|| [004]

GEliebte vnd betruͤbte Chriſten/ Was
der liebe David ſaget im 94. Pſal. Jch hatte
viel bekuͤm̃ernuͤſſe in meinem Hertzen/
Aber deine Troͤſtungen ergetzeten mei-
ne Seele. Item im 71. Pſal. Du leſſeſt mich er-
fahren viel vnd groſſe Angſt/ vnd machſt mich
wieder lebendig/ vnd holeſt mich wieder aus
der tieffe der Erden herauff. Das hat auch er-
fahren vnſere liebe ſehlige Mit-Schweſter/ alhier
fuͤr vnſern Augen eingeſarckt ſtehende/ die weiland
Erbare viel Thugendreiche Fraw Barbara / des
Ehrnveſten vnd Namhafften Herrn Caſpar Seif-
ferts/ fuͤrnemen Buͤrgers vnd Handelßmans alhier
geliebte Ehe-Fraw/ O wie lang bey 6 gantzer Jah-
ren hat ſie vnter dem Creutz des HErrn Chriſti
ſtehen/ vnd ein gut theil deſſelben tragen muͤſſen.
Vnd ob gleich bißweilen die Vngedult ſich gewit-
tert/ hat ſie ſich doch dieſelbe nicht niederdruͤcken
laſſen/ ſondern ſich wieder auffgerichtet/ vñ Gott in
ſeinem Wort mit warhafftigem glauben ergriffen/
ſich als eine rechte buͤſſende Suͤnderin erzeiget. Vñ
je mehr jhr Gott ſuͤnde vergeben/ je mehr ſie Gott
geliebet/ vnd demſelben jhr langwieriges Creutz ge-
duldig nachgetragẽ/ Darumb auch zu jhrem Leich-
themate der abgeleſene Spruch aus dem 119. Pſal.


zu erkleren von mir iſt begehret worden/ Wo dein
Geſetz nicht mein Troſt geweſt were/ ſo were
ich vergangen in meinem Elende. Jch wil dei-
nen Befehl nimmermehr vergeſſen/ denn du
erquickeſt mich damit. Wir wollen darauß ab-
handeln 2. Stuͤcke:

• I. Welches aller Chriſtlichen Creutztraͤgern eini-
  ger troſt/ labſall vnd erquickung ſey.


• II. Wie ſie ſich gegen demſelben verhalten ſollen.

Der HErr Jeſus Chriſtus/ der Vorgaͤnger al-
ler Chriſtlichen Creutztraͤger/ verleihe dazu Gnad
vnd den Heyligen Geiſt/ Amen.

De Primo.

DAs die Chriſten muͤſſen Creutztraͤger
ſein/ iſt auſſer allem zweiffel. Qui vult eſſe
Chriſtianus, ſit Crucianus/ hat Herr D.
Lutherus pflegen zu ſagen/ Wer ein Chriſt
ſein wil/ derſelbe muß auch ein Creutztraͤger ſein/
Denn Gottes Wort bezeuget es/ Syrach c. 2. ſaget:
Mein Kind/ wilt du Gottes Diener ſein/ ſo ſchi-
cke dich zur anfechtung. Matth. 16 ſpricht der
HErr Chriſtus: Wil mir jemand nachfolgen/


der verleugne ſich ſelbſt/ Er nehme aber ſein
Creutz auff ſich/ vnd folge mir nach. Zun Hebr.
am 12: Mein Sohn achte nicht geringe die zuͤch-
tigung des HErrn/ denn welchen der HERR
lieb hat/ den zuͤchtiget er/ Er ſteupet aber einen
jeglichen Sohn/ den er auffnim̃t/ ſo jhr die zuͤch-
tigung erduldet/ ſo erbeut er ſich euch als Kin-
dern/ Denn wo iſt ein Sohn/ den der Vater
nicht zuͤchtiget/ ſeid Jhr aber ohne zuͤchtigung/
welcher ſie alle ſind teilhafftig worden/ ſo ſeid
jhr Baſtarte/ vnd nicht Kinder. Sehet an die
Exempla der lieben Heyligen/ welches ſind die groͤ-
ſten Heyligen geweſen im Alten Teſtament? Der
Prophet Ezechiel erzehlet jhr drey/ Noah/ Daniel/
Job/ Noah war ein ſehr geplagter Mann/ er muſte
der erſten Welt die Buß predigen/ jhr den vnter-
gang verkuͤndigen/ den Kaſten bereiten/ daruͤber
ward er veracht vnd verlacht/ Er muß ein gantzes
Jahr vber dem Waſſer leben vnd ſchweben/ wird
hernach von ſeinem eigenen Sohn dem Cham ver-
ſpottet. Daniel der liebe Mann Gottes muß we-
gen ſeiner Gottesfurcht in den Loͤwen graben ge-
deyen. Job der rechte vnd ſchlechte Mann koͤmpt
vmb Haab vñ Gutt/ Camel/ Eſel/ Schafe/ Rinder/
ja dazu vmb ſeine liebe Kinder/ Wird von ſeinem


