[J]esuma Christum, den claren sunnenglans unde schinenden speygel der vaderken clarheit vor enen fruntliken grot tovoren in angheboren leve myd unsem crankenb bede!

Alderleveste N, alzo de tyd nu is ghekomen darane du annemen scolt den stath des hilgen echtes, den Got alweldich sulven angesettet heft an dem paradyse vormiddest usen ersten olderen, alzo scolde wy wol van maghenschap weghen to dyner hochtid komen unde dy eren myd erem kostliken clenade, dat de leve God anders gheschikket heft na synem gotliken wolbehage unde us ghevoget in den tal syner uterkoren brude, dar eme ewich loff unde ere vor sy, dat we nu nicht personliken kont to dyner brutlacht komen. Doch uppe dat we us bewisen konnen in demsulven, dat us moghelick is, so sende we dy in eyn teken der leve dat alderleveste unde eddelste unde beste, dat we hebben im hemmel unde in erden, dat is Jesus Christus, use alderleveste brudegam unde schoneste alze eyn guldene vorspan van schynendem roden golde vul eddeler stene; dar tovoren an is ghesettet de fyne lustlike parle, de ghewassen is in der nudsamighen ouwschelle des junchvrowelken schrins syner reynen kuscken moder Marien, wente an dem gloyenden avene der leve ward desse eddele parle smedet an dat rode schynende golt do syn unbegripelke gotheit voreinget ward myd der reynen unbeuleckeden mynscheit. Unde de moten ok nu kamen to dyner brudlacht myd syner benedieden moder Marien, an dersulven leve, dar he umme user salicheit hir dale qwam in dyt elende uth dem hoghen hemmeltrone, unde geve juw de hemmelschen benedighinghe myd syner alwoldigen gotliken vorderen hant, dat gy juw nu alzo sammelen moten in syner gotliken leve unde vruchten, dat eme dar mote lof unde ere van schen, unde den vordan al de tyd juwes levendes moten tobringen in synen gotliken wolbehage, in vrede unde in endracht, in leve unde fruntschop, dat gy unde al, de van juw komen mogen, samdelich werden moten alle der benediginge dar he van anbeginne der werlt al syne uterkoren mede benediget heft, besundergen de he gaf deme hilgen patriarchen Jacob alze he slepp in dem weghe, unde in dem slape sach he ene hoge ledderen, de sik behaldec an dem hemmel, [Lage 18, fol. 5r] dar de hilgen engele upp unde dale stegen unde got sulven an der hogede sat unde so to eme sprac: „Ik wil dy sulven benedigen unde wil alderwegen dyn hoder wesen unde ok dyn slechte vorbreden alze dat sandeskorne des ertrikes unde al dat volk scal vormiddest dy unde dynem slechte benediet werden.“1 Dat do vullenbrocht ward alze Got sulven de minscheit entfeng van syner reynen kusken junchvrowelken moder, de al des slechtes en ere unde en crone is wente se denjennen getelet heft, Jesum Christum, den koning der ere, de vormiddest synem hilgen duren blode unde bitteren lydende wedderkoft heft al de gnade unde benediginghe, de we myd usen sunden vorloren hadden, unde de mote ock nu by juw wesen nachtd unde dages in allen stunden unde steden myd al den negen choren der hilgen engele de juw beschermen vor allem arghen der zele unde des lyves unde vaken to juw hir dalestigen de gnade Godes unde vormeringe der doghede, juw to vorwervende dat gy moten vortghan in allen guden werken unde ok vakene upstigen unde van juwer weghen an den hemel to bringhende allent, wat gy Gode to eren unde juwen even mynschen to gude don konnet, unde dat dat mote dor de bede der junchvrowen Marien wesen vor dem speygele der Hilgen Drevaldicheit alze eyn anname offer so dat gy al de tyd juwes levendes moten rekent werden in deme talle syner uterweleden, beyde in dessemf elende unde ok, wan gy van hir scheden synt unde denne na dessem jammerdale dar komen moten, dar gy der ere, der clarheit unde der unsprekelken vroude ewelken bruken moten, „de ny neyn oghe seen heft, nen ore hord heft unde do ok in nenes minschen herten stegen is, de Got alweldich bereth heft al denjennen, de en leff hebben“,2 dat vorleve juw unde us allen de brudegham der cristenheyt, Jesus Christus, dor syne gnade unde grundelosen barmherticheyt. Amen.