[↔]

ODE VIII.

↑

IN BARINEN.

↑

[↔]
VLLA si juris tibi pejerati
Poena, Barine, nocuisset unquam;
Dente si negro fieres, vel uno
Turpior ungui; [↔]
Crederem: sed tu, simul obligasti
Perfidum votis caput, enitescis
Pulchrior multo, juvenumque prodis
Publica cura. [↔]
Expedit matris cineres opertos
Fallere, et toto taciturna noctis
Signa cum coelo, gelidaque Divos
Morte carentes. [↔]
Ridet hoc, inquam, Venus ipsa; rident
Simplices Nymphae, ferus et Cupido,
Semper ardentes acuens sagittas
Cote cruenta. [↔]
Adde, quod pubes tibi crescit omnis,
Servitus crescit nova: nec priores
Impiae tectum dominae relinquunt,
Saepe minati. [↔]
Te suis matres metuunt juvencis,
Te senes parci, miseraque nuper
Virgines nuptae, tua ne retardet
Aura maritos.