eigen Weibe dazu geſpoͤttert. Moſes iſt getrew in
dem gantzen Hauſe des HErrn/ Noch iſt er ein ſehr
geplagter Menſch geweſen vber alle Menſchen auff
Erden/ Num. 12. Jm Newen Teſtament/ wahr
nicht Johannes der Taͤuffer ein heyliger Mañ/ das
ſeines gleichen nicht geweſen võ Weibern geboren?
Wie gehets jhm/ er muß in den Kercker kriechen ein
gantz Jahr vnd 3. Monat darinnen ſtecken/ biß er
endlich vnter ſeinem Kopff hingehẽ muͤſſen: Recht
vnd wohlſaget S. Auguſtinus: Surgat venerabilis
Pater Adam cum omnibus filiis ſuis, & uno ore lo-
quantur, utrum in hac vita gaudium habuerint ſine
dolore, pacem ſine diſcordia, quietem ſine metu, ſani-
tatem ſine infirmitate &c. Es ſtehe auff vnſer aller
Vater Adam mit allen ſeinen Kindern/ vñ man frage
einẽ nach dem andern/ ob ſie in dieſem lebẽ freud one
leid/ friede ohne ſtreit/ ruhe one furcht/ geſundheit
ohne kranckheit gehabt/ Warlich ſie werden alle
mit einem Nein antworten/ ein jeder wird vber ſein
Creutz zu klagen wiſſen/ Vñ zwar das Creutz macht
rechte Chriſten/ Wie die Rutte fromme Kinder/
Denn durchs Creutz wird beweret vnd probiret
vnſer glaube/ gedult/ hoffnung/ beſtendigkeit/ etc.
Ein Goldſchmied/ Wenn er aus dem Gold oder
andern Metall ein ſchoͤn reinlich gefaͤß machen wil/
O wie offt leſſet er das Gold in ſeinem Schmeltz-


Tiegel durchs Fewer gehen/ damit der vntuͤchtige
Schaum davon geſchieden werde/ Alſo wolt Gott
gern an vnd auß vns haben feine vnd reine Ehren-
gefaͤß in ſeinem Hauſe/ Darumb leſt er vns auch of-
te durchs Fewer der Truͤbſal gehen/ damit der vn-
tuͤchtige Schaum aller Vntugend vnd anklebende
Suͤnde von vns wohl abgetrieben werde/ Wie
Sirach ſaget: Gleich wie das Gold durchs Few-
er/ Alſo werden die/ ſo Gott gefallen/ durchs
Fewer der Truͤbſal beweret.
Was ſol nu eines ſolchen Creutztraͤgers troſt/
labſal vnd erquickung ſein? Darauff beſcheidet vns
der liebe David/ weiſet vns auff ſein eigen Exempel/
ſagende: Wo dein Geſetz nicht were mein Troſt
geweſen/ So were ich vergangen in meinem
Elend/ Wil ſagen/ wie es einem abgematteten muͤ-
den Fußgaͤnger gehet/ wenn er in ſeiner muͤdig- vnd
mattigkeit dahin fellet/ vnd man demſelben nicht
mit einem Labetruͤncklein zu huͤlffe koͤmpt/ ſo muß
er verſchmachten/ vnd vergehen: Alſo were mirs
auch ergangen in meinem vielfaͤltigen elend/ wenn
Gottes Wort nicht das beſte bey mir gethan/ ſo
were ich hundert mahl vergangen/ vnd vmbkom-
men. Wenn allhier David ſaget/ niſi lex tua fuiſſet de-
lectationes meæ : Wenn dein Geſetz nicht were mein
Troſt geweſen/ So meinet er nicht bloß das Geſetz/


