Adresse: [2v] Herrn doctor Caspars von Nidbruckh gewaldt etlicher buecher halb. Praes. 8. Martzii Anno 1555.

[1r] ICH Gaspar von Nydbruckh der Rechten Doctor Rö[mischer] Kö[niglicher] M[a] j[estä] t etc. vnd Kö[öniglicher] W[ürden] Zu Behem etc. Houerath, Nachdem Jch allerlej Buecher gesamblet, vnd mit grosser muhe vnnd vnkhosten zu wegen bracht, vnnd aber solches alles derwegen von mir gescheen, darmit gemeinem nutz vnd den studijs dardurch gedient vnd die schuelen gefurdert wurden, vnd aber solches ins werckh nit mag bracht werden, wohe gemelte buecher verschlossen vnd nit gebraucht solten werden, dieweil ich nuhn auch solche buecher diser zeit noch zu Regenspurg ligen hab vnd selbst den gelerten leuten, so sie zu gebrauchen begeren mochten, jn meinem abwesen nit mittailen noch vergönnen khan, Bekhenn offentlich an disem brief, das Jch demnach meinen volmechtigen gewalt ubergeben vnd zugestelt hab, vnd thue solches hiemit wissentlich aller bester form einem Ersamen Rath der Statt Regenspurg, oder denen, so der jetzgemelt Rath darzue verordnen wurdet, mit meinen buechern zuhandlen und zu schaffen, wie er der Rath selb oder aber die, so darüber verordnet werden, fur rathsam und den studijs furdersam erachten mogen, also das sie solche buecher auf etlich jar gelerten fromen leuten außleihen vnnd vergonnen mogen, doch gegen geburlicher verschreibung, das dieselben buecher, nachdem man sich deren gebraucht vnd die bestymbte zeit verschinen, den gemelten von Regenspurg wider zugeschickht vnd vberantwortet werden, darob dan auch ein Ersamer Rath1 zu sein vnda anzuhalten vnd allen muglichen vleiß zur restitution furzuwenden versprochen hatt. Do aber sich vber kurtz oder lang bei solchen außgelihenen buechern einiger unrath zuetrueg, also, das sie gar oder zum theil durch feur, krieg oder in andere weg schaden nehmen oder auch verloren, geraubt, gestolen, aufgehalten oder sunsten etwas geschee, das solche buecher nit wider zur handt gebracht werden möchten, [2r] Das solches einem Ersamen Rath gegen menigclich on allen schaden und nachteil sein, vnnd deßhalben vonb niemandt angefochten werden solle, als treulich vnd on geuerde, zu Vrkhundt hab ich mich mit eigner hanndt vnderschriben, vnnd disen brief mit meinem Bedtschafft verfertigt. Gescheen zu Regenspurg den Achten Marcij Anno etc. 55. Gasp. von Nydbruckh.2