Anna Bülow fratri Vicken ad 2as nuptias.

Jesum Christum, den keyserliken groten mechtigen heren unde gnedigen, riken fursten etc. GT fratris littera1

Alderleveste N, wy hebben vorvoren, dat du in korte van schickinge wedder des levendes gan wult wedder vornien den eerliken stad des hilligen echten levendes, so do wy dyner leve fruntliken weten, dat wy derhalven hochliken irfrouwed synt in God dem heren, wente wy up deser eerden nemen lever hebben, alse dy; worumme hadden wy wol hapet, dat du uns, de wy jo dyne leve susteren synt, sodane froude heddest vorkundigen laten, up watte tyd de kost wesen schol, deme so nicht ghescheen is. Unde alse du nu sunder al twivel van noden io must unse negheste frunt unde ander lude to dyner werschopp laden, so were dat wol billick unde recht, dat wy dy de aldernegesten schollen wesen, wan us dat so ghelegen were.

Aver nachdem dat wy myd fryem willen alle wollust, frouden unde frolicheit der ganten werlt umme unser alderlevesten brudegam willen hebben vorsmadet unde avergelaten, so enkonnen wy persoͤnliken nicht to dyner kost kamen. Ock so enhebbe wy noch golt vel sulver,2 dat wy dy unse gave konden senden unde mothen dy eren myd enem clenade .

Doch so twinget us de angheborne naturlike leve darto, dat wy dy unse kyntlike scrift moten senden unde wy doth dyner leve witlik, dat wy in unsem othmodigen bede to dyner kost hebben gheladen unde beden den riken woldigen koninc van engeland, Jesum Christum, unsen aldervesten schoͤn brudegam, de in syner ewigen wysheit van ewigen tyden heft uterwelet des riken, woldigen fursten unde groten [Lage 12, fol. 1v] koningesa dochter van Brittannien, alse de edele, avermaten schone junchvruw sunte Ursula, de he so wunderwise myd elvendusent junchvruwen unde myd anderem velem volke heft gheesschet to der kronen der marter. Desulve mote myd alle den leven junchvruwen unde koninges kynderen voͤrghenomet unde myd dynem leven hilligen apostel sunte Andreas,3 myd dem hilligen bischop sunte Nycolaus unde myd al synen engelen unde leven hilligen kamen to juwer werschopp unde mote juw sulven hilgen seghen unde benedieden myd syner gotliken volbordigen vorderen hant, alse he in demb olden testamente synen uterkoren frunt Abraham benediede, do he also to eme sprak: „Suspice celum etc.“4 Unde ok alse he benediet Ysaac unde Jacob unde al de leven patriarchen unde propheten, dar he na der mynscheit sulven wolde van ghebaren werden, den he gaf avervlodigen vormeringe in koͤrne, in wyne, in olye unde in anderen tydliken guderen. Also mote he juw ock geven den hemelschen invlote syner gotliken gnaden, dat gy juwe stath in synem soten namen so moten annemen in ener luckliken, saligen stunde unde al de tyd juwes levendes in syner hulde unde gnade, in syner leve unde in syner frucht, in lucke, ere unde in gude, in eynsamicheit, truwe unde leve, in vrede unde in eyndracht so moten holden unde eme lof unde ere beden moten, dat gy vor synen gotliken ogen moten staͤn, alse en bloyende olyetwich unde so moten tonemen in dogeden, dat de krone juwer beloninge alle tyd in der salicheit mote vormeret werden unde gy Gade juwe sele froliken moten offereren .

Darto sende wy dy vor ene gave de kusche junchvruwen Marien, de dar is dat gulden schryn, dar de gantze Hilige Drevoldicheit den edelen duͧrbar schat aller [Lage 12, fol. 2r] gnade inne beslaten heft, des se mechtich is to vorgeven, wene se wel, de mote juw beyde vorwerven dat rode golt der gotliken leve unde al de eddelen steine der dogeden, de juw nod syntc, an lyve unde an sele, unde darto suntheit des lyves, salicheit der sele, enen saligen kerstliken guden ende, dat gy hir so moten leven na dem bade Godes, dat gy darna moten kamen to der selschop aller saligen unde myd jum moten beschouwen dat clare frolike anghesicht Gades unde juw dar den ewelken frouwen moten vor deme speyeld der Hilligen Drevaldicheit sunder ende. Amen.