, ist eine sonderliche vnd reiche gnade vnd gabe Gottes des almechtigen, vnd hat Gott Namhaffte Christliche Konig vnd herrn erwelet, welche keiner mühe, arbeit noch [1v] vnkosten gesparet, das sie solche geschichte durch geschickte leute haben laßen zusamen tragen. Demnach ist one zweiffel aller hohen potentaten, konig, fürsten vnd herrn in ampt noch, das sie auch nun in dieser letzten zeit, Vnsers lieben herrn vnd Heilandts Jesu Christi geschichte, wie a es hernacher in derselben verlauffen, helffen irem besten vermögen nach erhalten, auff das sie warhafftig beschrieben, vnd der Kirchen Christi biß an das ende der Welt gelaßen werde, dahin dan auch das gehoret, das Esaias sagt, Die Konige solen ernehrer der Kirchen sein.2 Derwegen haben wir E. Ko. Matt. herrn Vater hochloblicher vnd christlicher gedechtnis, vnd auch E. Ko. Matt. selbs, wie im Titel zubefinden, das erste buch der ersten Centurien der angefangenen Kirchen historien wollen in vnderthenikeit dediciren vnd zuschreiben,3 den darinnen der allerhochste Konig im himel vnd auff erden, mit seinem allerhechsten wercke, nemlich der erlosung des gantzen menschlichen geschlechts beschrieben wird, das wir nicht zweiffeln, es werde solche solch buch E. K. M. derhalben auch desto lieber sein. Darnach auch darumb, weil E. K. M. herr Vater, vns Christliche Verheißung gethan, da er von diesem vnserm fürnehmen bericht, wie E. K. M. Seelsorger M[agister] Heinricus Buscoducensis4 zu vns geschrieben, das seine Maiestath wolle Tausent thaler darzu geben, dauon wir dan vierhundert empfangen vnd zu der besoldung derer, so in der arbeit teglich[2r]sind neben andern zulagen vorlengst angewandt vnd ausgeben, Ja auch gnediglich vnd christlich laßen vertrosten ehe ein solch notig vnd nutzlich werck, vnkosten halben solte niderlegen, wolte Ire K. M. etwas mehrers darzuthun. Derwegen wir billich E. K. M. herrn Vater vnd E. K. M. haben wollen vornen an setzen, Vber das hat vns bewogen, das E. K. M: land vnd leutte, mit Gottes wort gar herlich versorget, vnd gleich als ein paradis des Herrn bluet, vnd als eine lobliche Kirche billich andern vorgehet. Bitten demnach E. K. M. wollen solche vnsere dedication vnd zuschreibung ir laßen wolgefallen, vnd weil wir nun teglich, souiel Gott gnad vnd geist verleihet, gerne wolten im angefangenen wercke vortschreiten, haben vnd halten auch noch zehen vnd mehr personen mit geburlicher besoldung, vnd gehoren dazu große vnkosten, arbeit vnd zeit, vnd haben darzu sehr wenig, die mit Jrer mildigkeit zuhulffe kemen, den der arme Lazarus Christus leidet allenthalben noth, Jtem weil solches wenig leute nicht ausrichten konnen, als verstehen wir vns in vnderthenigkeit, vnd bitten auch, E. K. M. wolle solch christlich fürnehmen mit helffen gnediglichst fordern, damit wir nicht vnkosten halben solche notig werck müßen fallen laßen. Zweiffeln auch nicht, E. K. M. werden E. K. M. herrn Vaters verheißung, vns mildiglichen genießen laßen. Letztlich wüntschen [2v] wir E. K. M. gottes schutz vnd regierung, eine reine vnbeschmutzte Kirche Christi im gantzen lande, friede, ruhe, einikeit, gluck vnd wolfarth an leib vnd Seel mit allen E. K. M. vnderthanen. Amen. Geben in Magdeburg den 19 Aprilis 1559.

E. K. M. vnderthenige Auffseher vnd regierer des Wercks der Kirchenhistorien welche alhie zusahmen getragen wird.

Ebelinch Alman Burgermeister yn der altenstat Magdeburch, meyn hanth.

Martinus Köppe derb Doctor mpp5

Johannes Wigandus pastor & Superatt. Magdeburgensis

Mattheus Iudex diener am euangelio Jesu Christi in der alten stadt Magdeburg.