[9737k.280r] D[omino] Marco Wagner. Accepi quas in festo Pentecostes et corporis Christi1 ad me dedisti, charissime Domine Marce, et respondeo ad singula capita. Dionisium Areopagitam nondum ad manus meas recepi.2 Scripsi tamen in Prussiam ut remittatur, aut indicetur, ubinam iaceat. Nam is cuius fidei commiseram, in Prussiam abiit. Ex chronicis proxima hieme, Deo volente, curabo excerpi, quae instituto conveniunt.3 Prolixum illud Martyrologium studiosus aliquis percurret et faciet extractum, ut petis, pars quaedam tantum est Martyrologii. Fuldae sunt aliquot talia volumina et singulis mensibus unus liber deputatus est. Libros, quos remiserunt in reditu meo huc Ratisbonam, videbo et expungam.4 In chyrographo nullum credo esse, quem non acceperis. Catalogum etiam tuum misi a una cum fasciculo et rogo, ut eundem remittas. Admonebis etiam inspectores huius negotii, ut remittant ea quae specialiter tibi designaveram, item Apologiam pro Ludovico quarto et quae praeterea in memoriali tibi adnotavi.5 Fac subinde per N[icolaum] G[allum] b ad me quam primum mittas quae recenter excudentur, curabo restitui sumptus. Datae Ratisbonae 12. Julii 57. T[uus] Caspar á Niedbruck D[octor].c