Adresse: [9737i.218v] τῳ ϕίλῳ

[9737i.217r] S[alve]. Accepi, vir clarissime, 20. Martii a te scriptas litteras, in quibus simul ad plures meas epistolas breviter respondes,1 quorum capita et ego iam breviter percurram.

1. Studiosum aliquem in Latium omnino esse mittenduma, facile utrique nostrum convenit; sed de certo homine sumptuumque magnitudine deliberatio gravis ac difficilis superest. Ego nullum magis idoneum novi nostro Lagueto, quem nuper circa medium Februarii Wismariae in nuptiis Mechelburgensis vidi.2 Reversus enim ex sua peregrinatione cum legato Polonico erat, egi protinus cum eo et meo et tuo nomine, ostendebat, se facilem fore, pollicebatur, se post quatriduum me consecuturum, dabat etiam satis magnum sacculum plenum vestibus et libris, ut opinor, ac rogabat, ut ad nos transportari curarem. Feci lubenter etiam ideo, ut quasi pignus quoddam apud me eius adventus haberem. Expectavi domi diebus quatuordecim: nullusb venit. Discedens domo reliqui ei litteras ad Heinzelium et ad te, reliqui etiam mandata seu instructionem, ut aulae vocant, superintendenti et Godescalco de ratione agendi cum eo ac spero, brevi istic fore. Dubito vero, an Italiam vel Gallias ablegandus sit. Nam ego propemodum praefero Tilium Romae, nec scio quemquam alium, qui ad eum recte mitti possit. Facilius qui Romae excerpat, invenero. Nam Lagnetus aulicus iam est, multorum vidit urbes et mores pernovit et necesse est eo ablegari hominem, qui tempori servire, et foro uti ac in hominum familiaritatem sese infirmare recte norit. Sed haec tu melius. Si ille istuc venerit, cum eo vel etiam post dies 20 deo volente mecum dispicies ac perpendes.

2. Cassandrum et Cornelium avide hic expecto, sicut et litteras Hechtii,3 ac doleo me nihildum de eis explorare posse, multo minus de eorum libris. Expectabo tamen adhuc forte octiduum ad summum; postea recta istuc testudineo gradu vel potius serpentina via. Cupio enim inspicere aliqua in via, non tamen nimis magna diverticula faciam.

3. Cum Balaeo4 coram agam, antequam hinc discedam: sed illud me excruciat, quod nihil habeo, quod bono ac egenti seni donare possim, ut tanto promptius laboraret. Pollicitus erat Hechtius se curaturum, ut Nassaviensis5 huc et libros et sumptus mittat, quos iam pridem sibi promiserat. Pollicitus etiam fuerat comes Reinhardus ab Eisenburgk Coelio pastori Mansfeldensi et doctori Johanni Cyringo, se quoque tum libros tum sumptus in hoc mercatu depositurum,6 sed, ut vereor, utraque me spes fallet. Utar igitur praesenti tempestate, ut commodissime potero; nam domi nisi 20 mihi ac comiti necessarios hac spe fretus acceperam.

[9737i.217v] 4. Cum Heruagii7 filio de conciliis sum locutus. Aliquam non tamen certissimam spem adesse video, si volet, laborandum modis omnibus est, ut et ϕούγ. sua ei communicent, atque utinam persuaderi eis possit, ut illi se patronos ac veluti mecenates eius editionis exhibere velint. Darent enim et libros tanto libentius et munus forte aliquod cunctanti typographo tanquam calcar adiicerent. Accederet forte et illud, quo tanto maiori cura ac diligentia omnia a doctis aliquibus in ordinem redigerentur. Vide igitur, quid per Gassarum efficere possis, Heinzelius etiam poterit aliquot idoneos cuniculorum fossores commonstrare. Omnino sane aliqua ratione ad nostrum istud institutum adiungendi sunt; nam in multis eorum opera nobis necessaria est, sicut ex meis litteris proxime datis intelliges.

5. Quod in Moscovia et Corsica laboras, recte facis, sed vide etiam, num Lugduni Waldensia et Mediolani Ambrosianas agendas vetustissimas nancisci possimus. Vide et alibi circumquaque multi fuerunt Waldenses in Austria ante 200 annos, extat alicubi dirutum templum non procul a Newstade, quod “der ketzer kirchoff” appellari audio.

6. Balaeus nullas litteras misit, sed in iis, quas mihi et Alesio8 inscripserat, mec tibi quaedam indicare iusserat, quod & factum esse opinor. Allatae vero illae litterae fuerant primum Alesio, is eas Islebium ad Sarcerium legendas miserat, unde ego demum accepi. Itaque monebo hominem, ut posthac mihi soli scribat, ne litterae cum periculo hominum aut negotii aperce per alienas manus vagentur.

7. De Palatino coram; nam istinc porro ad eum.9 Tu interea cogita de litteris Wirtembergensis vel aliorum, quibus permolliri possit; nam ego non duos verum circiter 30 cupio accipere.10 d Affert alioqui Mechelburgensis commendationem. Turpe est eum iam adeo frigere, vel etiam alieniorem esse, cum aliquot suis litteris me ultro hortatus sit et libros etiam promptissime pollicitus; urgebo coram deo volente eius promissa. Hincmarum, quamprimum deo favente domum rediero, remittam et aliqua alia, quae nos meliora invenimus.11

8. G[uilielmum] de Sancto Amore et Bredewardinum ac alios optarim et ego integros prodire.12 Prolixum illud volumen de Sancto Amore inveni etiam Brunsvigae,13 sed non est tam bonum, ut tuum; facile tamen inde corrigi ac typographo dari posset. Videbo tamen ac laborabo.

9. Cautionem affere non possum, propterea, quod in mercatu demum litteras accepi, alioqui si domi nactus fuissem, nihil esset in mora. Reversus tamen postea mox de omnibus secundum ϕ sententiam cavebitur.

10. De Luca Rem14 Noribergensi nihil scio, quare tu vide de eo et de Georgio Romano15 eiusdem loci senatore. 4. Aprilise Coloniae.

T[uus] Petrus Hoppius.