Adresse: [2r] Copj der verschreibung ettlicher Buecher halben gegen herrn doctor Caspar von Nidpruckh.1

[1r] Wir Camerer vnd Ratte der Statt Regenspurg, Thuen hiemit khundt, Als der Edl und Hochgelert Herr Gaspar von Nidbruckh, der Rechten Doctor, Khö[niglicher] M[a] j[estä] t vnd wirden zu Behaim Ratte, Vnser gunstiger lieber herr, vns angezaigt vnd zuerkennen geben, wie er ettliche buecher alhie hette, vnd jhme nit zuwider, das dieselben ein zeitlang gemainem nutze vnd den studiis zu gueten angewendt vnd gebraucht wurden, Vns auch solche buecher dermassen bevolhen vnd vertraut, das wir sie etlichen verstendigen gelerten leuthen, gleichwol auf geburende verschreybung, das die, nach einer bestimbten zeit, vns widerumb alhere geantwortet werden solten, alles nach vnsern selb guetachtn, vnd wie wir ditsfals ungeferlich jn vnsern aigen sachen zu handlen pflegten, vertrauen vnnd ausleyhen möchten, Bekhennen demnach an diesem Brief offenlich, das wir solches also zuverrichten dem gemainen nutze vnd studiis zu guetem an vnd auf uns genomen haben, wöllen auch hierjnn kainen fleiß vnterlassen, nach unserm besten verstandt die gemelten buecher gegen geburenden verschreybungen, wie obsteet, geschickhtn, gelerten leuthen auf ein zeit nach gelegenhait der sachen zuuertrauen, welche dieselben zu rechtem gemainen nutze gebrauchen, vnd vns [1v] on betrug wider zueschicken sollen. Wir versprechen auch, darob zu sein vnd fleissig anzuhalten vnd zu treiben, das solche außgeliehene buecher wider hieher gefurt vnd an jre geburendt ort alhie, da sie von vns entpfangen, geliefert vnd überschickht werden.a Alles treulich vnd on geuerde. Zu vrkhundt haben wir vnser vnnd gemainer vnser Statt Secret Jnsiglb zu ende diß c brieffs hifurgedruckht. Gescheen am freitag den 8. tag Marcii nach christ Vnsers lieben herrn gepurt jm 1555. jar.