O das Geſetz an ſich ſelbſt wircket wenig troſt/ es
wircket nur zorn/ Rom. 4. Denn wenn das Geſetz
den Suͤnder anklaget/ da wird jhm angſt vnd ban-
ge/ wird zornig auffs Geſetz/ wolte lieber/ das kein
Geſetz were/ So wird allhier durchs wort Geſetz/
das im Hebraiſchen Thorah geleſen wird/ verſtan-
den die gantze Lehr der Chriſtlichen Kirchen/ vnd
fuͤrnemblich das Euangelium/ denn daſſelbe iſt Læ-
tum nuncium, quo peccatores ad indulgentiam vocantur,
wie Auguſtinus ſaget: Eine froͤliche Botſchafft/
dadurch dem Suͤnder vergebung der Suͤnden an-
gekuͤndiget wird/ Diß wort des Euangelij iſt nun
vnſer Troſt/ Wie der Prophet Jerem. ſaget/ c. 15:
Jn des enthalt vns dein Wort/ wenn wirs krie-
gen/ Denn daſſelbe dein Wort iſt vnſers Her-
tzen frewde vnd troſt. Vnd Eſaiæ am 38. c. ſaget
Hiskia: Davon lebet man/ vnd das leben mei-
nes Geiſtes ſtehet gar in demſelbigen. Non est
locus quietis, niſi in verbo Dei / ſaget Auguſtinus: Nir-
gend beſſer kan ſich ein Menſch zu frieden geben/ als
wenn er Gottes Wort fuͤr ſich hat. Saget doch
dorten im 1. Buch Sam. c. 14. das kluge Weib von
Thekoa zu David: Deine Magd gedachte: Mei-
nes Herrn des Koͤniges wort ſol mir ein troſt
ſein. Wie viel mehr ſol vns Gottes des HErrn/
des Himmel-Koͤniges Wort ein troſt ſein?


Ein mahl iſt Gottes Wort vnſer Troſt in æ-
rumnis/ in noͤten vnd truͤbſalen. Koͤmpt ein Menſch
in groſſe noth vnd wiederwertigkeit/ hat aber Got-
tes Wort fuͤr ſich/ ſo wird jhm wohl/ wie ein Wan-
derßmann/ wenn derſelbige bey geſchlagener nacht
auff vnbekanten wegen wandert/ wird jhm bange/
wenn ſich etwas reget/ ſo meinet er/ der Feind ſey
ſchon hinder jhm her. Aber wenn die Morgenroͤt
anbricht/ vnd beginnet licht zu werden/ da wird jm
wohl. Alſo iſt Gottes Wort vnſer Troſt/ wenn
wir in noͤten ſein. Denn ein ſolcher ſpricht mit dem
lieben David/ Pſal. 23: Wenn ich ſchon wandert
im finſtern Thal/ fuͤrcht ich kein Vngluͤck/ deñ
du biſt bey mir/ dein Stecken vnd Stab troͤſten
mich. Du haſt geſprochen/ Pſal. 91: Cum ipſo ſum
in tribulatione, Jch bin bey jhm in der noth/
ich wil jhn herauß reiſſen/ vñ zu ehren machen.
Nun du biſt ja ein getrewer warhafftiger Amens
Gott/ du kanſt nicht liegen noch triegen/ Darumb
glaͤube ich feſtiglich/ du werdeſt auch mit/ vnd bey
mir ſein in meiner noth.
2. Gottes Wort iſt vnſer Troſt in tentationi-
bus, in den ſchweren anfechtungen/ Wenn der leidi-
ge Teuffel dem Menſchen ſeine begangene Suͤnde
exaggeriret / vnd auffmutzet/ helt jhm fuͤr ſein groß


