MSC1 fratria

[J]esumb Christum des oversten koninges sone, de dar is dat sterke mechttighe eynhorningh,2 dat sik umme unser salicheit willen heft gheneghet in den schod der reynen, kusken junchvrowen Marien, dar syn strengicheit tomale ward ghewandelt in barmherticheit unde mildicheit,3 den scrive ik dy, myn alderleveste bole, vor enen lefliken unde fruntliken grod tovoren! So my wol witlick is, dat du van schickinge weghen des leven Godes wedder anghan wult den stad des hilgen echtes, den God de here in dem ersten anbegynne der werlt sulven heft anghesettet in dem paradyse myd unsen ersten olderen unde heft den ock sulven ghehilget in syner hilgen mynscheit, do he myd syner leven moder Marien unde myd synen leven jungheren qwam to der werschopp in Chana Galilee, dar he umme bede willen syner leven moder dat water wandelde in den besten wyn; hirumme so byn ik des hoge vrouwet in God den heren, dat he dy to sodanen werdighen state gheesket heft.

Unde it temede sik wol van mageschop weghen, dat ik dy de negheste were to dyner brudlacht unde dy wormede bega- [Lage 28, fol. 4r] vede, so westu wol, dat ik altes nicht hebbe, noch sulver edder golt, dar dy mochte mede holpen wesen, unde God de here bekent myn herte, were my dat moghelik, dat ik dy konde wat geven, dat dy to ewigen tyden mochte vromen, dat wolde ik van herten gherne don; unde wat nu in my enbrickt, dat hebbe ik dy beden van mynem uterkoren brudegamme Jesu Christo, dar synt inne besloten de verborgene schatte der wisheit, wente he is der alderwoldigeste in hemmel unde in erden unde kan dy geven lucke, ere unde ghud. He is de alderrikeste unde kan dy geven rikedage unde stad, luckegen vortgang in tydliken gůderen unde besittinge der ewigen hemmelschen ghudere. Desse sulven heren unde fůrsten sende ik dy alze enen kostliken vorguldeden dusingh, bewracht myd finen eddelen durbaren parlen unde myd fynen eddelen stenen, de mote dyne zele tziren myd allen gaven unde dogheden, de dy nod synt to der zalicheit, unde geven dy uth der trezekamer synes soten herten dat schinende rode golt syner ewigen gotliken leve, dattu ene boven alle creaturen allene mogest leff hebben alze dynen schipper unde dynen God unde darneghest dynen evenen mynschen lick alze dy sulven, up dat du in der leve alzo moghest bevestiget werden, dat alle de anderen doghede unde gnade ock moten in dy groyen unde bloyen, dar de hilge apostel sunte Pawel van scrift, der vele is, de tomale uth der leve komet, dat nu to langh worde to scrivende.4

Darto sende ik dy de koningynnen des hemmels Marien myd allem hemmelschen here, de mote dy vorwerven van erem leven kynde alle de segheninghe unde benedigynge, dede God de here lavede unde gaff dem groten patriarchen Abrahmec an synen sone Ysaac, do he to em sede: „An dynem [Lage 28, fol. 4v] slechte scholet benedyet werden al de slechte der werlt etc.“5 Datsulve mote juw ock weddervaren, dat gy in dem hilgen echte so moten leven in der leve unde in dem vruchten Godes, in gotliker lefliker eynsamiger truwe unde leve, in vrede unde in eyndracht unde in allen dogetsamigen ghuden werken moten bestediget werden unde dar vulherdich inne to blivende wente an dem ende, up dat gy na dessem levende myd vrouden komen moten to der hemmelschen werschopp in de hogen stat Jerusalem, de ghebuwet is van eddelen durbaren levendighen stenen, dar de straten gulden synt, dar nummer neyn drofnisse is, sunder ewich vroude unde frolicheit.

Dat gy juw dar den moten vrouwen myd allen salighen unde uterkoren, des helpe juw unde us de Vader unde de Sone unde de Hilge Geyst. Amen.