[179v] Reverendo et clarissimo viro D[omino] Joanni Baleo Sudovolgio, Anglo, exuli propter Evangelium confessionem, Domino suo amanter colendo. Basileae commoranti. Salutem per Christum. Praedicavit nobis insignem tuam pietatem et humanitatem Guilhelmus noster, qui superiori anno quaedam de historico opere ad Oporinum deferebat, reverende et clarissime Balee.1 Praecipue vero iudicium tuum de laboribus nostris quantuliscumque, vehementer nos erexit et confirmavit. Haec omnia faciunt, ut non dubitavimus quidam pium officium a te petere: estque tale. Erunt nobis aliquando, suoque loco, commemorandae personae, quae hac nostra aetate illustres in ecclesia Dei sunt aut fuerunt. Cum autem verae historiae colligendae sint, ideoa putavimus quibusdam doctis et bonis viris scribendum esse, ut eos conatus iuvarent. Et cum tua industria toti ecclesiae Christi iam sit cognita, te inprimis rogamus, ne hac in parte nobis desis. Existimamus commodissime hoc negocium confici posse, si eiusmodi chartae talibus titulis insignitae quales iam exhibemus, ad homines candidos mitterem. Annota igitur nobis quaeso brevibus, sub illis titulis historiam tuam, ubi necesse est chartas plures insere: et roga nostro nomine d[ominum] Foxum, charissimum virum, ne gravetur idem praestare. Scripsi ad D[ominum] Lycosthenem, ut eadem ratione etiam quorundam aliorum illustrium virorum historiae nobis conficerentur, quam rem ut adiuves, etiam atque etiam petimus.2 Optaremus tamen secreta eam rem suscipi, neque cuilibet institutum manifestari, ne difficiliores sese nonnulli praestaret, et a malevolis malis calumniis aut obtrectationibus impediretur. Pro hoc officio utilissimo omnem gratitudinem una cum aliis cooperariis polliceor. Speramus d[ominum] Oporinum iam prola[180r]tum esse aliquot instituti operis Centurias, teque et D[ominum] Foxum amanter oramus, ut vestrum iudicium et correctiones libere nobiscum communicatis. Nihil enim nobis neque utilius neque iucundius esse potest, quam piorum de rebus gravissimis commonefactio. Bene in Domino vale. Clarissime vir Foxum reverenter salutamus. Magdeburgi secunda Martii, anno incarnationis Dominicae 1559. Johannes Wigandus, et suo et reliquorum cooperariorum nomine.