Suͤnden-Regiſter/ denn einen ſolchen Proceß helt
der leidige Teuffel mit einem Menſchen/ Erſtlich
reitzet er jhn zur Suͤnde: Pecca / ſuͤndige nur getroſt/
verbꝛinge deines fleiſches luſt/ wer ſihets/ wer wird
es erfahren? Darnach blaͤſet er dem Menſchen ein
perſevera/ fahr nur getroſt fort in deinen Suͤnden/
gebrauch dich deiner Jugend/ deines Geldes/ dei-
ner Geſellſchafft/ Aber entlich raumet vnd blaͤſet er
dem Menſchen ein deſpera/ verzage nur in deinen
Suͤnden/ du darffeſt dich keiner Gnaden zu GOtt
verſehen/ denn Gott iſt ein eiveriger Gott/ fuͤr dem
der Suͤnder nicht bleiben noch beſtehen kan/ Wie-
der ſolche Anfechtung dienet Gottes Wort. O wie
war es dem lieben Apoſtel Paulo ſo ein angenehmes
Wort/ da er in cribro Sathanæ ſteckte/ vnd jhn des
Sathans Engel mit Feuſten ſchleget/ vnd aber der
Sohn GOTtes alſo zu jhm ſaget: Sufficiat tibi
gratia mea: quia virtus mea in infirmitate perficitur,
Laß dir an meiner Gnade genuͤgen/ denn mei-
ne Krafft iſt in den Schwachen maͤchtig. Wir-
ſtu angefochten mit der Vielheit deiner Suͤnden/
ſprich mit S. Paulo: Ubi abunda vit delictum, ibi ſuper-
abundavit gratia, Wo die Suͤnde maͤchtig iſt/ da
iſt die Gnade viel maͤchtiger. Ob bey vns iſt der
Suͤnden viel/ bey Gott iſt mehr der Gnaden/ Sein
Hand zu helffen hat kein ziel/ wie groß auch ſey der


ſchaden. Schoͤn vnd denckwuͤrdig ſaget S. Augu-
ſtinus: Etſi ego commiſi unde me damnare potes, tu non
amiſiſti, unde ſalvare ſoles: Ob ich wohl ſo viel Suͤn-
de begangen/ daß du mich mit gutem fug vnd recht
in die Hoͤlle ſtoſſen moͤchteſt/ ſo haſtu doch die krafft
nicht verlohren einen Bußfertigen Suͤnder ſehlig
zu machen.
Zum III. iſt Gottes Wort vnſer Troſt in lang-
wierigen Siech-tagen. Es ſaget wohl recht der
liebe Syrach c. 30: Der Todt iſt beſſer denn ein
ſiech Leben/ vnd ſtaͤte Kranckheit. O wie ein
ſchwer Creutz iſt es lange ſiechen/ geſund vnd friſch
ſein iſt beſſer denn Gold/ vnd ein geſunder Leib iſt
beſſer denn groß Gutt. Was iſt aber einem ſolchen
ſtetſiechenden Menſchen anmuttiger/ als GOttes
Wort/ Durch ſein Wort gibt GTOT[sic!] den Muͤden
krafft/ vnd ſtaͤrcke genung den Vnvermoͤgenden/
Eſa. 40. Jſt das nicht ein kraͤfftiger Troſt einem
Krancken. Eſa. 46. Jch wil euch tragen biß ins
Alter/ biß jhr Graw werdet/ Jch wil es thun/
Jch wil heben vnd tragen/ vnd erretten. Hie
erbeut ſich Gott gegen den Krancken/ das er mit
jhnen procediren wolle/ wie eine Mutter mit einem
ſchwachen Kindlein/ Je ſchwaͤcher das Kind/ Je
mehr die Mutter fuͤr daſſelbige ſorget/ hebet/ pfle-


