Jesus Maria

Salicheyt der zele, suntheit des lyves, gnade unde benediginghe in desser tyd, vroude unde salicheyt ewichliken tho besittende!

Alderleveste vader unde alderleveste mome, so ik vorvoren hebbe bynnen korter tyd, dat juwe nye hus rede worden is unde dat gy dar synt inghetoghen, also mote juk nu seghenen unde benedyghen de keyserlike almechticheyt Godes syn konichlike myldicheit mote iuk beschutten, syn ewighe gotheyt mote iuk behoden unde bewaren, de Hilge Drevoldicheyt mote iuk beschermen, God unde mynsche, de de is eyn ambeghin unde en ende, de seghene juwe lif unde juwe zele unde alle juwe gud in huse unde in have unde gheve juw lucke, ere unde ghud, unde allent des juk nod is, dat gy in dessem huse alzo moten leven in synen hulden unde gnaden, unde der tydliken ghudere, de he juk vorlend heft, alzo bruken moten eme tho love unde tho eren, dat gy na dessem levende des ewighen ghudes sunder ende brukena moten. Maria, de ware leydesterne,1 de leyde juk dor dat meer desser bedroveden werlt an unschult unde an dogheden. De hilgen enghele de moten ummefleghen unde ummedon alle juwe woninghe unde juwe buw bynnen unde buten unde beschermen juwe lif unde juwe zele unde alle juwe tytliken ghudere, nu unde tho allen tyden vor alleme ovele. De hilgen veer ewanglisten Lucas, Marcus, Matheus unde Johannes, de syn in den veer orden juwes huses. Alle Godes hilgen de moten [Lage 14, fol. 1v] by iuk wesen nachtes unde daghes unde moten iuk vorwerven eyn hillich, salich, rechtverdich levent, dat gy in dessem huse alzo leven moten, dat gy na dessem levende komen moten tho der hoghen woninghe, der hemmelschen stad tho Jerusalem, dar dat buw is van edelem stente, deb strate van clarem golde, dar de porten van der stad nummer werdet thoghesloten, alze we vyndet in dem boke der heimelkenc openbaringhe,2 dat gy dar smecken moten, wo grod dat de mennichvoldicheyt is der soticheyt, de de uterkoren hebbet van mynes leven, schonen, hochgheboren brodegammes ieghenwardicheyt, wente syn scone begherlike antlat vorluchtet den hemmel unde spiset de enghele unde vrouwet de uterweleden, de de synt in dem hemmele, wente se werdet alle ghespiset unde vorvullet uthe deme grundelosen borne der wischeyt unde wetenheyt Godes unde bruket der vroude, de de unbegripelick is, unde de ny nen oghe heft gheseen, unde ny nen ore heft ghehort, unde ny in nenes mynschen herte steghen is,3 de God bered heft deniennen, de ene lef hebbet unde ene vruchtet, dat gy den darvan ghesadet werden tho ewighen tyden.

Item danke ik juk vor alle ghud, woldat unde lefmodicheyt, de gy my vaken hebbet bewiset besunderghen vord de groten appele, de gy us tho twen tyden hebbet ghesend; dar hefte gy myk sunderghen leve ane dan, darumme [Lage 14, fol. 2r] dat gy de der ghansen samlinghe senden; de leve sote Jesus, de de is eyn beloner alles ghuden, de mote iuk dat hundertvolt belonen, alze he sunder twifel wol don wel, wente he sulven secht in dem Ewangelio: „Is dat, dar we gyft eynem beker waters in mynem namen, ik segge iuk dat vorware, he schal syn lon nicht vorlesen.“4 Desse eddele, truwe beloner Jesus Christus, de mote iuk gheven syne gnadef unde soticheit in desseme elende unde na desseme levende dat ewighe ghud, dat he sulven is, dat gy des sunder ende bruken moten, des help juk und us de Vader unde de Sone unde de Hilge Geist. Amen.

MT et ETV.g