Marien, de hemmelschen keyserinnen, de de is eyn bloyghende lylienstam der reynen kuscheyt, en wunnich fyolendal der rechten othmodicheyt, eyn schone rosenvelt der rechten waren leve unde en sachte sote douw der reynen herte, den sende we juk, alderleveste soror Elisabeth Bockesken, vor enen lefmodighen, fruntliken, annamen grod thovorn unde danket juk hochliken vor alle ghud unde woldath, truwe unde leve, de gya by us bewiset hebbet de tyd, over de gy hir myd us weren, dat we nummer to vullen uthscriven kond, mer Jesus Christus unse alderle- [Lage 19, fol. 3r] veste brudegham, de de rike is in gnaden unde mylde in barmherticheyt, de belone juk dat hundervolt in desser tyd, alzo dat he juwe seleken vormyddelst gnaden unde dogheden vorvulle unde geve juk synen gotliken trost dewile, dat gy synt in dessem dale der tranen, unde na desseme levende dat grote lon dat he sulven is, unde dat gy den vor den swaren arbeyt, den ghy myd us hadden, van em entfanghen moghen de ewighen rouwe.

Item web dot juwer leve froliken to wetende, dat we van al unsem herten hoghe ghevrouwet synt in unsem alderlevesten brudegham, wente we ghehort hebben van usen leven superioribus eyn grod frolick bodenbrod, dat de sunne der rechticheit Jesus eren blenkerden schinenden stralen so wyde heft uthghesporet in gnade unde in barmherticheyt, dat we armen kyndere dar ok gnade unde trost hebben van entfanghen, des we langhe tyd hebben begherende wesen, dat we mochten komen to enem vullenkomen gheystliken levende unde mochten use gheystlikec habitum1 vul unde al krighen, dat we nu hopet to entfanghende in dem benedieden daghe uses hilgen vaders sancti Benedicti, dat us so groten vroude is, dat we dat nicht to vullen uthscriven kond. Alzo bydde we nu lefliken unde fruntliken, ift we juk gywerle wormede vortornet hebben, dewile de gy hir myd us weren, myd worden, myd werken, myd late edder bere, dat gy us dat willen lefliken remitteren [Lage 19, fol. 3v] umme de leve Godes, unde wolde gy io user dechtich wesen in vestris orationibus noctibus et diebus, dat sponsus noster dulcissimus wille wesen use anbeghin, use myddel unde use ende, up dat we use hilgen regulen, de we loven scholt, so moten holden na al user moghelicheyt, dat we dar moten under militeren in dem hilgen horsamme, in dult, in othmodicheyt unde in willighem armode, unde darinne proficieren de die in diem,2 de virtute in virtutem3 unde dar vulherdich innebliven wente an unsen dot, uppe dat we datd grote lon den entfanghen moten na dessem levende, dat us use leve vader sanctus Benedictus darvor lovet heft, dat „nen oghe beseen heft etc.“4 Unde wolde gy ok van user weghen bidden use leven matres videlicet Mechtild Redebere etc., ift we se jum wormede hedden enieghen wesen, dat se us date ok willen pie remitteren; boven alle bydde we, dat gy user in dem benedieden daghe nicht vorghetten, wan we dat grote ammacht entfanghen scolt, dat gy us den bevalen user alderlevesten truten momeken Marien in eren moderken schod, dat se us darin entfanghen wille alse leve kyndere unde us daruth geve de gnade des Hilgen Ghestes, dat de use herteken so mote perlustreren, dat we bekennen moten allent, wad eref leven kynde mochte an us mishagheng, dat we dat nu altomale moten beruwen van ghansem herten, unde moten nu nyghe lude werden, unde us so annemen maghen in unsem ghestliken levende, unde in dessem wyn- [Lage 19, fol. 4r] gharden, den he myd synen gotliken henden plantet heft unde myd synem duren blode gheghoten heft, dar he us to uterwelet heft, dat we dar so moten inne laboreren in vurigher bernden leve, dat em use denst anname sy unde us belonsam, unde dat al use leven vrunde, beyde levendighe unde dode, des moten samdelich werden unde dar trost van hebben moten, unde dat se us des behelpen wille by erem leven kynde, dat we moten upwassen in allen ghestliken dogheden, alzo dat we stan moten vor synem gotliken anghesichte alze en vruchtsamich olyebom, unde andere lude myd daden unde myd werken moten verbeteren, unde moten nu dat alde cled uthen unde en nyghe cled anthen, dar we vroliken usem leven sponso moghen mede enjeghen ghan,5 wan he us van hir halen wel, up dat we den van em entfanghen moghen dat hochtidescled van clarem golde wracht, dat cled der ere unde der vroude, dar we demede ghan moten in der junchvrowen dans, de dem snewitten lemmeken volghet, alwor id gheyt,6 dar Maria den junchvrowen voretrid, dat we us dar den vrouwen moten myd allen uterkoren to ewighen tyden.

Hirmede bevale we juk der hochgeloveden vorghenomeden keyserinnen des hemmels Marien, dat de juk behode unde bescherme, dewile dat gy synt in dessem kranken lichamme vor allem arghen, unde bringhe juk na dessem levende in ene wisse stede, dar gy bescouwen moghen dat wunneghe, clare, lustlike antlad eres leven kyndes unde darvan ghelaveth unde spiset werden tho ewighen tyden. Des help juk unde us allen de werde Hilge Drevoldicheit, alze de Vader unde de Sone unde de Hilge Geist. Amen.