get/ vnd wartet deſſelben. Wie war vnſer lieben
ſehligen Mit-Schweſter Gottes Wort ſo ein lie-
bes angenehmes Labſal/ jhrem Mund vnd Hertzen
ſuͤſſer denn Honig vñ Honigſeim/ Wenn derſelben
ſchoͤne Bibliſche Troſt-Spruͤche vorgehaltẽ wor-
den/ Als Joh. 3. Alſo hat Gott die Welt geliebet/ ꝛc.
da kunte vñ wuſte ſie dieſelben jhr fein zu appliciren.
Jch glaͤube auch/ Das Gott ſeinen Sohn mir ge-
ſchenckt/ vnd gegeben/ Ey ſo werde ich nicht verlo-
ren werden/ ſondern auch haben das Ewige Leben.
Jch werde Gott auch ſehen in meinem Fleiſch.
Wie werd ich denn ſo froͤlich ſein/
Werd ſingen mit den Engelein/
Vnd mit der Außerwehlten Schaar
Ewig ſchawen dein Antlitz klar.
Da da werd ich angethan werden mit weiſſem
Kleide/ werde Palmen haben in meinen Haͤnden/
O kom HErr Jeſu/ kom nur bald/ ꝛc. Vnd wenns
gleich weret biß in die Nacht/ vnd wieder an den
Morgen/ Doch ſol mein Hertz an Gottes macht/
verzweiffeln nicht noch ſorgen/ ꝛc.
Endlich iſt Gottes Wort vnſer Troſt in Agone/
in vnſerm letzten hinſcheiden. O wie wohl ſtirbet
der Menſch/ der den troſt Goͤttliches Worts fuͤr
ſich hat. Simeon der Geiſtreiche Senior/ Luc. 2. be-
geret abzuſcheiden ſecundum verbum Domini/ nach


dem Wort deß HErrn. Wer auff Gottes Wort
einſchlaͤffet/ O wie wohl wird derſelbige ruhen.
Chriſtus ſpricht Johan am 8: Warlich/ Warlich
ich ſage euch/ ſo jemand mein Wort wird hal-
ten/ der wird den Todt nicht ſehen ewiglich.
Je feſter du Gottes Wort helſt in deinem hinſchei-
den/ Je weniger du den Todt fuͤhlen wirſt. D. Lu-
therus ſchreibet alſo in ſeiner Kirchen-Poſtill hie-
von/ Da die Kinder Iſraël aus Ægypten zogen/ vnd
an das Rothe Meer kamen/ waren ſie frey/ fuͤhleten
keinen todt. Aber da der Koͤnig Pharao hinder ſie
kam/ mit aller Macht/ da ſtunden ſie mitten im tode.
Denn fuͤr ſich hatten ſie das Meer/ dadurch ſie nicht
kunten kommen/ hinder ſich den Koͤnig Pharao/ zu
beiden ſeiten hoch Gebirge/ da waren ſie im todt
gefangen/ vñ beſchloſſen. Da aber Moſes jhnen Got-
tes Wort brachte/ vnd ſie troͤſtete/ Fuͤrchtet euch
nicht/ ſtehet ſtille/ denn jhr ſolt ſehen/ welch groſſen
Sieg euch Gott geben wird/ An diß Wort hielten
ſie ſich/ glaͤubeten es wuͤrde alſo geſchehen/ vnd gien-
gen darauff mittẽ durchs Rothe Meer. Alſo vber-
windet der Menſch den Todt durchs wort des le-
bens. Alſo wenns mit dir auch dazu kom̃en wird/
daß du an das rothe vnd todte Meer wirſt geſtellet
werden/ vnd ſolt hindurch/ ſo gedencke an dieſe Hi-
ſtoriam/ vnd halt dich feſt an das Wort Chriſti/

Joh. 10: Jch gebe meinen Schafen das Ewige
Leben. Item Joh. 11: Jch bin die Aufferſtehũg
vnd das Leben/ Wer an mich glaͤubet/ der wird
lebẽ/ ob er gleich ſtuͤrbet/ So wird dir der HErr
gewißlich auch helffen durch das todte Meer/ vnd
wird dich bringen an den Port vnd Vfer des rech-
ten Gelobten Landes/ in terram viventium/ in das
Land der Lebendigen/ da frewde die fuͤlle/ vnd ein
liebliches weſen ſein wird zur Rechten des HErrn
ewiglich.

De Secundo.

WJe ſol man ſich nu gegen ſolchem troſt-
wort verhalten? 1. Aſſiduè meditando,
man ſol es ſtetiges betrachten/ Vnd mit
Maria der Mutter des HErrn ſolche woꝛt
im Hertzen behalten. Denn ſehlig iſt der Mann/
qui legem Domini meditatur die ac nocte, der Tag
vnd Nacht mit dem Geſetz des HErrn vmbgehet.
Es ſol diß Wort reichlich vnter vns wohnen in al-
ler Weißheit/ Coloſ. 3.
Zum 2. Studioſè recolligendo, man ſol es fleiſſig
einſamlen. Wenn wir noch friſch vnd geſund ſein/
ſollen wir vns einen guten Schatz ſchoͤner Troſt-


Spruͤche Chriſtlicher Gebetlein einſamlen/ Denn
Qui in æſtate colligit, prudens eſt, Wer im Sommer/
das iſt in guter zeit ſamlet/ der iſt klug/ Proverb. 10.
Non enim facilè in adverſitate inveniuntur præſidia,
quæ in pace non fuerint quæſita, ſaget S. Auguſtinus:
Wer ſich erſt wil mit Ruͤſtung verſehen/ wenn der
Feind verhanden/ der hat zu lange geharret. Was
thut ein fleiſſiger Hauß-Vater/ wenn derſelbige et-
wa im Hauſe einen Nagel/ ein Hefftlein/ ein Nadel
ſiehet liegen/ er hebt es auff/ gedenckt/ man kan es
wohl ein mahl gebrauchen/ Alſo ein fromer Chriſt/
wenn er einen ſchoͤnen Troſt-Spruch hoͤret/ er faſ-
ſet/ vnd behelt jhn/ gedencket/ er wird mir auch ein
mahl nuͤtze werden. S. Chryſoſtomus gibt ein an-
der gleichnuͤß/ vnd ſaget/ Wenn einer mit ſeinem
Waſſerkruge zu einem Bruñ gehet/ Waſſer zu ſchoͤp-
fen/ ſo gibt er gute achtung darauff/ das nicht allein
beym Waſſerbruñ ſein Gefaͤß voll ſey/ ſondern das
ers auch voll zu Hauſe bringe/ vnd des Waſſers zu
ſeiner noth gebrauchen koͤnne: Alſo ſollen die Chri-
ſten auch geſinnet ſein/ das Krieglein jhres Hertzens
ſol nicht allein des Troſt-waſſers aus den Bruͤnlein
Jſraelis voll ſein/ weil ſie Gottes Wort hoͤren/ ſon-
dern ſollens auch fleiſſig bewahren/ vnd behalten in
jhrem Hertzen.
Vnd daß iſt das 3. wie ſich die Chriſten gegen
Gottes Wort verhalten ſollen/ Nemlich/ tenaciter,


& fideliter retinendo, wie hie David ſaget: Jch wil
deinen Befehl nimmermehr vergeſſen/ Ein vergeß-
licher Menſch/ wenns zum hinſcheiden koͤmpt/ wo
her wil er troſt nehmen/ weil auch offt einem fleiſ-
ſigen der troſt entfallen kan? Darumb ſol ſich ein
Chriſt alſo gewehnen/ das er taͤglich in ſeinem Ge-
bet vnd Andacht/ die bekanten Spruͤche ſeinem her-
tzen vorſpreche/ das ſie jhm deſto gelaͤuffiger ſein in
der letzten noth. Vnſere Wiederſacher im Bap-
ſtumb pflegen den Sterbendẽ ein geweihetes Licht
in die Hand zu geben/ mit dieſen worten:

Nim hin das Licht in deine Hand/
Vnd fahr damit ins Vaterland.

Wie aber/ wenns Licht außgienge/ vnd verleſche/
wie es denn außgehen muß; Wo wil der arme
Menſch hinfahren? Gottes Wort iſt ein Leuchte
vnſer Fuͤſſe/ vnd ein Licht auff vnſerm Wege/ wel-
ches nicht außgehet noch verliſchet/ denn das wort
des HErrn bleibet ewiglich/ Vñ die ſich mit feſtem
Glauben an daſſelbige halten/ darauff leben vñ ſter-
ben/ die ſollen auch bleiben Ewiglich.

Die auff den HErrn hoffen/ werden nicht
fallen/ ſondern Ewig bleiben/ wie der Berg
Sion. Stehet im 125. Pſal.

|| [020]

|| [021]